Bibliapeqa sumaj yuyaychaykunata tarisunman. Chayrayku Bibliataqa sapa día leenanchej tiyan, chay leesqanchejpi tʼukurinanchej tiyan, imatachus Bibliapi yachakusqanchejman jinataj ruwananchej tiyan. Ajinamanta tukuy kausayninchejpi allin riwasun (Josué 1:8; Salmo 1:1-3). Chantapis Bibliata leespaqa Diosta rejsisunchej, Wawan Jesustawan. Paykunata rejsispataj, wiñay kausayta japʼiyta atisunchej (Juan 17:3).

¿Bibliamanta mayqen librostataj ñaupajta leesunman? Chayqa sapa ujmanta kashan. Kay Bibliata leenapaj wakichikusqan hojawanqa, Bibliata kantumanta leeyta atinki, manachayrí imamantachus Bibliapi parlakusqanman jina leeyta atinki. Chayqa kay jina kanman: Bibliamanta wakin partesta ajllaspa leenki chayqa, reparayta atinki imaynatachus Diosninchej israelitasta unaymantapacha qhawasqanta. Chantapis Bibliamanta waj partesta leespaqa, yachakunki imaynatachus ñaupa tiempomanta congregación rikhurisqanta, wiñasqanta ima. Sichus Bibliamanta uj mashkha capitulosta sapa día leenki chayqa, uj watapi enteron Bibliata leeyta tukunki.

Sichus Bibliata leenaykipaj uj programata maskʼashanki chayqa, sitajchus Bibliata leespa uj watapi tukuyta munanki chayqa, sitajchus “Bibliata leesaj” nishanki chayqa, kay wakichikusqan hojaqa, qanpaj jinapuni kashan. Kunanpacha Bibliata leeyta qallariy. Chaypajqa kay Bibliata leenapaj programata uraqachikuy. Kay programataqa imprimikuytapis atillankitaj.