Bangladés (Daca) suyupi, Smita * tiyakorqa, payqa 35 watasniyoj karqa. Tukuywan kʼacha karqa. Qosanwan kusisqa kausakusqanrayku, kʼuchi kasqanrayku ima allinpaj qhawasqa karqa. Diosmantapis runasman yachachej. Ajinallapi Smita uj onqoy usqhayllata wañuchiporqa, familiantaj sinchʼi llakiypi rikukorqa.

Jameswan warminwanqa 30 watasniyoj jinaña kasharqanku, paykunapis Smita jina kʼachasllataj karqanku. Pasaj watasllaraj Estados Unidosmanta mama qocha kantupi tiyakoj amigosninta waturej rerqanku, Nueva Yorkpi wasinkumantaj ni kutinporqankuñachu. Imaraykuchus autowan accidentakorqanku. Familiaresninpaj, amigosninpajpis, may llakiy karqa.

Sajra ruwaykuna, ñakʼariykuna ima tukuynejpi kashan. Sutʼincharina, guerrasqa mana soldadosllatachu wañuchin. Sajrata ruwajkunapis ashkha runasta llakiypi rikhurichinku. Accidentespis, sinchʼi onqoykunapis, ni pita khuyanchu. Chantapis jatuchaj llakiykunaqa, llajtitasta chinkachipun. Chejninakuy, mana cheqan ruwaykuna ima sapa pʼunchay rikukun. Ichá qanpis ajinallapitaj rikukorqanki.

Chayrayku ichá kayta tapurikunki:

• ¿Imaraykutaj kʼacha runas ñakʼarinku?

• ¿Dioschu juchayoj?

• ¿Llakiykuna jinallamantachu rikhurin chayri runachu rikhurichin?

• ¿Karma * nisqachu kanman? ¿Ñaupa kawsaypi sajra ruwasqasninchejmantachu pagashasunman?

• Tukuy Atiyniyoj Dios kan chayqa, ¿imaraykú kʼacha runasta mana yanapanchu?

• Sajra ruwaykuna, ñakʼariykunawan maykʼajllapis, ¿tukukonqachu?

Kutichinapajqa kay tapuykunata ukhuncharina: ¿Imaraykutaj sajra ruwaykuna tiyan? ¿Dios chayta qhawakullanqachu?