RANQHAJKUNAQA sinrulla Niloj mayu kantunta rishallankupuni. Wayraqa loto tʼikaspa, waj yaku tʼikaspa qʼapayninwan ima qʼoñi qʼoñilla phukurimushan. Josetaj chay tʼikaspa qʼapaynintawan khuska wayrata samarishan. Garzastaj, ibiskunataj chay chhika runasta camellosninkutawan rikuspa, chaynejmanta jaqaynejmanta mancharisqa phawarishanku. Ranqhajkunaqa Egiptoj ujnin kaj llajtanman rishanku. Josetaj Hebronpa orqosninmanta, maypichus wasin karqa chaymanta may karupiña kashan. Chay lugartaj wasinman ni tumpata rijchʼakunchu.

Chay mayu kantu palmeraspi, kʼita higo sachʼaspi ima monoslla mayta chʼajwarishanku. Josepajqa chay lugarmanta runaspa parlayninku, chay monospa chʼajwasqanku jina, mana entiedenapaj jinachá karqa. Jinapis payqa entiendeyta munaspa sumajta uyarisharqa, aswan allin karqa yachakushanan. Imajtinchus ichá ni jaykʼaj wasinman kutiponqañachu.

José 17 chayri 18 watayoj kashaspallaraj ashkha chʼampaykunasniyojña kasqanqa, mayta tʼukuchiwanchej. Hermanosnenqa, tatan payta astawan munakusqanrayku wañuchiyta munarqanku. Chantá venderpaytañataj munaspa, ranqherosman venderparqanku. Ranqherostaj Egiptoman vendenankupaj apashanku (Génesis 37:2, 5, 6, 18-28). Semanasta purispapis, ranqherosqa kusirikushankuña, imajtinchus llajtaman chayaspaqa ranqhanankupaj apamusqanku imasta, Josetawan khuska venderpaspa, sumajta qolqechakonqanku. ¿Imatá José ruwanqa llakiywan mana atipachikunanpaj? ¿Imaynatá noqanchejpis chʼampaykunapi rikukojtinchej sinchʼita sayasunman? Josejpa kausayninmanta mayta yachakusunman.

Ranqhajkunaqa Egiptoman chayaytawan Joseta Potifarman venderparqanku. Potifarqa Egipto reypa guardianmanta kamachej, capitannintaj karqa (Génesis 39:1). Joseta uj imata jinalla iskay kutikama venderpasqankoqa, maytachá kʼumuykachacherqa. Kunanqa ashkha tiendaspa chaupinta, dueñonpa qhepanta maypichus tiyakonqa chay wasiman rishan.

Chay waseqa ni tumpata rijchʼakunchu tatanpa wasinman. Joseqa familianwan khuska toldo wasispi wiñakorqa, uywasninku qhatirisqa uj lugarmanta waj lugarman ripuspa. Potifarpa wasintaj, Egiptopi qhapaj runaspa wasin jina karqa, kʼachitu, sumaj pintasqataj. Yachayniyoj runasqa ninku, Egiptopi tiyakoj runaspata kʼacha huertas tiyapusqanta. Chay huertaspitaj jatuchachaj sachʼas, yaku qochas ima kasqanta. Chay yaku qochaspitaj papiro plantas, loto tʼikas, waj plantaspiwan kasqanta. Wakin wasistaqa jatun huerta chaupipi ruwaj kanku. Chay wasistaqa jatuchachaj ventanasniyojta, kʼajamojtin wayrarikunapaj alto patasniyojta, dueñospaj, kamachispajtaj ashkha cuartosniyojta, mikhunankupajpis uj jatun salayojta jina ruwaj kanku.

 ¿José tʼukullachu qhepakorqa dueñonpa jatun wasinta rikuspa? Mana. Ichá astawan tʼukusharqa sapallan kashasqanpi. Paypajqa egipciospa parlasqanku, pʼachallikusqanku, religionninkupis waj jinapuni karqa. Egiptopeqa ashkha dioskunata yupaychaj kanku, layqeriosta ruwaj kanku, chantapis aysirispa ruwaykunasnillanmanta parlaj kanku. ¿Imataj yanaparqa José mana sapallan kasqanta yuyananpaj? Biblia nin: “Tata Diosqa Josewampuni kasharqa”, nispa (Génesis 39:2). Joseqa kutin kutitachá sinchʼi llakiyninta Jehovaman willakorqa. Imajtinchus pay yacharqa “Tata Diosqa payta wajyakojkunaj qayllampi kasha[sqanta]” (Salmo 145:18). ¿Imatawan José ruwarqa Diosninman qayllaykunanpaj?

José llakiywan atipachikunanmantaqa, ruwanasninta sumajta juntʼananpaj kallpachakorqa. Chayraykutaj Jehová bendicerqa. Potifartaj allin rishasqanta repararqa, kamachin Joseta Jehová bendecishasqanrayku. Pisimanta pisitaj Joseqa Potifarwan munachikorqa, chayrayku Potifarqa tukuy imasninta qhawananpaj churarqa (Génesis 39:3-6).

Cristiano jovenesqa Josemanta mayta yachakunkuman. Yachay wasispi chayri institutospi jovenesqa, imaymana layqa ruwaykunaman satʼikunku, nitaj yachankuchu imatachus kausayninkuwan ruwanankuta. Chayrayku cristiano jovenesqa, ichá José jina sapallan kashasqankuta yuyankuman. Qanpis ajinallatataj yuyaspaqa, Jehová qanwan kashasqanta amapuni qonqaychu (Santiago 1:17). Payqa kunankamapis, payman cheqa sonqo kaj jovenespa qayllallankupipuni kashan. Kamachiykunasninta juntʼanankupaj kallpachakojkunatataj bendecin.

Josemanta parlarinallapuni. Payqa unayña Potifarpa kamachin, kunanqa kallpayoj runa, manchay alajitotaj. Chayrayku sajra yuyayniyoj runasmanta mayta jarkʼakunan karqa.

Joseqa mana Potifarpa warmin jinachu karqa. Biblia nin chay warmeqa Joseta sapa kuti “jamuy, noqawan puñuykunki”, nispa nisqanta (Génesis 39:7). ¿José chay warmiwan puñuykuyta munanmanchu karqa? Ichá payqa tukuy jóvenes jina uj warmiwan kayta munanman karqa. Chantapis chay warmeqa kʼachitachá karqa, imajtinchus Bibliaqa ni maypi ninchu chay warmi mana kʼachitachu kasqanta. José ichá yuyanman karqa patronninpa warminwan puñuykojtin ni pi yachananta, astawanpis tukuy imapi allin rinanta, ¿jinatachu yuyanman karqa?

 Mana yachanchejchu. Jinapis imatachus sonqonpi yuyasqanta yachanchej. Payqa Potifarpa warminman nerqa: “Patronneyqa niwan noqa tukuy imasninmanta cuentayoj kanayta; noqa kaypi kashajteyqa, mana imamantapis llakikunanchu tiyan. Kay wasipeqa mana pipis imata ruwananchu tiyan, manachayqa noqalla cuentayoj kani. Chayrayku patronneyqa niwan tukuy kapuyninmanta dueño jina kanayta. Qanllamanta mana ima ruwanaychu tiyan, imaraykuchus qanqa warmin kanki, chayrayku. Ajinaqa, imaynatataj noqa ruwasaj kasqa chay millaytari, juchallikusajtaj Diospa contrampiri?”, nispa (Génesis 39:8, 9). Josej nisqasnenqa sutʼi. Chay warmi puñuykuna nisqanqa nipuni allinchu rijchʼarqa.

José nisqanman jina patronnenqa paypi atienekoj, chayrayku tukuy kapuyninta qhawananpaj payta churarqa. Joseqa nichá yuyallarqapischu patronninpa warminta llankhaykuyta. Paytaqa patronninta wasanchayta yuyayllaraj sonqonta nanacherqa chayqa, astawanraj nanacherqa Diospa contranpi juchallikuyta yuyayqa. Payqa tatasninmanta yachakorqa, Jehová qhenchachakuyta chejnikusqanta. Imajtinchus Jehovaqa qharita warmita ruwaytawan casaracherqa, nerqataj: “Uj runa jinalla kanqanku”, nispa (Génesis 2:24). Yachallarqataj pikunachus qhariwarmita tʼaqayta munajkunaqa, Jehovata sinchʼita phiñachiyta atisqankuta. Sutʼincharina, pikunachus Isaacpa warminwan, Abrahampa warminwan ima puñuykuyta munajkunaqa, kausayninkuta wañuy pataman churasharqanku. Abrahamqa Isaacpa tatan karqa, Isaactaj Josej abuelon karqa (Génesis 20:1-3; 26:7-11). José chayta yachaspa sutʼita yacharqa imatachus ruwananta.

Josej kutichisqanqa, Potifarpa warminman nipuni allinchu rijchʼarqa. Ichá chay warmeqa sonqonpi nisharqa: “Pitaj pay kasqa chay ruway millay kasqanta ninawanpajri, kunanmá rejsiwanqa”, nispa. Chayrayku chay warmeqa Satanás jina urmachiytapuni munaspa tukuy imata ruwayta munarqa. Satanasqa Jesusta kutin kutita urmachiyta munarqa, mana chay kutipi atispataj “pisi tiempota chinkarerqa” (Lucas 4:13). Diospa kamachisnenqa José jina ruwaspa allinta ruwanku. Payqa sapa pʼunchay chay warmi “jamuy noqawan puñuykuna” nejtinpis, mana uyarejllapis tukorqachu (Génesis 39:10). Jinapis chay warmeqa Joseta urmachiytapuni munarqa.

Uj pʼunchay Potifarpa warmenqa, tukuy kamachisnin wasimanta llojsisqankutawan Joseta suyaykorqa. José chayamojtintaj pʼachanmanta japʼiykorqa “jamuy noqawan puñuykunki”, nispa. Chay rato Joseqa kacharichikuyta munarqa, warmitaj astawan chʼipaykukorqa, Josetaj atisqanta kallpawan chʼurkirakuspa kacharichikuytawan ayqerqa. Warmeqa Josej pʼachan japʼirisqa kʼakilla qhepakorqa (Génesis 39:11, 12).

Josej ruwasqanqa, apóstol Pablo nisqanta yuyarichiwanchej. Pay nerqa: “Ayqeychej khuchichakuy juchamanta”, nispa (1 Corintios 6:18). Josej ruwasqanmanta maytapuni yachakusunman. Kay tiempomanta cristianosqa Diospa kamachiykunasninta mana kasojkuna chaupipi tiyakunchej. Sajra yuyayninkuwantaj mana chimpaykuchikuyta munanchejchu, chayrayku imaynamantapis ayqekuna tiyan.

José ayqesqanqa sinchʼi chʼampaypi rikhuricherqa. Potifarpa warmenqa vengakuyta munaspa sinchʼita qhaparerqa, kamachisnintaj imachus kasqanta yachanankupaj usqhayta phawamorqanku. Warmitaj paykunaman nerqa José honranta tʼakachiyta munasqanta, qhaparikojtintaj ayqepusqanta. Chay nisqan cheqapuni kasqanta ninanpajtaj, Josej pʼachanta rikucherqa. Potifar chayamojtinpis, chay cuentollawantaj llutʼaykorqa, astawanpis payta juchachaykorqa Joseta wasinkuman pusaykamusqanmanta. Potifarqa mayta phiñakuspa, Joseta chay ratopacha carcelman wisqʼaykuchimorqa (Génesis 39:13-21).

Yachayniyoj runas Egiptopi unay carcelkunata allaspa tarejtinkupis, pisillata yachakun  imaynachus chay carcelkuna kasqankuta. Chay carcelkunaqa jallpʼa urapi sumaj ruwasqa karqanku, José chaypi kashaspa tuti laqhapichá kasharqa (Génesis 40:15). Chantapis Salmos libro nin: “Chakisninta cadenaswan wataykorqanku”, nispa (Salmo 105:17, 18). Wakin kutispi presostaqa makisninkuta tinkunaykuchispa cadenaswan wasanman wataykoj kanku, wakintataj kunkanmanta cadenaswan wataykoj kanku. Joseqa juchata mana ruwasqallanmanta maytachá ñakʼarisharqa.

Mana chayllachu, Biblia nisqanman jina Joseqa unayta carcelpi wisqʼasqa karqa. * Chantapis maykʼajchus llojsinanta mana yacharqachu, killasta, watasta chayllapipuni kakusharqa. ¿Imatá ruwanman karqa llakiyninwan mana atipachikunanpaj?

Bibliaqa Jehová Josewanpuni kasqanta nin. Arí, Diosqa payta mana qonqarparqachu, tukuy imapitaj khuyarqa (Génesis 39:20, 21). Jehovaqa kamachisninmanta khuyakonqapuni, chaytataj ni mayqen cárcel jarkʼayta atinchu (Romanos 8:38, 39). Tʼukuriy imaynatachus José llakiykunasninta Jehovaman willakushasqanta, tʼukurillaytaj imaynatachus “tukuy imapi sonqochaj Dios[...]” sonqochasqanta, sonqontapis tiyaykuchisqanta (2 Corintios 1:3, 4; Filipenses 4:6, 7). Chantapis Biblia nin jina Jehovaqa, Joseta yanaparqa carcelta qhawajkunaj kurajninkuwan munachikunanpaj.

Chay tiempopeqa presosman ruwanasta qoj kanku. Joseqa chaypi tukuy atisqantachá llankʼarqa, chayraykutaj Jehová bendicerqa. Pisimanta pisitaj carcelta qhawajkunaj kurajninkuwan munachikorqa, paytaj Joseta presosta qhawananpaj churarqa. “Jinamanta payqa carcelpi tukuy imata sumajta kamacherqa, imaschus chay ukhupi ruwakoj, chaykunapi. Chayrayku carcelta qhawaj runaqa mana imamanta dakojchu José cuentayoj kashajtin, imaraykuchus Tata Dios paywan kasharqa tukuy ima ruwasqasnimpi allin rinampaj” (Génesis 39:22, 23). Joseqa Jehová paywan kashasqanmanta maytachá kusikorqa.

Imaymana llakiykuna qhatiriwajtinchejpis, José jina creeyninchejwan atipayta atisunchej. Sichus Jehovamanta mañakullasunpuni, kamachiykunasnintataj kasullasunpuni, chantapis munayninta ruwanapaj kallpachakullasunpuni chayqa, José jina bendicionesta japʼisun. Joseqa ashkha sumaj imastaraj rikorqa. Chaykunamanta qhepan yachaqanaspi parlarisun.