Ñaupa tatayku Thomas (1) a Williamsqa, 20 de enero de 1815 watapi Horncastle (Inglaterra) llajtapi nacekorqa. Mamantaj iskay watayoj kashajtin wañuporqa. Chayrayku tatan payta, kinsa hermanosnintawan uywarqa, carpintero kananpajtaj yachacherqa. Jinapis Thomasqa waj imasta yachakuyta munarqa.

Inglaterrapeqa ujtawan religiones rikhurerqanku. John Wesleyqa Iglesia anglicanamanta llojsiporqa. Chantá Sociedad de Metodistas nisqata rikhuricherqa, chaymanta kajkunataj Bibliata estudianata, Diosmanta willanata nej kanku. Chaytaj tukuynejman usqhayllata chayarqa. Thomaspa familianpis chayta japʼikorqa. Chayrayku Thomasqa, chaymanta willayta qallarerqa, misionero jinataj Pacífico sur nisqaman ripuyta munarqa. Julio de 1840 watapitaj casarakusqanmanta pisi tiemponman, warmin Marywan, (2) Fiyi suyupi kaj Lakeba churuman riporqanku. b Chaypitaj runa mikhus tiyakoj kanku.

Qallariypeqa mana chay lugarman yachaykukuyta atillarqankuchu. Ashkha horasta llankʼananku karqa, mana sumaj kausaychu chaypi karqa, chantapis qʼoñi lugar karqa. Paykunaqa rikorqanku runasta mikhuykusqankuta, viudasta sipisqankuta, wawasta wañuchisqankuta, ayllupura tinkusqankuta ima. Chay runasmanta ashkhasqa willasqankuta mana uyarejchu kanku. Chantapis Thomaspa warmin, kuraj wawan ima onqoywan wañunankupajña kasharqanku. Chayrayku 1843 watapi Thomas nerqa: “May llakisqa kasharqani. [...] Ni imata ruwayta aterqanichu”, nispa. Jinapis Jehová Dios yanapananpi atienekuspa chay lugarpi qhepakorqanku.

Thomasqa carpintero kasqanrayku Europapi wasista jina, wasinta ruwarqa. Wasenqa mana ancha qʼoñi kananpaj altopi ruwasqa kasharqa. Chaytaj chay lugarmanta runasta mayta tʼukucherqa. Niraj tukuchashajtintaj iskay kaj wawan nacekorqa, Thomas Whitton (3) Williams.

Thomasqa 1843 watapi, Juanpa qhelqasqan Evangeliota fiyiano parlayman tijrachispa yanapakorqa. c Ichapis chayta ruway mana atinanpaj jinallachu karqa, imaraykuchus payqa runaspa costumbresninkumanta aswan sumajta yachaj. Uj kuti uj librotapis qhelqarqa, chaytaj imaynatachus Fiyi suyumanta runas 1801-1900 watas  chaynejpi kausakusqankumanta parlasharqa. Chay libro sutikun Fiji and the Fijians (1858).

Chantá Thomasqa 13 watasta Fiyi suyupi llankʼaspa mayta onqoykusqanrayku familianwan Australiaman riporqa. Australiapitaj Diosmanta willasqanrayku, may rejsisqa karqa. Ballarat (Australia) llajtapitaj 1891 watapi wañuporqa.

Kay 1883 watapi, wawan Thomasqa warmin Phoebewan, (4) wawasninwan ima, Australia Occidentalpi kaj Perth llajtaman riporqanku. Sullkʼan Arthur Bakewell (5) Williamstaj chay kutipaj 9 watayojllaraj kasharqa.

Arthurqa 22 watayoj, qori minasniyoj may rejsisqa Kalgoorlie llajtaman riporqa, chaytaj Perth llajtamanta 600 kilometrospi kashan. Chaypitaj Bibliamanta Yachaqajkunaj publicacionesninta leerqa. (Unayqa Jehovaj testigosninta Bibliamanta Yachaqajkuna nej kanku.) Chantapis Zionʼs Watch Tower (kunantaj Torremanta Qhawaj) revistata sapa killa japʼinanpaj qhelqachikorqa. Yachakusqan mayta tʼukuchisqanrayku runasman chaymanta willarerqa, Bibliata estudianankupajtaj wasinpi tantakuykunata ruwarqa. Ajinamanta sumaj willaykuna Australia Occidentalman chayarqa.

Chantapis Arthurqa yachakusqanta familianman willarerqa. Tatanmantaj chayqa allillan rijchʼarqa. Jinapis tatanqa pisi tiemponman wañuporqa. Maman, hermanasnin Violet, Mary imataj, Bibliamanta Yachaqajkunaman tukorqanku. Violetqa precursora jina Diospaj astawan llankʼarqa. Chayrayku Arthurqa Violetmanta nerqa: “Ashkha horastapuni willaj, pay jina kusiywan llankʼajqa mana jaykʼajpis Australia Occidentalpi karqachu”, nispa. Chayta nispaqa ichapis yapasqata parlasharqa. Jinapis Violet ajinata willasqanqa, wawasnin kikillantataj ruwanankupaj yanaparqa.

Arthurqa pisi tiemponman casarakuytawan Donnybrook llajtaman riporqa. Chay llajtapeqa frutas sumajta poqoj. Chaypitaj 1914 watamanta anchata parlasqanrayku loco runa nej kanku. d Chaywanpis 1914 watapi Ñaupaj kaj Guerra Mundial qallarejtin niña imatapis nerqankuchu. Payqa Bibliamanta orqhosqa publicacionesta tiendanman churaj, rantikojkunamantaj Diosmanta willaj. Chantapis tiendanpi uj letrerota churarqa, chaypitaj nisharqa 100 libras qolqeta qonanta Trinidad yachachiyta Bibliawan sutʼinchajman. Payqa chay llulla yachachiypi mana creejchu. Chantapis ni pi chay qolqeta ganakorqachu.

Arthurpa wasinpeqa Bibliamanta yachakunankupaj tantakoj kanku. Chayrayku aswan qhepaman uj Tantakuna Wasita ruwarqa. Chaytaj Australia Occidentalmanta Jehovaj testigosninpa  ñaupaj kaj Tantakuna Wasinku karqa. Payqa 75 watayoj jinaña kaspapis saconta, corbatanta ima churaykukuytawan, Doll sutiyoj caballonman lloqʼaykuspa Donnybrook provinciaj japʼiyninpi kaj lugaresman willaj rej.

Arthurqa pacienciayoj karqa, sonqo kʼajaywantaj willaj. Wawasnintaj paymanta yachakorqanku. Wawan Florenceqa (6) Indiapi misionera karqa, wawasnin Arthur Lindsay, (7) Thomas imataj, tatanku jina ashkha watasta qotuchakuypi ancianos karqanku.

Tataypa abuelon Arthurqa kʼacha runapuni karqa. Wajkunawan parlarinanpaj tiempochakoj, tukuytataj jatunpaj qhawaj. Kʼullusta chʼejtanapajtaj churasqa kaj. Chayrayku 12 wataspi, 18 kutista atiparqa kʼulluta chʼejtaymanta atipanakuspi.

Jinapis Arthurqa mana allinpajchu qhawarqa wawan Ronald, (8) iskay watitayoj kashaspa hachawan uj manzana sachʼitata kʼuturpasqanta. Warmintaj chay sachʼitata mana wañupunanpaj allinchaykorqa. Chay sachʼitaqa miskʼi manzanasta poqorqa, Lady Williams nispataj suticharqanku. Chay manzanasmantataj Cripps Pink nisqa laya manzanas llojserqa.

May sumajpuni abueloy aswan qhepaman manaña chayman rijchʼakoj imasta ruwasqanqa. Abueloywan, abuelaywanqa Jehovaj tetigosninta, Tantakuna Wasista ruwaysikuspa yanapakorqanku Australiapi, Salomón churuspi ima. Abueloyqa 80 watayojña, qotuchakuymanta ancianotaj. Chantapis Australia Occidentalpi Jehovaj testigosninpa Tantakuna Wasisninkuta allinchaspa chayri ruwaspa yanapakushan.

Tatasniy Geoffrey, (9) Janice (10) ima, noqaman, hermanayman (11) ima Diosmanta yachachiwarqayku. Uj jatun tantakuymanta wasiyman chayaytawan 13 watayoj kashaspa Diosta yupaychayta ajllarqani. Imaraykuchus chay tantakuypeqa Diospa Llajtanta Kamachejkunamanta, hermano John Barr waynuchitusman niwarqayku: “Diosta rejsiyta, munakuyta ima atisqaykichejta jatunpaj qhawaychej”, nispa. Iskay watasninmantaj precursor jina llankʼayta qallarerqani.

Kunantaj warmiy Chloewan Diospa Palabranmanta Tom Price llajtitapi ashkha horasta runasman yachachiyku. Chay llajtitapeqa ashkha runas mineros kanku. Imatachus necesitasqallaykupajtaj llankʼayku. Tatasniy, hermanay, qosan Andrew ima, noqayku jina Port Hedland nisqapi Diosmanta willashanku. Chaytaj tiyakuyku chaymanta 420 kilometrospi kashan. Tatay, noqa (12) ima qotuchakuyniykupi ancianos kayku.

Ñaupa tatasniykumantapacha, Diosta yupaychayta ajllarqayku. Mayta agradecekuni ñaupa tatasniy Bibliamanta yachakusqankumanta.