Amós 5:1-27
5 Israel runakuna, wanupakuy cantatano kanan cantapaptï shumaq mayapäkamay.
2 Virginlaraq jipashno kuyaylapaq kaykarpis nacionniki ushakanqapaqmi.Pasaypa asulashqa kaptinmi pipis sharkatsinqanatsu.
3 TAYTA DIOSMI kayno nin:“Israel nacioncho juk markapita waranqa (1,000) runakuna pelyaman aywar pachaklanami (100) kutipäkamunqa.Juk markapita pachak runakuna pelyaman aywar chunkalanami kutipäkamunqa”.
4 TAYTA DIOSMI kayno nin:“Israel runakuna, noqata *ashipäkamay.Ashimarqa kawapäkunkipaqmi.
5 Bet-elman ama aywapäkuytsu.Gilgalman ni Beersebamanpis ama chayapäkuytsu.Gilgal markacho taq runakunataqa juk nacionmanmi prësu apakärinqapaq.Bet-el markapis lapanmi ushakätsishqa kanqapaq”.
6 TAYTA DIOSTA ashirqa kawapäkunkipaqmi.Mana cäsukäriptikiqa imaykatapis nina ushashqannömi lapaykita ushakätsishunkipaq.Tsay höraqa Bet-elcho adorapäkushqayki ïdulukuna manami mayqanpis salvashunkipaqtsu.
7 Qamkunaqa waktsakuna quejakamushqantapis manami arreglapäkunkitsu.Jutsayuq runapa favornin sharkurmi jutsaynaq kaqpa contran sharkurkaykanki.
8 TAYTA DIOSMI kamashqa Pléyades nishqan qoylarkunata y Orión nishqan qoylarkunatapis.Paymi tsakaytapis junaqman tikratsin.Junaqtapis yanawyaykaq tsakayman tikratsin.Lamarpita pukutayta joqarkurmi tamyatsimun.Jutinpis *Yahwehmi kaykan.
9 Kalpasapa runata ushakäratsinmi.Altu murallashqa markakunatapis ushakäratsinmi.
10 Qamkunaqa demanduta ali arreglaq kaqtami chikirkaykanki.Rasun kaqlata wilakuq testïgukunatapis qarqurkaykankimi.
11 Impuestukunata waktsakunata pägatsirmi mikunanpaq shuntapäkushqantapis qechurkaykanki.Tsayno kapäkushqaykipitami laqlashqa rumiwan kuyaylapaq wayikunata sharkatsirpis mana tankipaqtsu.Üvata plantarpis vïnunta manami upupäkunkipaqtsu.
12 Musyämi jutsata rurar mana cäsukärimashqaykita.Qamkunaqa sobornuta chaskipakurmi jutsayuqkunapa favornin sharkurkaykanki y jutsaynaq kaqta jaqatsarkaykanki.
13 Jaqatsanaykipaq kashqanta musyarmi tantiyakuq runakunapis upälakärin.Fiyu kapäkuptikimi pïmaypis mantsa mantsala kawapäkun.
14 Kuyaypaq munaypaq kawapäkunaykipaq lutankunata ama rurapäkuytsu, sinöqa ali kaqkunalata rurapäkuy.Tsaymi lapanta mandaq TAYTA DIOS yarpashqaykino yanapashunkipaq.
15 Lutan ruraykunata kacharir ali kaqkunata rurapäkuy.Despächuykichöpis lapanta shumaq arreglapäkuy.Tsayno rurapäkuptikiqa Josépita miraqkuna lapayki mana ushakänaykipaq capazchari lapanta mandaq TAYTA DIOS kuyapäshunkimanpis.
16 Munayniyuq y lapanta mandaq TAYTA DIOS kaynömi nin:“Pläzakunacho waqaylami kanqa.Cällikunachöpis pasaypa lakikushpan qaparpanqa.Chakracho aruqkunatapis waqäshinanpaqmi qayatsinqa.Waqapakuqkunawanmi juntu waqapäkunqa.
17 Shamur castigaptïmi lapan üva chakrakunachöpis Israel runakuna waqapäkunqa”.TAYTA DIOSMI tsayno nin.
18 ¡Ay, imanöraq kapäkunki TAYTA DIOS juzganan junaq chayamuptin!¿Imanirtaq munarkaykanki tsay junaq chayamunanta?Tsay junaq ali kananpaq kashqanta yarpaptikipis pasaypa mantsariypaqmi kanqapaq.
19 Tsay junaq kanqa leonpita qeshpir ösuwan tinkuqnömi.Tsaynöpis kanqa wayinman yaykur tuknakuptin perqa uchkupita makinta culebra picaqnömi.
20 Tsaymi TAYTA DIOS juzganan junaq chämuptin kushikärinanpa trukanqa fiyupa lakikärinqa.Tsakaychöno kar runakuna manami ima ruraytapis kamäpakärinqatsu.
21 “Noqapaq fiestata rurapäkushqaykitapis pasaypami melanä.Juntakar janan shonqula adorapäkamashqaykitapis pasaypami ajayashqä.
22 Rupatsina sacrificiukunata y tsaki mikuykunata noqapaq rupatsiptikipis manami chaskishaqtsu.Werannin turituta jawka kawakuy sacrificiupaq rupatsiptikipis manami chaskishaqtsu.*
23 Arpata tukar kushishqa cantashqaykitapis manami wiyayta munätsu.
24 Noqa munä runa mayikiwan ali kawar munashqäno kawapäkunaykitami.Mayu mana ushakaypa aywashqanno runa mayikiwan imaypis ali kawapäkuy.*
25 “Israel runakuna, chusku chunka (40) wata chunyaq tsaki jirkapa purir manami noqapaqtsu uywakunata y tsaki mikuykunata rupatsipäkurqayki.
26 Tsaypa trukanqa rey kashqanta yarpar Sicut jutiyuq ïdulutami umrushqa puritsipäkurqayki.Tsaynöpis qoylar niraq Quiún ïdulutami aparishqa puritsipäkurqayki.Tsaykunataqa kikikikunami rurapäkurqayki diosnikikuna kananpaq.
27 Tsaymi Damascupita mas washaqan partiman qarqutsishaykipaq”.*Tsayno kananpaq kashqanta TAYTA DIOSMI nin.Paypa jutinqa Lapanta Mandaq Tayta Diosmi* kaykan.
Ichic wilacuycuna
^ ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
^ Yahweh Yahwehtami wakin traduccionkuna castellänucho traducin Jehová nir, wakinmi traducin Yavé nir, wakinmi traducin Yahweh nir y wakinnami traducin EL SEÑOR nir. Quechua Bibliachöpis Yahweh atska kutimi traduciraykan TAYTA DIOS nir.
^ 5.21-22 Isa. 1.11-14.
^ 5.22-24 1Sam. 15.22; Prov. 21.3; Jer. 7.22-23; Ose. 6.6; Miq. 6.6-8.
^ 5.25-27 Hech. 7.42-43.
^ 5.27 Hebreo idiömachömi jutin kaykan Elohim Tsaba.
