Isaías 22:1-25
22 Kaychömi qelqaraykan Rikachakuna Pampacho* ima pasananpaq kashqantapis Tayta Dios revelashqan.Jerusalén runakuna, ¿imataq markaykicho kaykan?¿Imanirtaq wayi janankunacho* kushikurkaykanki?
2 ¿Imanirtaq tsayjinanpa qaparpayparaq kushikurkaykanki?Manami espädawantsu ni guërrachötsu wanupäkunkipaq,sinöqa yarqaywan y pesti qeshyawanmi lapayki ushakankipaq.
3 Autoridäkunapis flëchananta mantsakurmi qeshpir aywakärishqa.Karupa qeshpiptikipis lapaykitami prësu tsaripäkushushqankipaq.
4 Tsaymi kayno nï: ¡Nawpäpita witikäriy!Marka mayintsikunata wanutsinanpaq kaptinmi pasaypa waqä.Iktsuypa iktsur waqaptïpis ama shoqamaytsu.
5 ¡Rikachakuna Pampacho mantsariypaqmi kanqa!¡Tsay junaq chayamunanpaqmi lapanta mandaq TAYTA DIOS kamakätsishqa!Marka murällatapis juchutsinqami.Runakuna ausiliuta manakur qaparashqanpis jirka puntakunayaqmi mayakanqa.
6 Atacamänantsipaqmi Elam runakuna flëchankunata kamarikushqa.Maynami carrëtankunaman witsashqa.Cawallunkuna muntashqanami karkaykan.Kir runakunapis escüdunkuna* aptashqanami karkaykan.
7 Maypis täkuypaq pampakunachöpis tsaytsika guërra carrëtakunami karkaykan.Cawallun muntashqa runakunapis markantsi punkuchönami karkaykan.
8 Tsapämänantsipaq pipis mana kaptinmi munti nishqan palaciucho kaykaq armakunalaman yärakurkaykanki.*
9 *Davidpa Markanpa murällan juchushqa kaqkunata altsanaykipaqmi rikapakushqanki. Yakupita mana nakanantsipaqmi ura kaq pözuman yakuta winapäkushqanki.*
10 Jerusaléncho wayikunata rikapaykurmi mana ali kaqta juchutsipäkurqayki murällata altsanaykipaq.
11 Markata tsaparaq murälla waqtancho estanqui kaptinmi marka rurinchöna yaku pözuta rurapäkurqayki tsaypitana yakuta jorqunaykipaq. Tsayno kamarikurpis manami Tayta Diosman yärakärinkitsu. Atacamänantsipaq unaypita patsana kamakätsishqa kaptinpis manami payta mantsakärinkitsu.
12 Lapanta mandaq TAYTA DIOSMI munarqan jutsa rurashqaykita tantiyakurir waqapäkunaykita. Tsaynöpis munarqan lakikärinaykita y aqtsaykikunatapis rutukushpayki qachqa röpakunata jatikärinaykitami.
13 Itsanqa pay nishqanta cäsukunaykipa trukanqa fiestata rurarmi wäkakunapa y uyshakunapa aytsanta mikur y vïnuta upyar kushikärirqayki. Tsaymi kayno nipäkurqayki: “Kawashqantsiyaq mikushun upushun. Wanurqa pachantsitami apashun”.*
14 Tsayno kapäkuptikimi lapanta mandaq TAYTA DIOS kayno nimarqan: “Tsayno kashqanpita manami imaypis perdonashaqtsu”.
Lapanta mandaq TAYTA DIOSMI tsayno nishqa.
Sebna wanunanpaq nishqan
15 Lapanta mandaq TAYTA DIOSMI kayno nimarqan: “Reypa palaciuncho mandaq Sebnaman* ayway. Chayaykur kayno wilanki:
16 “¿Pï kashqaykitataq yarpaykanki?¿Imanirtaq altunnin qaqacho kuyaylapaq wayitano nïchuykita ruraykätsinki?
17 Tsayno kaykaptikimi TAYTA DIOS prësu tsarirkatsir karu nacionman apatsishunkipaq.
18 Pelötatanömi jatun nacionman jitarishunkipaq.Tsaycho wanuptikimi kushishqa purishqayki carrëtaykikunapis ichiräkunqa.Ushakaptikimi mandaqniki reypis pasaypa penqakunqapaq.
19 TAYTA DIOSMI autoridä kashqaykipita qarqushunkipaq.Carguykipitapis jitarishunkimi.
20 “Tayta Dios kaynömi nin: ‘Tsay junaqmi Hilcíaspa tsurin Eliaquimtana qayashaq. Payqa sirvimaqnïmi kaykan.
21 Paytanami röpaykikunata jatipäshaq. Wachkuykiwanmi tseqlanta wachkapäshaq. Nirkurmi qampa trukayki autoridä kananpaq churashaq. Paymi Jerusalén runakunapa y Judá runakunapa taytanno kanqa.
22 Paytami qoykushaq rey Davidpa palaciunpa llävinpa wawanta. Pay kichashqantaqa manami pipis wichqanqatsu. Wichqashqantaqa manami pipis kichanqatsu.*
23 “ ‘Paytami churashaq perqaman shumaq jatishqa estäcano kananpaq. Mandaq kaykaqta rikarmi aylunkunapis kushikärinqa.
24 Pucillukuna, järrakuna y imayka niraq tazonkunapis estäcacho warkuraqnömi lapan aylunkunapis, tsurinkunapis y wilkankunapis payman yärakärinqa.
25 “ ‘Sebnataqa perqacho següru jatiraykaq estäcano kaykaptinpis jitarishaqmi. Tsay junaqmi payman amparakuqkunapis ushakanqapaq’. Lapanta mandaq TAYTA DIOSMI tsayno nin”.
Ichic wilacuycuna
^ 22.1a Rikachakuna Pampapaq parlarqa Jerusalénpaqmi Isaías nirqan. Pampacho rikachakurpis karuta rikayta mana kamäpakushqantsinömi Jerusalén runakuna tantiyapäkurqantsu Tayta Dios castigananpaq kashqanta.
^ 22.1b Israel nacionchöqa wayita qatananpa trukanqa terrädu jananman tsaqlarkurmi mituwan lashtapäkuq. Tsay jananchönami awakäriq, aqakäriq y trïgutapis akrapäkuq.
^ 22.6 Tsay escüdunkunaqa pelyacho tsapakunanpaqmi karqan.
^ Davidpa Markan Davidpa Markanqa manami David yurishqan Belén markatsu karqan, sinöqa Sión jirkancho kaykaq Jerusalén markami. Tsayno jutin karqan jebuseo runakunata tsaypita David qarqushqa kaptinmi (2Sam. 5.6-7). Tsaychömi reypa palaciunta y templuta sharkatsipäkurqan. Jerusalén marka jatunyaptinpis Sión jirkancho kaykaq partilatami Davidpa Markan kashqanta nipäkun.
^ 22.9 2Rey. 20.20.
^ 22.13 1Cor. 15.32.
^ 22.15, 20 2Rey. 18.18; Isa. 36.3.
