Ezequiel 10:1-22
10 Tsaypitami rikarqä *querubinkunapa janaqancho zafiro rumipita rurashqa trönu niraqta.*
2 Lïnu röpan jatishqa kaykaq runatanami Tayta Dios kayno nirqan: “Querubinkuna chakincho kaykaq ruëdakuna rurinman yaykuykur juk aptay shanshata jorqarkamur marka jananpa matsiy”.*
Tsayno niptinmi rikaraykaptï Tayta Dios nishqannöla tsay runa yaykurqan.
3 Templupa patiun sur kaq läduchömi querubinkuna tsay höra kaykarqan. Ruëdakuna kashqanman lïnu röpan jatishqa runa yaykuptinmi *altar kashqan kaq patiuman pukutay juntarqan.
4 Tsaymi TAYTA DIOSPA chipchipyaynin querubinkuna jananpita sharkurkur aywashpan Lugar Santuman yaykuna punkuchöna ichikuykurqan. Templuman pukutay juntaptinmi altar kashqan kaq patiuman TAYTA DIOSPA chipchipyaynin juntarqan.*
5 Querubinkunapa älankuna sapsapyashqan templupa jatun kaq patiunyaqmi mayakarqan. Lapanpaq munayniyuq Tayta Dios parlashqannöraqmi tsay sapsapyashqan mayakarqan.
6 Querubinkunapa chakincho kaykaq ruëdakunapita ninata jorqamunanpaq Tayta Dios niptinmi lïnu röpan jatishqa runa ruëdakuna kashqanman aywaykur ichikuykurqan.
7 Juk querubinnami ruëdakuna chawpincho kaykaq shanshata jorqarkamur lïnu röpan jatishqa runata makyarqan. Chaskirkurmi yarqur aywakurqan.
8 Querubinkunapa älankuna rurinchömi runapa makinno kaykaqta rikarqä.
9 Nirkurnami rikarqä querubinkunapa chakincho chusku ruëdakuna kaykaqta. Cada querubinpa chakinchömi juk ruëda kaykarqan. Crisólito ruminöraqmi tsay ruëdakuna kuyaylapaq chipchipyarqan.
10 Tsay tamäñulami chuskun ruëdakuna karqan. Cada ruëda chawpinchömi juk ruëda cruzaypa churaraykarqan.
11 Mayqan lädupapis aywarqa tsay ruëdakuna manami tikraqtsu, sinöqa punta kaq ruëda aywashqalanpami mana tikraypa aywaq.
12 Querubinkunapa waqtancho, makincho, älancho y intëru cuerpunchömi nawinkuna karqan. Tsaynölami ruëdanchöpis tsaytsika nawinkuna karqan.
13 Mayaykaptïmi tsay ruëdakuna “jiruruq” jutin kashqanta nipäkurqan.*
14 Tsay querubinkunaqa chusku qaqlayuqmi karqan. Juk qaqlanmi karqan querubinpano, jukaq qaqlanmi karqan runapano, jukaq qaqlanmi karqan leonpano y jukaq qaqlannami karqan ankapano.*
15 Tsay querubinkunami pärir aywakärirqan. Quebar mayu kuchuncho runa niraqkunata rikashqäkunalami tsay querubinkuna karqan.*
16 Querubinkuna aywaptinqa ruëdankunapis aywaqmi. Pärinanpaq älankunata mashtaptinpis ruëdakuna manami kachakaqtsu.
17 Päriykashqancho ichiptinqa ruëdankunapis ichikuykuqmi. Päriyta qalaykuptinqa ruëdankunapis joqarikaqmi. Tsayno karqan querubinkunapa espïritun ruëdakunacho kaptinmi.
18 Tsaypitanami TAYTA DIOSPA chipchipyaynin Lugar Santu punkucho kaykashqanpita sharkurkur querubinkuna jananman chayarqan.
19 Rikaraykaptïmi querubinkuna älankunata mashtarkur pampapita pärir aywakärirqan inti jeqamunan kaq lädu punkuman. Päriptin ruëdankunapis mana kachakaypami aywapäkurqan. Tsay punkucho ichiptinmi TAYTA DIOSPA chipchipyayninpis querubinkunapa janancho kaykarqan.
20 Tsay querubinkunaqa Quebar mayu kuchuncho runa niraqkunata rikashqäkunami karqan. Quebar mayu kuchuncho rikaptï Israel runakunata kuyaq Tayta Diospa chakinchömi karqan. Tsaymi tantiyakurqä querubinkuna kashqanta.
21 Paykuna karqan chusku qaqlayuq y chusku älayuqmi. Älankuna rurinchöpis runapa makinnömi rikakämurqan.
22 Qaqlankunapis kaykarqan Quebar mayu kuchuncho rikashqänölami. Tsay querubinkuna mana tikrapakuypami aywaykarqan.
Ichic wilacuycuna
^ querubín Querubinqa älayuq angilkunami karkaykan. Querubinkunatami Tayta Dios churarqan Edén huertata täpananpaq (Gén. 3.24). Tsaynölami Pactu Babulpa tsapanan jananchöpis qoripita rurashqa ishkay querubinkuna ichiraykarqan (Éxo. 25.18-22; Heb. 9.5). Salomón ruratsishqan templuchöpis ishkay querubinkunami qoriwan enchapashqa karqan. Tsay querubinkunapa altunmi karqan chusku metru pulan (1Rey. 6.23-29). Profëta Ezequielpis revelacionchömi querubinkunata rikarqan (Eze. 10.1-22; 41.18-19).
^ 10.1 Eze. 1.26; Apoc. 4.2.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 10.3-4 Éxo. 16.10; 24.16; Núm. 10.34.
^ 10.9-13 Eze. 1.15-21.
^ 10.14 Eze. 1.10; Apoc. 4.7.
^ 10.15, 20 Eze. 1.1-3.
