Ezequiel 17:1-24
17 TAYTA DIOSMI kayno nimarqan:
2 “Runapa tsurin, Israel runakunata tinkutsiypa wilapar
3 kayno ninki: ‘TAYTA DIOSMI kayno nin: Jatun älayuq y tukuy color plümayuq jatunkaray ankashi Líbanuman chayarqan.* Cedru yörapa nawinta
4 pakirirshi rantikuq runakunapa nacionninman apakurqan. Nirkurshi rantikuqkunapa markanman plantaykurqan.*
5 “ ‘Tsaynölashi tsay ankaqa Judácho shumaq barbichashqa chakraman juk muruta muruykurqan.* Atska yaku kuchunmanshi sauci yörano winananpaq mururqan.
6 Tsay murushqan jeqamurshi üva plantaman tikrarqan. Altuyaq mana winarpis copösushi rikakurqan. Rämankuna winarshi anka kaykashqan lädupa makyararqan. Sapinkunapis ruriyaq yaykuptinshi y rämankuna shumaq winaptinshi copösuyarqan.
7 “ ‘Tsaypitanashi jukpis jatunkaray ankana chayarqan. Tsay ankapis jatunkaray älayuq y plümasapashi karqan. Tsayshi tsay üva plantapa sapinkuna anka kaykashqan kaq lädupana yaykurqan. Rämankunapis anka kaq lädupanashi makyararqan. Tsayno tikrarqan tsay anka kaykashqan kaq läducho yakuta munarshi.*
8 Tsayno kaptinpis tsay üva plantaqa ali alpacho y atska yaku aywaq kuchunchöshi plantararqan. Tsaycho karqan loqyuypa loqyurraq winar copösuyänanpaq y ali wayunanpaqshi’.
9 “Tsaynöpis kayno ninki: ‘TAYTA DIOSMI kayno nin: ¿Alitsuraq tsay üva planta wayunqa? Punta kaq anka tsay üva plantapa sapinta shipiriptinmi wayuyninpis marpunqa. Raprankunapis qarwashtaykarmi tsakinqa. Tsayno rurananpaq manami atska runataraqtsu ni aläpa kalpataraqtsu nistanqa.
10 Plantarashqanpita juk läduman plantaptinpis ¿takyanqatsuraq? ¿Manatsuraq tsakikäkunqa? Inti jeqamunan kaq lädupita wayra shamurmi shumaq tsintsiykaqta chipyaq tsakitsinqa’ ”.
Üvaman y ankaman tinkutsishqanpita tantiyatsishqan
11 TAYTA DIOS kaynömi nimarqan:
12 “Mana cäsukamaq Israel runakunata tapunki tinkutsiypa wilapashqaykita tantiyashqanta o mana tantiyashqantapis. Nirkur kayno ninki: ‘Babilonia nacionpa mandaqnin reymi Jerusalénman aywaykur Judá nacionpa mandaqnin reyta y yanapaqninkunata Babiloniaman prësu apamurqan.
13 Nirkurmi Judá nacionpa mandaqnin reypa aylunpita juk runata akrarqan mandaq autoridä kananpaq. Pay nishqannöla Israel nacioncho mandananpaqmi *pactuta rurar juratsirqan. Kutiykurnami Israelcho ali respitädu y ali yachaq runakunata Babiloniaman apamurqan.
14 Tsaynöpami Babilonia nacionpa mandaqnin reyqa Judá nación runakunata munaynincho tsarararqan. Judácho mandaq autoridä pactuta rurar jurashqanta cumpliptinmi Judá runakuna ali kawapäkurqan.
15 “ ‘Tsayno kaptinpis Judácho mandaq runaqa Babilonia reypa contranmi sharkurqan.* Tsaymi kachakunata kacharqan Egiptupita cawallukunata y atska soldädukunata alquilakamunanpaq. Babilonia nacionpa mandaqnin reyta sirvinanpaq jurarkur contran sharkuptin ¿manatsuraq castiganqa?
16 Tsay mandaq runaqa Babiloniachömi wanunqa. Judácho mandananpaq Babilonia nacionpa mandaqnin rey churaptin juraykarpis mana cumplishqanpitami wanunqa. Noqa TAYTA DIOSMI tsayno wanunanpaq jurä.
17 “ ‘Babilonia soldädukuna Jerusalén perqa waqtankunapa alpata qotuykur yaykuptinpis y törrikunata ruraykur runakunata wanutsiptinpis washänanpaq manami soldädunkunata Faraón kachanqatsu.
18 Babilonia nacionpa mandaqnin reyta sirvinanpaq jurar makinta qoykarpis mana cumplishqanpitami Judá nacionpa mandaqnin wanunqa’.
19 “Tsaymi TAYTA DIOS kayno nin: ‘Judá nacionpa mandaqnin pactu rurashqanta imaypis cumplinanpaqmi jutïcho jurar promitirqan. Jutïcho promitiykarpis mana cumpliptinqa payta castigashaqmi.
20 Redwan tsariqnömi Babiloniaman prësu apamunanpaq payta tsaritsimushaq. Promitimashqanta mana cumplishqanpitami tsaycho castigashaq.*
21 Ali chölu soldädunkunapis guërrachömi wanupäkunqa. Kawaykar quëdaqkunapis maytsaypami qeshpir aywakärinqa. Tsayraqmi musyapäkunkipaq nishqäkunata cumpliq TAYTA DIOS kashqäta’.
22 “TAYTA DIOSMI kayno nin: ‘Noqapis cedru yörapa nawinta pakirirmi altunnin jirka puntaman plantashaq.*
23 Israelcho lapan jirkakunapitapis altunnin kaq jirkamanmi plantashaq. Tsaychömi shumaq copösuyashpan jatun cedru yöra rikakur ali wayunqa. Tukuy casta pishqukunami qeshwanta rurar tsay yörapa rämankunacho tanqapaq.
24 Maytsaychöpis lapan yörakunami musyapäkunqa noqa TAYTA DIOS jatun kaq yörata muturir taksha kaq yörata winatsishqäta. Tsaynöpis musyapäkunqa loqluykaq yörata tsakiratsir tsakishqa kaq yörata tsintsitsimushqäta. Noqa TAYTA DIOSMI tsayno nï. Nishqänölami lapantapis cumplishaq’ ”.
Ichic wilacuycuna
^ 17.3 Tsay ankaqa Babilonia nacionpa mandaqnin reymi karqan. Líbanupaq parlarqa Jerusaléncho reypa palaciunpaqmi parlaykan (1Rey. 7.2).
^ 17.4 Cedru yörapa nawinqa Jerusaléncho rey Joaquínmi karqan. Rantikuq runakunapa nacionninqa Babiloniami karqan (2Crón. 36.9-10).
^ 17.5 Judácho shumaq barbichashqa chakraman muruta murushqanmi Sedequías karqan. Joaquínpa trukan mandananpaqmi Babilonia nacionpa mandaqnin rey Sedequíasta churarqan (Jer. 37.1; 2Crón. 36.13).
^ 17.7 Jukaq anka karqan Egiptupa mandaqnin Faraónmi. Tsay anka kaykashqan kaq yakuta munashqanta nirqan Faraónman Sedequías yärakur yanapananpaq manakushqanpitami.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 17.12-15 2Rey. 24.15-20; 2Crón. 36.10-13.
^ 17.18-20 Jer. 37.1-2; 52.8-11; Eze. 12.13.
^ 17.22 Tsayno Tayta Dios nirqan juk reyta Jerusalénman churananpaq nirmi.
