Isaías 41:1-29
41 Tayta Diosmi kayno nirqan:“Costacho kaq nación runakuna, mayapäkamay.Maytsay nacionkunacho taq runakuna, valurapäkuy.Tsapakunaykipaq shapäkamuy.Qamkunata juzganäpaq juntakämuy.
2 “Inti jeqamunan kaq lädupita lapantapis vinciq reyta noqa yuritsimushqäta ¿manaku tantiyapäkunki?*¿Manaku tantiyapäkunki munayniyuq kananpaq tsay reyta noqa churashqäta?Tsaymi wakin nacionkunata y reykunatapis makincho tsararaykan.Espädanwanmi runakunata chipyaq ushakätsin.Flëchata jitaptinmi runakuna wakpa kaypa punshano mashtakan.
3 Contrankunata qatikacharmi warakayla aywan.Qatikachashpanmi imaypis mana purishqan nänipa mana mantsakuypa aywan.
4 “Tsayno kananpaq pï kamakätsishqantapis ¿manaku tantiyapäkunki?¿Manaku tantiyapäkunki qalaykunanpita patsa pï kamakätsishqantapis?Noqa TAYTA DIOSMI qalaykunan y ushanan kaykä.*
5 “Imaykatapis rurashqäta musyarmi costacho kaykaq nación runakuna fiyupa mantsakärin.Maytsay nacionkunacho taqkunapis siksikyanmi.Pelyananpaqmi juntakan.
6 Mana mantsakunanpaqmi kikinpura shakyätsinakun.
7 Ïduluta ruraq runapis qellaywan enchapaq runatami shakyätsin.Martilluwan takaqpis yunkicho takaqtami shakyätsir kayno nin: ‘¡Alimi kamakätsishqanki!’Rurayta usharkurmi ïdulu mana kuyunanpaq clävuwan sigurapäkun.
8 “Jacobpita miraq Israel runakuna, qamkunaqa sirvimaqnïmi karkaykanki.Qamkunata noqami akrashqä.Qamkunaqa amïgü Abrahampita miraqmi karkaykanki.*
9 Mayjina karupitami qamkunata shuntamushqä.Maytsaychöpis kaykaqtami qayamushqä.Qamkunatami kayno nirqä: ‘Sirvimaqnïmi karkaykanki.Akrashqä runakuna kapäkuptikimi mana kacharishaykitsu’.
10 Qamkunawan kaykaptïqa ama mantsakäriytsu.Diosniki kaykaptïqa ama lakikäriytsu.Kalpaykikuna kananpaqmi imaypis yanapashayki.Alawqa kaq makïwanmi imaypis jancharäshayki.
11 “Contrayki sharkuqkunaqa lapanmi penqakur ima ruraytapis mana kamäpakunqatsu.Achäquita ashipäshuqnikikunaqa chipyaqmi ushakanqa.
12 Pelyata ashipäshuqniki runakunataqa manami pipis yarpanqatsu.Paykunataqa ashirpis manami taripäkunkipaqtsu.
13 TAYTA DIOSNIKI karmi qamkunata makipita jancharaykä.Tsaymi kayno niykä: ‘Ama mantsakäriytsu. Qamkunata yanapashaykimi’.
14 “Jacobpita miraq Israel runakuna, manakaqnöla kashpaykipis ama mantsakäriytsu.Walkala kashpaykipis ama lakikäriytsu.Noqami qamkunata yanapashayki.Israel runakunapa *santu Diosnin karmi salvashayki.
15 Ali afilashqa atska kiruyuq trilladörano kanaykipaqmi qamkunata churashqä.Jirkakunata trillarmi alpalatana kachaykunkipaq.Jirkankunatapis trillar punshalatana kachaykunkipaq.*
16 Jurquëtawan wayraptiki tsay punshanta wayrami apakunqa.Shukukuy wayra shamurmi wakpa kaypa apar elqätsinqa.Qamkunata tsayno yanapaptïmi pasaypa kushikärinkipaq.Israel runakunapa santu Diosnin kaptï kushishqami alabapäkamankipaq.
17 “Waktsakuna yakuta mana tarir shiminkuna tsakikäkuptin noqata manakamätsun.Noqa TAYTA DIOSNIN karmi manakamaptin yanapashaq.Israel runakunapa Tayta Diosnin kaykarqa manami kachaykushaqtsu.
18 Yaku mana kashqan jirkakunachöpis mayukunatami yuritsimushaq.Qechwa pampakunachöpis pukyukunatami pashtatsimushaq.Chunyaq jirkakunatapis sinigamanmi tikratsishaq.Yaku mana kashqanpapis mayunöraqmi yaku aywanqa.*
19 Chunyaq jirkamanmi plantashaq cedruta, acaciata, arrayanta y olïvuta.Tsaki jirkakunachömi winatsimushaq cipresta, pïnuta y abëtuta.
20 Tsayta rikashpanmi pïmaypis noqa rurashqäta tantiyakunqa.Tsaynöpis tantiyakunqa Israel runakunapa santu Diosnin kashqätami”.
Tayta Diosla rasunpa kaq Dios kashqan
21 Jacobpita miraqkunapa mandaqnin rey TAYTA DIOSMI kayno nin:“Ïdulukuna kawaq kaptinqa tsapakunanpaq mä apapäkamuy.Imata kamashqantapis mä nipäkamätsun.
22 Shamuq watakunacho imano kananpaq kaqtapis mä wilapäkamätsun.Nawpa kaq watakunacho ima kashqantapis qalaykunanpita patsa wilapäkamätsun.
23 Rasunpa Dios kashqan musyakänanpaq wara warantinkuna ima pasananpaq kashqantapis mä wilapäkamätsun.Imalatapis alita o mana alitapis espantaypaq kaqkunata mä rurapäkutsun.
24 Ïdulukunaqa manami ima ruraytapis kamäpakuntsu.*Manami imapaqpis välintsu.Ïdulukunaman yärakuqkunaqa noqapaq pasaypa melanaypaqmi kaykan.
25 “Inti jeqamunan kaq lädupitami juk runata jutinpa qayashqä.Paymi norti kaq lädupa shamunqa.Mankata rurananpaq mituta jaruqnömi reykunatapis chipyaq ushakätsinqa.
26 Tsay runa shamunanpaq kashqanta manami mayqan ïdulupis wilakushqatsu.Unaypita wilakushqa kaptinqa tsay ïdulu musyaq kashqanta tantiyashwanmi.Itsanqa manami imaypis wilakushqatsu.Manami mayqanpis musyatsishqatsu.
27 “*Sión runakunata yanapanäpaq kaykashqätaqa mas puntatami wilakatsirqä.Noqami tsay wilakuyta Jerusalénman wilakatsirqä.
28 Mayjina ashirpis manami mayqan ïdulutapis noqano wilakatsiqta tarïtsu.Ïdulukunaqa tapuptïpis manami contestamantsu.
29 Ïdulukunaqa mayqanpis manami Diostsu kaykan.Ima ruraytapis manami kamäpakuntsu.Ïdulukunaqa manami imalapaqpis välintsu”.
Ichic wilacuycuna
^ 41.2 Tsay reyqa Persia nacionpa mandaqnin Cirumi kashqa. Paytami Tayta Dios akrashqa Babilonia nacionta vincinanpaq (Isa. 45.1-4).
^ 41.4 Isa. 43.10; 44.6; Apoc. 1.8, 17; 22.13.
^ 41.8 2Crón. 20.7; Stg. 2.23.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 41.15 Kay versïculucho nishqanqa manami imapis sasatsu qamkunapaq kanqa ninanmi.
^ 41.18 Isa. 35.6-8; 43.19-20; 44.3-4.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
