Jeremías 29:1-32
29 Juk junaqmi profëta Jeremías Jerusalénpita cartata apatsirqan Babiloniacho taykaq Judá runakunaman. Paykuna karqan rey Nabucodonosor Jerusalénpita Babiloniaman prësu apashqan mayor runakuna, cürakuna, profëtakuna y wakin runakuna.*
2 Cartata apatsishqan witsanqa Babiloniachönami karkaykarqan rey Jeconías, maman, Jeconíaspa yanapaqninkuna, Jerusalénpa y Judápa mandaqninkuna, *artesänukuna y herrërukuna.
3 Tsay cartata Jeremías apatsirqan Safánpa tsurin Elasawan y Hilcíaspa tsurin Gemaríaswanmi. Tsay runakuna Babiloniacho rey Nabucodonosorwan wilanakunanpaqmi Judápa mandaqnin rey Sedequías kacharqan. Tsay cartachömi kayno nirqan:
4 Jerusalénpita Babiloniaman prësu apashqan runakunatami Israel runakunata kuyaq y lapanta mandaq TAYTA DIOS kayno nin:
5 “Wayikita lapayki rurapäkuy tänaykipaq. Chakrakunatapis murupäkuy wayuyninta mikur kawapäkunaykipaq.
6 Warmiwan taptiki tsurikikuna warmipis y olqupis katsun. Tsurikikunapis mözuyar y jipashyar majatsakätsun* wamrankuna atska kananpaq. Tsaynöpami tashqaykicho walkayänaykipa trukanqa mirapäkunkipaq.
7 Tsay markacho ali kawapäkunanpaq pïmaytapis yanapay. Tsaycho taqkunapaq manakamay. Tashqayki markacho runakuna ali kawaptinqa qamkunapis alimi kawapäkunkipaq.
8 “Israel runakunata kuyaq y lapanta mandaq TAYTA DIOS karmi kayno nï: Tashqaykicho lula profëtakuna y rikakuqkuna imatapis lutanta nipäkushuptiki ama criyipäkuytsu. Sueñuynincho revelacionta rikashqanta nirpis manami rasunpatsu rikashqa, sinöqa lulapaykäshunkimi.
9 Noqapa jutïta joqarir nishushqaykipis manami rasunpatsu kaykan. Paykunata manami kachamushqätsu. Noqa TAYTA DIOSMI tsayno nï”.
10 TAYTA DIOSMI kayno nin: “Babiloniaman apashushqaykipita qanchis chunka (70) wata cumplirkuptinraqmi* promitishqänöla shuntamushaykipaq.
11 Musyämi imano kanaykipaq kashqantapis. Manami mana ali kawapäkunaykitatsu munä, sinöqa ali kawapäkunaykitami. Tsawraqa lakikärinaykipa trukanqa kushikäriy. Noqa TAYTA DIOSMI tsayno nï.
12 “Ruwakur manakamaptikiqa mayashaykimi.
13 Lapan shonquykiwan *ashimarqa taripäkamankipaqmi.*
14 Maytsay nacionman qarqushqäpitapis shuntamushaykimi. Maypitami qarqurqä tsaymanmi lapaykita kutitsimushayki. Noqa TAYTA DIOSMI tsayno nï”.
15 Qamkunaqa nirkaykanki Babiloniacho profëtakunata TAYTA DIOS churapäshushqaykitami.
16 Tsayno niptikipis tsay profëtakunaqa lutantami wilapaykäshunki. Paykunaqa nirkaykan Davidpa trönuncho kaykaq rey y Babiloniaman prësu mana aywaq marka mayintsikuna Jerusaléncho jawka kawapäkunanpaq kashqantami.
17 Lapanta mandaq TAYTA DIOSMI itsanqa kayno nin: “Judácho taq runakunaqa wakinkuna guërracho wanunqa, wakinkuna yarqaypita wanunqa y wakinkunanami pesti qeshyawan wanunqa. Mana wanuq kaqmi itsanqa melanaypaq ismushqa hïgusno kanqa.
18 Tsayno paykuna wanupäkunqa castigaptïmi. Castigashqäta musyarmi maytsay nacioncho taq runakunapis fiyupa mantsakanqa. Maymanpis qarqushqäman Judá runakuna chayaptin pïmaypis manakaqman churar jamurpanqa y asipanqa.
19 Paykunata tsayno castigashaq unaypita patsa sirvimaqnï profëtakunawan yaparir yaparir wilakatsishqäta mana cäsukamashqanpitami. Noqa TAYTA DIOSMI tsayno nï.
20 “Jerusalénpita Babiloniaman qarqushqä kaqkuna, nishqäkunata shumaq tantiyapäkuy.
21 Israel runakunata kuyaq y lapanta mandaq TAYTA DIOS karmi kayno nï: Colaíaspa tsurin Acab y Maasíaspa tsurin Sedequíasmi noqapa jutïcho lulakur wilakurkaykan. Tsaymi wanutsishqa kananpaq Babiloniapa mandaqnin rey Nabucodonosorpa makinman churashaq. Tsaytaqa lapan runakunami rikanqa.
22 Tsaymi Babiloniacho Judá runakuna pitapis maldicionar kayno ninqa: ‘Sedequíasta y Acabta rupatsishqanno qamtapis rupatsishunaykipaq TAYTA DIOS entregashunkipaq’.
23 “Acabta y Sedequíasta tsayno castigashaq kuyashqä runakuna tashqancho penqaypaq jutsata rurashqanpitami. Paykunaqa runayuq warmiwan kakurmi pasaypa rabyatsimashqa. Imatapis mana niykaptïmi jutïchöraq lulakur wilakärishqa. Tsayno rurapäkushqanta kikïmi rikashqä. Noqa TAYTA DIOSMI tsayno nï”.
Semaíaspaq wilakushqan
24 Nehelamcho yuriq Semaíaspaqmi
25 Israel runakunata kuyaq y lapanta mandaq TAYTA DIOS kayno nin: “Qamqa kikikipa jutikichömi cartata apatsishqanki Jerusaléncho kaykaq runakunaman, Maasíaspa tsurin Sofonías cüraman y wakin cürakunamanpis. Tsay apatsishqayki cartacho cüra Sofoníasta kayno nishqanki:
26 “ ‘Cüra Joiadapa trukan templuta täpaqkunapa mandaqnin kanaykipaq TAYTA DIOSMI churashushqanki. Tsaymi munayniyuq kaykanki pipis profëta tukur wilakuptin jinan höra prësu tsaritsinaykipaq y cëpuman* jatirkur cadinawan watatsinaykipaq.
27 Tsayno kaykarqa ¿imanirtaq Anatotpita Jeremías nawpaykicho profëta tukuptin payta prësu mana tsaritsishqankitsu?
28 Jeremíasqa Jerusalénpita noqakunamanpis cartata apatsimushpan kaynömi nimashqa: “Atska watami Babiloniacho prësu kankipaq. Tsayno kaykaptinqa tänaykipaq wayikikunata rurapäkuy. Chakrachöpis murukäriy mikunaykipaq” ’ ”.
29 Semaías apatsishqan cartata chaskirkurmi cüra Sofonías Jeremíasta liyiparqan.
30 Liyiparkuptinnami Jeremíasta TAYTA DIOS kayno nirqan:
31 “Babiloniacho taykaq Judá runakunaman cartata apatsir kayno ninki: ‘TAYTA DIOSMI kayno nin: Wilakunanpaq mana niykaptïmi Nehelamcho yuriq Semaías jutïcho wilakurqan. Lutanta wilakushpanmi payqa manakaqkunata criyitsipäkushurqayki.
32 Nehelamcho yuriq Semaías tsayno wilakuptin y conträ sharkunanpaq runakunata shimita jatipashqanpitami payta y paypita miraqkunata castigashaq. Tsaymi lapan wanur ni juklaylapis mana rikanqatsu kuyashqä runakunata yanapar nacionninman shuntamushqäta. Noqa TAYTA DIOSMI tsayno nï’ ”.
Ichic wilacuycuna
^ 29.1 2Rey. 24.12-16; 2Crón. 36.10.
^ artesänu Artesänukunaqa kaykan carpintërukuna, suëlapita obrakunata ruraqkuna, awaqkuna, mankata ruraqkuna y mas imatapis shumaq yachaq runakunapis.
^ 29.6 Wakin runakunaqa casaratsun nipäkun.
^ 29.10 2Crón. 36.21; Jer. 25.11; Dan. 9.2; Zac. 1.12.
^ ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
^ 29.13 Deut. 4.29.
^ 29.26 Cëpuqa rakta tablapita rurashqami karqan runata chakipita karpis makipita karpis y kunkapita karpis prësu tsararänanpaq. Cëpuchöqa prësukuna pasaypami nakarqan.
