Ezequiel 13:1-23
13 TAYTA DIOSMI kayno nimarqan:
2 “Runapa tsurin, Israel runakunacho kaykaq lula profëtakuna kikinpa yarpaynilanpita wilakurkaykaqta kayno ninki: ‘¡TAYTA DIOS nishqanta mayapäkuy!*
3 TAYTA DIOSMI kayno nin: ¡Wawalaw, yarpayniynaq upa profëtakuna! Qamkunaqa yarpaynilaykipitami lutankunata wilakurkaykanki.
4 “ ‘Israel runakuna, raqälana kaykaq markakunacho taq atuqkunanömi lula profëtaykikuna karkaykan.
5 Marka murälla juchushqa kaykaqta rikarpis mana altsaqnömi paykunaqa mana yätsishunkitsu castïgupita qeshpipäkunaykipaq. Ali profëta karqa castiganäpaq kaq junaq chayamuptin salvakärinaykipaq tantiyatsishunkiman karqan.
6 Paykuna wilakushqanqa manami rasunpatsu kaykan. Paykunaqa manapis kachaykaptïmi wilakunanpaq kachashqäta nirkaykan. Nishqanno lapanpis kananpaq kashqantami yarpapäkun.
7 “Revelacionchömi rikashqä” nirpis lulakurkaykanmi. Ima pasananpaq kashqanta nirpis manami rasun kaqtatsu rimarkaykan. Imatapis mana revelaykaptïmi noqa parlapashqäta nirkaykan.
8 “ ‘Tsaymi lula profëtakunata noqa TAYTA DIOS kayno nï: Qamkuna manami rasun kaqtatsu wilakurkaykanki. Revelacioncho rikashqaykitapis manami noqatsu rikatsishqä. Tsayno lutanta wilakushqaykipitami qamkunapa contrayki kaykä. Noqa TAYTA DIOSMI tsayno nï.
9 “ ‘ “Revelaciontami rikashqä” niq lula profëtakunataqa castigashaqmi. Kuyashqä Israel runakuna juntakashqanmanpis manami yaykunqanatsu. Israel markapa acta librunkunamanpis manami jutinkunata qelqanqanatsu. Israel nacionmanpis manami kutinqanatsu. Tsayraqmi TAYTA DIOS kashqäta musyapäkunqa.
10 “ ‘Tsayno pasanqa Israel runakunata imapis mana pasananpaq kashqanta criyitsishqanpitami.* Tsay lula profëtakuna wilakushqanqa kaykan juchunaykaq tapiata yësuwan rebucashqannölami.
11 Juchunaykaq tapiata rebucaptinpis juchushqannömi lula profëtakuna wilakushqanpis manakaqlapaq kaykan. Löcu tamya, shukukuy wayra, runtu tamya shamur juchunaykaq tapiata juchutsishqannömi Jerusalénman castïgu chayar ushakätsinqa.
12 Castïgu chayaptinnami tsay lula profëtakunata kayno nipäkunqa: “Castïgu mana kananpaq nirkaykaptikiqa ¿imanirtaq Jerusalén ushakashqa?” ’ ”
13 Tsaymi lula profëtakunata TAYTA DIOS kayno nin: “Rabyashpämi löcu wayrata wayrätsimuqno y löcu tamyata y runtu tamyata tamyatsimuqno castigashayki.
14 Juchunaykaq tapia rebucashqa karpis cimientunkuna rikakänanyaq ushakashqannömi qamkunapis castigaptï ushakankipaq. Tsayraqmi TAYTA DIOS kashqäta musyapäkunkipaq.
15 “Jerusalénta y lula profëtakunata ushakätsiptïraqmi rabyaynï pasanqa. Nirkurmi qamkunata wilashayki lula profëtakuna y Jerusalén markapis manana kashqanta.
16 Jerusaléncho mana ali kaykaptinpis ali kaway kananpaq kashqanta wilakuqkuna lapanmi ushakanqa”. TAYTA DIOSMI tsayno nin.
Lulakuq profetïsakunapaq Tayta Dios olqushqan
17 “Runapa tsurin, lulakuq profetïsakunaqa yarpaynilanpitami noqapa jutïcho wilakurkaykan. Paykunata kayno ninki:
18 ‘TAYTA DIOSMI kayno nin: ¡Wawalaw, runata engañar puriqkuna! Qamkunaqa kuyashqä runakuna suertiyuq kananpaq lulapar makinman watakunanpaq cintata awarkaykanki y umankunaman shukutakunanpaqpis jakuta awarkaykanki. ¿Imanirtaq kuyashqä runakunata tsayno criyitsipäkunki?
19 “ ‘Tsayno manakaqkunata jutïcho rurarmi manakaqman churaykämanki. Juk aptay cebädalapaq y juk amuy tantalapaqmi kuyashqä runakunata lulaparkaykanki. Tsayno lulapaptikimi jutsaynaq runakuna wanurkaykan y jutsayuq runakunanami kawarkaykan.
20 “ ‘Tsaymi TAYTA DIOS kayno nin: “Awashqä pulcërata makikiman watakurqa suertiyuqmi kanki” nirmi kuyashqä runakunata engañarkaykanki. Tsaymi qamkunapa contrayki kaykä. Pishqukunata jaulaman wichqaqnömi kuyashqä runakunata lulapar munaynikiman churarkaykanki. Pishqukunata jaulapita jorquqnömi makikipita paykunata jorqushaq.
21 Nirkurmi tantiyatsishaq shukutakushqan jakukunaman manana criyipäkunanpaq. Yapayqa manami tsaykunaman criyipäkunqanatsu. Tsayraqmi TAYTA DIOS kashqäta musyapäkunkipaq.
22 “ ‘Qamkunaqa lulakurmi ali runakunata lakikuyman churarkaykanki. Lakishqa kananta mana munaykaptïmi lakikaykätsinki. Fiyu runakunatanami mana alikunata rurananpaq shakyarkaykätsinki. Tsaymi jutsa ruraykunata mana kachapäkur castïgupita salvakärinqatsu.
23 Qamkunata castigaptï runakunata manami lulapaykankinatsu ni rikakuqpis kankipaqnatsu. Kuyashqä runakunata noqami makikipita jorqushaq. Tsayraqmi TAYTA DIOS kashqäta musyapäkunkipaq’ ”.
