Acul llajtitapi nacekorqani, chayqa Guatemala suyupi kashan. Familiayqa ixiles ayllumanta, chaykunaqa maya ayllumanta jamojkuna kanku. Castellanota parlaspapis, familiaypi parlasqan qalluta parlallanitaj. Guatemalapi guerra karqa chay tiempopitaj kausakorqani. Chay guerraqa 36 watasta karqa. Chaypitaj ashkha ixiles wañorqanku.

Tawa watayoj kashajtiy qanchis watayoj hermanoy uj dinamitawan jina phujllasharqa. Chay tʼojyarqa. Chayrayku noqa ciegoyaporqani hermanoytaj wañuporqa. Chaymantapacha Guatemala llajtapi cieguitospaj uj institucionpi karqani, braillepi leeytataj yachakorqani. Chay institucionmanta kajkunaqa imaraykuchus waj wawaswan mana parlajta saqewasqankuta mana yacharqanichu. Compañerosniypis mana parlapayawajchu kanku. Sapallay kakoj kani, mamaywanqa iskay killata qhepakoj kani chayrayku chay killas chayamunanta mayta suyakoj kani. Jinapis chunka watayoj kashajtiy pay wañuporqa. May llakisqa kasharqani, imajtinchus paylla munakuwaj.

Chunka ujniyoj kashajtiytaj llajtayman kutiporqani, chaypitaj tiyakorqani hermanastroywan familianwan ima. Paykunataj uywawarqanku, jinapis ni ima kusichiwajchu. Wakin kuteqa Diosman qhaparikuspa nej kani: “¿Imaraykú mamay wañupunri? ¿Imaraykú ciegoyapuniri?”, nispa. Runaqa Diospa munaynin kasqanta niwaj kanku. Chayrayku yuyaj kani Diosqa llulla, sajrataj kasqanta. Atiymanchus karqa chayqa, wañuchikuyman karqa.

Cieguito kasqayrayku ni imata ruwayta atejchu kani. Wawa kashajtiy ashkha kutispi abusawarqanku. Chaytataj ni piman willarqanichu, imajtinchus yuyaj kani ni pi noqapi interesakunanta. Runaqa mana allintachu parlapawaj. Llakisqa kasharqani, nitaj piwanpis kayta munajchu kani imaraykuchus ni pipi atienekojchu kani.

Waynuchitu kashajtiy recreopi uj qhariwarmi parlapawarqanku, paykunaqa  Jehovaj testigosnin kasqanku. Noqamanta llakikoj profesoray visitarinawankuta nisqa. Paykunaqa Bibliawan yachachiwarqanku cieguitos qhawanankuta, wañusqaspis kausarimunankuta (Isaías 35:5; Juan 5:28, 29). Paykunata uyariy gustawaj, jinapis mana parlayman yachasqachu kasqayrayku chʼinlla qhepakoj kani. Mana parlarejtiypis paykunaqa kʼachamanta pacienciawantaj Bibliaj nisqanta yachachillawarqankupuni. Llajtayman chamunankupajqa lomanta 10 kilometrosta purinanku karqa.

Hermanoy niwarqa chay qhariwarmeqa wajchaslla kasqankuta, jinapis maychus kajta pʼachallikusqankuta. Paykunaqa munakuwaj kanku imajtinchus regalitosta qowaj kanku. Yuyarqanitaj chay jinataqa cheqa cristianoslla ruwanankuta.

Bibliataqa estudiaj kani braillepi publicacioneswan. Yachachishawasqankutaqa entienderqani, jinapis wakin imasta mana creejchu kani. Arí, mana creejchu kani Dios noqapi interesakunanta, ni wajkunapis pay jina qhawanawankuta. Imaraykuchus sajra kajta saqesqanta entiendespapis, mana kʼacha Dios kananta creejchu kani. *

Bibliamanta yachakusqayman jina manaña ñaupajta jinachu creej kani. Yachakorqanitaj ñakʼarejtinchejqa Dios sonqonta nanachikusqanta. Chayrayku kamachisninta ñakʼarejta rikuspa, Pay nin: “Noqa rikuni imaynatachus [...] ñakʼarishasqankuta [...]; allinta yachani ñakʼarisqankuta”, nispa (Éxodo 3:7). Jehová kʼacha kasqanta reparaspa Jehovaj testigon jina bautizakorqani munayninta ruwanaypaj. Chaytaj karqa 1998 watapi.

Bautizakusqaymanta watanman jina ciegospaj cursosta pasaj rerqani Escuintla llajtapi. Uj hermano Acul llajtapi tantakuykunaman mana riyta atisqayta yachasqa. Imaraykuchus chay qhariwarmi jina lomanta rinay karqa. Chay hermanoqa yanapanawanpaj uj testigo familiata nisqa noqata wajyarinawanta jinamanta tantakuykunaman riyta atinaypaj. Chay familiaqa kunankama wawankuta jina uywashallawankupuni.

Kausayniymanta astawanraj willariykichejman hermanos imaynatachus qhawawasqankumanta. Jehovaj testigosnenqa cheqa cristianospuni kanku (Juan 13:34, 35).

Kunanqa manaña pisipajchu qhawakuni, aswan allin kausaytataj suyakuni. Mana rikuyta atisqaypi yuyanaymantaqa, runasman Bibliamanta willaspa astawan kani. Qotuchakuypi ñaupajman apajkunamanta, ujnin kani. Chantapis qaylla qotuchakuykunapi umallirichini. Agradecesqataj kashani jatuchaj tantakuykunapi umallirichisqaymanta.

Kay 2010 watapi Escuela de Entrenamiento Ministerial (kunantaj Reinomanta Willajkunapaj Escuela) nisqaman El Salvador suyupi rerqani. Chay escuelaqa yanapawarqa astawan allinta hermanosta yanapanaypaj. Chay escuelaman rispaqa repararqani Jehová munakuwasqanta, jatunpajtaj qhawawasqanta. Payqa yanapayta atin pillatapis, sutinmanta willananpaj.

Jesús nerqa: “Aswan kusiy wajman qoriy qorichikunamanta nisqaqa” (Hechos 20:35). Kusisqa kani. Wajkunata yanapanaytaqa ni yuyallarqanipischu jinapis kunanqa yanapashani.