Ñawiriqkuna yachayta munanku

Jesús, ¿arcángel Miguelllataqchu?

▪ Arí. Unay tiempopi, kunan tiempopijina, wakin llaqtaspiqa, juk runata achkha sutiswan sutichaq kanku. Sutʼincharinapaq, Jacobta, Israel sutiwan riqsikullaqtaq (Génesis 35:10). Biblia qillqakuchkaptin apóstol Pedrotapis Symeón, Simón, Pedro, Cefas, Simón Pedro ima sutiswan riqsiq kanku (Mateo 10:2; 16:16; Juan 1:42; Hechos 15:7, 14). ¿Imaynatá yachasunman Jesuspa juknin sutin Miguel kasqanta? Chayta yachanapaq, imatachus Biblia sutʼinchasqanta ukhuncharinachik.

Bibliaqa, arcángel Miguelmanta phichqa kutita parlan. Chay phichqamantataq Miguel suti Daniel libropi kimsa kutita rikhurin. Daniel 10:13, 21 pʼitikunaqa, “[Miguel] atiyniyoj angelesmanta ujnin” kasqanta, “kamach[iq]” kasqanta, juk angelta yanapasqanta ima nin. Chantá Daniel 12:1 pʼitiqa, tukukuy pʼunchaykunapi ‘Diospa llaqtanta qhawaq kuraq kaq ángel Miguel rikhurimunanta’ nillantaq.

Chantá Apocalipsis libropi 12:7 pʼitipi, Miguel suti rikhurillantaq. Chaypitaq, “arcángel Miguel, angelesnin ima sierpewan maqanak[usqankuta]”, atipaspataq Kuraq Supayta, supaykunatawan Jallpʼaman wikchʼumusqankuta nin.

Rikunchikjina kay iskaynin librosqa, arcángel Miguel, Diospa llaqtanta Kuraq Supaymanta jarkʼananpaq, paykunarayku maqanakunanpaq ima churasqa kasqanta rikuchin.

Judas libropis 9 pʼitipi, Miguel, juk “arcángel” kasqanta nillantaq. “Arcángel” rimayqa, “Kuraq ángel” chayri “angelesta kamachiq” ninayan, Bibliataq juk arcangellla kasqanta nin. Kay 1 Tesalonicenses 4:16 pʼitipipis arcángel rimay rikhurillantaq, kay pʼitipitaq apóstol Pabloqa, kawsarimuq Jesusmanta parlaspa jinata nirqa: “Señorpuni janaj pachamanta uraykʼamonqa. Chaypacha uyarikonqa uj jatun qhapariy, arcangelpa voznin, Diospa cornetampa waqaynin ima”, nispa. Kay pʼitipi rikunchikjina Bibliaqa, Jesús, arcángel Miguel, chayri angelesta kamachiq kasqanta nin.

Tukuy kaykunata yachaspa, chiqamanta nisunman Jesús, arcángel Miguelllataq kasqanta. Chay sutisninqa, Diospa kamachiyninta jarkʼananpaq, Jesús tukuy imata ruwasqanta rikuchin: Miguel sutinqa “¿Pitaq Diosjinarí?”, ninayan, Jesús sutintaqrí “Jehová Salvacionmin” niyta munan. Filipenses 2:9 pʼiti nin: “Chayrayku Diosqa payta maytapuni jatuncharqa tukuy kaj chhika patapi kanampaj, uj sutitataj qorqa, tukuy sutismanta aswan sumaj sutita”.

Jesusqa, mana kay Jallpʼapi runajina nacekusqanmantapachachu kawsayta qallarirqa. Diospa atiyninwan wiksallisqa rikhurinanta Mariaman willaq angelqa, chay wawaman Jesús sutita churananta nirqa (Lucas 1:31). Jesusllataq, Diosmanta runasman willachkaspa, achkha kutispi nirqa, niraq Jallpʼaman jamuchkaspa janaqpachapi kawsasqantaña (Juan 3:13; 8:23, 58).

Chayrayku nisunman, niraq Jallpʼaman jamuchkaspa, Jesús janaqpachapi arcángel Miguel kasqanta. Janaqpachaman kutipuytawantaq watiqmanta angelesta kamachiyta qallarisqanta, “Dios Tata jatunchasqa kanampaj” (Filipenses 2:11).