Ezequiel 18:1-32
18 TAYTA DIOSMI kayno nimarqan:
2 “¿Imanirtaq Israelcho imaypis kay parluta kayno nipäkun: ‘Taytankuna pochquq üvata mikuptin tsurinkunapa kirunkunami shimpan’?*
3 “Noqa TAYTA DIOSMI jurar kayno nï: Israelcho manami imaypis tsay parluta parlanqanatsu.
4 Lapan runakunapis y tsurinkunapis noqalapami kaykan. Jutsata ruraq kaq runaqa wanunqami.
5 “Ali runaqa ali kaqlatami ruran.
6 Manami jirkankunacho ïdulukunata adoraqkuna mikuyta rurashqanmanpis witipantsu. Israel runakuna yärakushqan ïdulukunamanpis manami yärakuntsu. Manami runa mayinpa warminwan kakuntsu. Manami killa qeshyanwan kaykaptinqa warmintapis yatapantsu.
7 Manami pitapis nakatsintsu. Jaqankuna prendata kachapaptinpis kutiykatsinmi. Manami pitapis suwapantsu. Waktsakunatapis melqaparkunmi. Röpaynaqkunatapis röpata jatiparkunmi.
8 Qellayta manaykurpis wawanta manami cobrantsu. Manami pitapis chikintsu. Juzgarpis manami pitapis jananpantsu.
9 Leynïkunata y mandamientükunata cäsukurmi alita rurar kawan. Tsayno rasunpa alita ruraq runaqa kushishqami kawanqa”.* TAYTA DIOSMI tsayno nin.
10 “Aybësisqa ali runapa tsurinpis suwakunmi y pitapis wanutsinmi.
11 Papänin kawashqanno kawananpa trukanqa jirkankunacho ïdulukunata adorar rurashqan mikuyta mikun, runa mayinpa warminwan kakun,
12 waktsakunata y pobrikunata nakatsin, runakunata suwapan, jaqankuna prendata churashqanta mana kutitsintsu, ïdulukunaman yärakun, melanaypaq kaqkunata ruran
13 y qellayta manaykurpis wawantami cobran. ¿Tsay runa kawanmantsuraq? ¡Manami kawanmantsu! Melanaypaq kaqkunata rurashqanpitami wanunqa. Tsayno wanunanpaq kikinmi jutsayuq kanqa.
14 “Aybësisqa fiyu runapa tsurin kaykarpis papänin lutanta rurashqanta mana rurarqa ali runami rikakun.
15 Tsaymi jirkankunacho ïdulukunata adorar mikuykunata ruratsishqanmanpis mana witipantsu. Israel runakuna yärakushqan ïdulukunamanpis mana yärakuntsu. Runa mayinpa warminwanpis mana kakuntsu.
16 Pitapis mana nakatsintsu. Prendata kachapashqantapis manami tsarikurkuntsu. Pitapis manami suwapantsu. Waktsakunata qaraykunmi. Röpaynaq kaqkunata jatiparkunmi.
17 Waktsakunata yanapanmi. Qellayninpa wawantapis manami cobrantsu. Leynïkunata y mandamientükunata cäsukurmi alita rurar kawan. Tsayno runaqa papäninpa jutsanpita manami wanunqatsu, sinöqa kawanqami.
18 “Papäninmi itsanqa pïmaytapis nakatsishqanpita, suwakushqanpita y mana alikunata rurashqanpita wanunqa. Kikinpa jutsanpitami tsayno wanunqa.
19 “Qamkuna tapukur kaynömi nirkaykanki: ‘¿Imanirtaq papänin jutsata rurashqanpita tsurin mana wanuntsu?’
“Noqa kaynömi nï: Tsay tsurin ali kaqta rurarqa manami wanunqatsu. Leynïkunata cäsukur kawashqanpitami pay kawanqa.
20 Pipis jutsata ruraq kaqqa wanunqami. Papäninpa jutsanpita manami tsurin wanunqatsu. Tsurinpa jutsanpita manami papänin wanunqatsu.* Alita ruraq kaqqa alitami chaskinqa. Mana alita ruraq kaqqa jutsata rurashqanpitami castigashqa kanqa.
Lapan runa kawananta Tayta Dios munashqan
Ezequiel 33.10-20
21 “Jutsa ruraykunata kacharishpan leynïkunata cäsukuq kaqqa manami wanunqatsu.
22 Jutsa rurashqankunata manami yarpäshaqnatsu. Alita rurashqanpitami kawanqa.
23 Lapan runakunapis jutsa rurashqankunata kacharir alilatana rurapäkunantami noqa munä. Jutsa rurashqankunapita wanunantaqa manami munätsu”.* TAYTA DIOSMI tsayno nin.
24 “Itsanqa alita ruraykashqancho jutsata rurar y melanaypaq kaqkunata rurarqa ama yarpätsuntsu kawananpaq kashqanta. Alita rurashqankunata lapantami qonqaykushaq. Jutsata rurashqanpitami tsay runa wanunqa.
25 “Qamkuna kaynömi nirkaykanki: ‘Jutsa ruraqkunata jutsa rurashqanta kachariptinpis Tayta Dios ama perdonatsuntsu. Perdonarqa lutantami ruraykan. Ali runata itsanqa jutsankunapita perdonatsun. Mana perdonarqa lutantami ruraykan’.
“Israel runakuna, shumaq mayapäkamay. ¿Mana alita ruraykashqätaku yarparkaykanki? ¿Manatsuraq kikikikuna mana alitaqa rurarkaykanki?
26 Jutsa rurayta kacharishqana kaykar yapay jutsata rurarqa kikinpa jutsanpitami wanunqa.
27 Lutan ruraykunata kacharir ali kaqkunata rurarmi itsanqa salvakunqa.
28 Shumaq tantiyakushpan jutsa rurayta kacharirqa manami wanunqatsu.
29 “Qamkuna kaynömi nirkaykanki: ‘Tayta Diosqa lutantami ruraykan’. Israel runakuna, ¿imatataq lutanta ruraykä? ¡Kikikikunami itsanqa mana alikunata rurarkaykanki!
30 Israel runakuna, rurashqaykiman tupumi lapaykita juzgashayki”. TAYTA DIOSMI tsayno nin.
“ ‘Mana ushakänaykipaq jutsa ruraykunata jukla kachariy.*
31 Jutsa ruraykunata kacharir mushuq shonquta y mushuq espïrituta imaykanöpapis *ashipäkuy.* Israel runakuna, ¿imanirtaq wanuyta ashirkaykanki?
32 Jutsa ruraylacho wanunaykita manami munätsu. Jutsa ruraykunata kacharirqa kawapäkunkipaqmi’ ”.* TAYTA DIOSMI tsayno nin.
Ichic wilacuycuna
^ 18.2 Jer. 31.29.
^ 18.20 Deut. 24.16.
^ 18.23 Eze. 33.11; 2Ped. 3.9.
^ ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
^ 18.31 Eze. 36.26.
^ 18.32 Eze. 33.11; 2Ped. 3.9.
