Apocalipsis 21:1-27
21 Tsaypitanami mushuq patsata y mushuq ciëluta* rikarqä. Nawpa kaq ciëlupis y nawpa kaq patsapis manami karqannatsu. Lamarpis manami karqannatsu.
2 Tsaynölami [noqa Juan] rikarqä mushuq Jerusalén *sagrädu marka* Tayta Diospa nawpanpita uraykämuqta.* Tsay markami casarananpaq mushuq röpan jatishqa jipashno kuyaylapaq kaykarqan.*
3 Tsay hörami mayarqä Tayta Diospa trönunpita kayno nir qayakamuqta:“¡Kananqa runakunawan juntumi Tayta Dios tanqa!*Paykunami kuyashqan runakuna kanqa.Kikin Tayta Diosmi paykunawan kaykanqa.*
4 Paykunata shoqashpanmi weqinkunatapis pitsapanqa.*Wanuypis, waqaypis, lakikuypis y nakaykunapis manami kanqanatsu.*Tsaykunaqa lapanmi ushakanqa”.
5 Trönucho jamaraykaqnami kayno nimurqan: “Lapantapis mushuqtami ruraykä”.
Tsaypitanami kayno nimarqan: “Kay nishqäkunaqa rasun kaqmi kaykan. Tsawraqa kay nishqäkunata lapanta qelqay”.
6 Nirkurnami kayno nimarqan: “Lapanpis cumplishqanami kaykan. Alfa y Omegami noqa kaykä.* Qalaykunan y ushananmi kaykä.* Yakunaqkunataqa dembaldilami kawatsikuq yakuta uputsishaq.*
7 Imano nakarpis mana ajayaypa yärakamaqkunaqa* lapan herenciantami chaskipäkunqa. Noqami paykunapa Diosnin kashaq. Paykunami wamräkuna kanqa.*
8 Noqapita penqakuqkunata, mana yärakamaqkunata, jutsasapakunata, wanutsikuqkunata, *fornicación jutsata ruraqkunata, brüjukunata, ïdulu adoraqkunata y lulakuqkunataqa azufriwan talushqa nina rupaykaq qochamanmi qaykushaq. Tsay nina qochaqa qepa kaq wanuymi kaykan”.*
Mushuq Jerusalén imano kananpaq nishqan
9 Tsaypitanami cöpakunawan castïgukunata jichamuq qanchis *angilkunapita* juk ángel aywaykamur kayno nimarqan: “Carnishwan casarananpaq kaq jipashta rikatsinäpaq aku aywashun”.
10 Tsayno nirmi revelacioncho pushamarqan jatun punta jananman.* Tsaychömi rikatsimarqan mushuq Jerusalén *sagrädu marka Tayta Diospa nawpanpita uraykämuqta.
11 Tsay markaqa Tayta Diospa chipchipyayninwanmi chipchipyarqan. Kuyaylapaq karqan jaspe rumi niraq y cristal vidriu niraqmi.
12 Markatami jatunkaray murälla tumariq tsapararqan. Tsay murällami karqan chunka ishkay punkuyuq. Cada punkuchömi juk ángel karqan. Tsaynöpis cada punkuchömi juk juti qelqararqan. Tsay jutikuna karqan Israelpa tsurinkunapa jutinkunami.
13 Kimsa punku karqan inti jeqamunan kaq lädupa, kimsa punku karqan norti kaq lädupa, kimsa punku karqan sur kaq lädupa y kimsa punkunami karqan inti jeqanan kaq lädupa.*
14 Murälla kaqchömi chunka ishkay rumikuna kaykarqan. Cada rumichömi juk juti qelqaraykarqan. Tsay jutikuna karqan Carnishpa chunka ishkay *apostolninkunapa jutinkunami.*
15 Noqawan parlaq angilmi qoripita rurashqa värata aptakurkur tsay markata, punkunkunatawan murällantapis tupumurqan.*
16 Tupuptinmi tsay markapa altunpis, anchunpis y largunpis tsay tamäñula karqan. Tsaynöpis tsay markapa cada lädun karqan chunka ishkay waranqa (12,000) estadiumi.*
17 Nirkurnami tupurqan murällanpa anchunta. Tupuptinmi anchun karqan pachak chusku chunka chusku (144) kuchus.*
18 Tsay murällaqa jaspe rumikunawan perqashqami karqan. Markaqa qori pürupita rurashqa karmi limpiu vidriuno lushway karqan.
19 Tsay murällapa cimientunmi tukuy niraq kuyaylapaq rumikunawan perqashqa karqan:Punta kaqmi karqan jaspe rumi,ishkay kaqmi karqan zafiro rumi,kimsa kaqmi karqan ágata rumi,chusku kaqmi karqan esmeralda rumi,
20 pitsqa kaqmi karqan ónice rumi,soqta kaqmi karqan cornalina rumi,qanchis kaqmi karqan crisólito rumi,pusaq kaqmi karqan berilo rumi,isqun kaqmi karqan topacio rumi,chunka kaqmi karqan crisopraso rumi,chunka juk kaqmi karqan jacinto rumiy chunka ishkay kaqnami karqan amatista rumi.
21 Tsay murällapa chunka ishkay punkunkunami cada ünun karqan juk perlaslapita rurashqa.* Markapa jatun kaq cällinmi karqan chipchipyaykaq qoripita rurashqa. Tsaynöpis karqan vidriu niraqmi.
22 Tsay markachöqa templuta manami rikarqätsu. Tsaychöqa lapanpaq munayniyuq Tayta Dios y Carnishmi templu kaykan.
23 Kikin Tayta Dios* y Carnish* atsikyapaptinmi intipis ni killapis mana kanqanatsu.
24 Maytsay nacionkunacho salvashqa runakunatami atsikyapanqa.* Nacionkunapa mandaqnin reykunapis kuyaylapaq riquëzankunata tsayman apapäkunqa.
25 Tsay markacho patsa mana tsakaptinmi imaypis punkunkunata wichqanqatsu.
26 Maytsay nacionpitapis tsay markamanmi riquëzankunata apapäkunqa.*
27 Tsayman manami yaykunqatsu jutsasapakuna,* lutanta ruraqkuna ni lulakuqkuna. Tsaymanqa yaykapäkunqa Libru de la Vïdacho jutinkuna qelqaraykaqkunalami. Tsay libruqa Carnishpa librunmi kaykan.
Ichic wilacuycuna
^ 21.1 Isa. 65.17; 66.22; 2Ped. 3.13.
^ sagrädu Liyinki santupita tantiyatsikuyta.
^ 21.2b Apoc. 3.12.
^ 21.2c Isa. 61.10; Apoc. 19.7-8.
^ 21.3a Lev. 26.11-12; Eze. 37.27.
^ 21.3b Jer. 11.4; 30.21-22; Eze. 36.28; Zac. 8.8.
^ 21.4a Isa. 25.8; Apoc. 7.17.
^ 21.4b Isa. 35.10; 65.19.
^ 21.6 Alfa nishqanqa griego alfabëtucho punta kaq letrami kaykan. Omega nishqanqa ushanan kaq letrami kaykan. Tsaymi Alfa y Omegami noqa kaykä nishqanqa qalaykunan y ushananmi kaykä ninanmi.
^ 21.6b Isa. 55.1; Juan 4.10, 14; 7.37.
^ 21.6a Isa. 41.4; 44.6; Apoc. 1.8, 17; 22.13.
^ 21.7a 1Juan 5.4-5.
^ 21.7b 2Sam. 7.14; Sal. 89.26-27.
^ fornicación jutsa Fornicación jutsaqa kaykan majalanwan kakunanpa trukan jukwan kakushqan, mana ashinakuylapa kakushqan, uywakunawan kakushqan, olqupura kakushqan, warmipura kakushqan, wayrapakuq warmiwan kakushqan, aylunwan kakushqan y jukwan jukwan lutala kakushqanpis (Lev. 18.6-23; 1Cor. 5.1; 6.12-20; Efe. 5.5).
^ 21.8 Mat. 25.41; Apoc. 2.11; 20.6, 14.
^ 21.9 Apoc. 16.1.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ sagrädu Liyinki santupita tantiyatsikuyta.
^ 21.12-13 Eze. 48.30-35.
^ apóstol Apóstol ninanqa “wilakunanpaq kachashqan runa” ninanmi. Apostolkunataqa Jesucristumi kacharqan maytsaymanpis aywar wilakuyninta wilakunanpaq. Tsay apostolkunaqa karqan chunka ishkaymi. Jesucristo wanushqanpita kawarirkamurmi Pablutapis yuriparkur churarqan apóstol kananpaq (Mar. 3.14; Luc. 6.13-16; 1Cor. 9.1-2). Apostolkunatami Jesucristo nirqan Espíritu Santu shamur lapanta yachatsinanpaq kashqanta y Jesucristo yachatsishqanta yarpätsinanpaq kashqanta (Juan 14.25-26; 16.12-15). Tsaynöpami Jesucristupa apostolninkuna y paykuna autorizashqan runakuna Mushuq Testamentuta qelqapäkurqan.
^ 21.16 Juan qelqashqan witsan lëwaypa tupunanpa trukanqa runakuna estadio nishqan tupukunawanmi tupupäkuq. Juk estadiuqa 185 metrumi karqan. Tsaymi 12,000 estadiuqa 444 lëwa karqan. Kilömetrupa mïdiptinmi cada lädu karqan 2,200 kilömetru.
^ 21.17 Pachak chusku chunka chusku (144) kuchusqa soqta chunka pitsqa (65) metrumi karqan.
^ 21.18-21 Isa. 54.11-12.
^ 21.23a Isa. 60.19-20.
^ 21.26 Isa. 60.11.
^ 21.27 Isa. 52.1; Eze. 44.9.
