TAPANMANTA | ¿MAYMANTAJ WAÑUSPA RINCHEJ?
¿Maymantaj wañuspa ripunchej?
Lionel nin: “Noqaqa wañupuspa cieloman ripunata, infiernoman chayri purgatorioman * rinata creej kani. Noqaqa mana cieloman ripunaypaj jinachu kasqayta yuyaj kani, nitaj infiernomanpis. Chaywanpis mana yacharqanichu imachus purgatorio kasqanta. Ni jaykʼaj Bibliata leerqanichu, runaj nisqallanta creej kani”.
Fernando nin: “Cieloman ripunamantaqa, tukuy yachachiwarqanku, chay cheqapunichus manachus kasqantataj mana sutʼita yacharqanichu. Wañupojtinchejqa niña ima kananta creej kani”.
¿Maymantaj wañupuspa rinchej? ¿Familianchejmanta wañupojkuna ñakʼarishankuchu? ¿Watejmanta paykunawan tinkusunmanchu? ¿Imaynatá yachanchej chay cheqapuni kasqanta? Chayta yachanapajqa, Biblia yachachisqanta ukhuncharina. Ñaupajtaqa imatachus wañuymanta yachachisqanta qhawarisun, chantá chay kinsa tapuykunaman kutichisqanta.
¿Imaynataj wañusqas kashanku?
BIBLIA NIN: “Kawsashajkunaqa wañunankuta yachakunku; wañusqasrí mana imatapis yachankuchu, manataj imatapis tarinkuñachu, imaraykuchus paykunaqa qonqayman churasqa kanku. Imachus ruwanaykipaj tiyan, chayta tukuy kallpaykiwan ruway, imaraykuchus wañuspa maymanchus rinki, chay ukhu pachapeqa manaña ima ruwanapis kanchu, ni yuyanapis, ni yachanapis, nitaj yachaypis.” * (Eclesiastés 9:5, 10.)
Bibliapeqa Seolmanta parlaspa, maypichus wañusqas puñuypi jina kashanku, mana imatapis yachankuchu, nitaj imatapis ruwayta atinkuchu, chaymanta parlashan. Diospa kamachin Job, imatachus wañuymanta entiendesqanpi tʼukurina. Paypa wawasnenqa ujllapi tukuyninku wañuporqanku, ni imayojtaj qhepakorqa. Chantapis sarna onqoywan mayta ñakʼarerqa. Chayrayku Diosmanta mañakorqa: “Allin kanman ukhu pachaj atiynimpi pakaykunawayki” (Job 1:13-19; 2:7; 14:13). Jobqa sutʼita yacharqa ukhu pachaqa chayri infiernoqa mana ñakʼarinapaj lugarchu kasqanta, astawanpis samarinapaj.
Chantapis imaynachus wañusqas kashasqankuta yachallasunmantaj, kausarimojkunamanta Bibliapi parlashasqanta leespa. Chantá, “ Bibliaqa pusaj runas kausarimusqankumanta parlan” nisqa recuadrota leeriwaj.
Chay kausarimoj runasqa, mana uj lugarpi ñakʼarisqankutachu nerqanku. Ñakʼarinkuman karqa chayqa, willakunkumanchá karqa. Bibliapipis qhelqakullanmantajchá karqa. Jinapis, Bibliaqa ni imata chaymanta ninchu. Chay pusaj runasqa, ni imata nerqankuchu. Imaraykuchus wañusqa kashaspaqa, ni imata yacharqankuchu, astawanpis miskʼi puñuypi jina kasharqanku. Chayrayku Bibliaqa wakin kutispi wañuymanta parlananpaj “puñuy” palabrata oqharin. Sutʼincharinapaj, rey David, Diosman nerqa, ama saqerparinanta “wañuypi puñukapuna[n]paj” (Salmo 13:3).
¿Wañupojtinchej niñachu imapis kan? Chay miskʼi puñuymanta, ¿rijchʼarisunmanchu?
^ párrafo 3 Chaypi creejkunaqa yuyanku, niraj cieloman yaykushaspa runaj alman uj tiempota ñakʼarisqanta juchasninmanta pagananpaj.
^ párrafo 7 Hebreo parlaypi Seol nisqa palabra, griego parlaypitaj Hades palabra, niyta munan “wañuy”, “ukhu pacha” chayri “covacha”. Wakin Bibliasqa infierno nispa tijrachinku, Diospa Palabranpi mana infiernomanta parlajtinpis.
Kaykunatapis qhawaykurillawajtaj
TORREMANTA QHAWAJ
¿Wañusqasta Jesús kausaricherqapunichu?
¿Jesús aswan qhepaman wañusqasta kausarichillanqatajchu?
