Ezequiel 31:1-18
31 Babiloniaman prësu apapäkamashqan chunka juk wataman aywaykaptinnami kimsa kaq killa punta kaq junaqcho TAYTA DIOS kayno nimarqan:
2 “Runapa tsurin, Egipto nacionpa mandaqnin rey Faraónta y nacionnincho taykaq runakunata kayno ninki:“ ‘Manami pipis qamkunano munayniyuq kantsu.
3 Qamkunaqa Asiria nación kashqannömi munayniyuq karkaykanki.Asiriaqa Líbanucho kaykaq cedru yörami karqan.Kuyaylapaq jatunkaray copösumi karqan.Puntanpis pukutayyaqmi chayarqan.
4 Oqucho karmi shumaq winarqan.Nawpanpa yaku aywarmi wakin yörakunatapis* ushmarqan.
5 “ ‘Tsaymi lapan yörapitapis mas jatun winarqan.Yaku shumaq ushmaptinmi copösuyarqan.Rämankunapis wak lädupa kay lädupami makyararqan.
6 Rämankunachömi lapan casta pishqukunapis qeshwanta rurakurqan.Sikinchömi tukuy casta uywakunapis wacharqan.Lantuyninchömi maytsay nación runakunapis tarqan.
7 “ ‘Tsay yöra kuyaylapaqmi winarqan.Sapinta atska yaku ushmaptinmi rämankuna shumaq copösuyarqan.
8 Tayta Diospa huertancho* * mayqan cedru yörapis manami tsayno jatun karqantsu.Cipreskunapa rämankunapis manami tsay yörapa rämankunanötsu karqan.Castäñu yörakunapa rämankunapis manami tsay yörapa rämankunaman tinkurqantsu.Tayta Diospa huertancho mayqan yörapis tsayno kuyaylapaq manami karqantsu.
9 Kuyaylapaqta y copösutami Tayta Dios rurarqan.Tsayno kaptinmi Tayta Diospa Edén huertancho kaq wakin yörakuna tsay cedruta chikipäkuq.
10 “ ‘Tsaymi TAYTA DIOS kayno nin: Lapan yörakunapitapis mas winar puntanpis pukutayyaq chayaptinmi pasaypa orgullösu rikakurqan.
11 Tsaymi jäpa nacionpa mandaqnin reypa makinman kachaykurqä. Tsay reymi jutsa rurashqanman tupu castigarqan.
12 Jäpa fiyu runakuna muturiptinmi jirkakunacho, pampakunacho y raqrakunacho tsay yörapa rämankuna pakishqa jitararqan. Tsaymi maytsay nación runakuna lantuynincho tarkaykashqanpita aywakärirqan.
13 Yörata mutuptinmi tukuy casta pishqukuna troncunchöna qeshwankunata rurarkur tarqan. Rämankunatanami tukuy casta munti uywakuna jarur usharqan.
14 “ ‘Kananpitaqa atska yaku ushmaptinpis manami ima yörapis tsayno copösuyanqatsu. Mayjina parquptinpis manami pukutayman chayashqanyaq winanqanatsu. Lapanpis ushakaqla karmi wanushkuna kaykashqanman chayanqa. Runa ushakaqla kashqannömi ushakaqla kaykan.
15 “ ‘TAYTA DIOSMI kayno nin: Wanushkuna kaykashqanman Asiria nación chayashqan junaqmi mayukuna y patsa rurincho kaykaq lamarpis fiyupa lakikuywan tsakirqan. Líbano jirkapis lakikuptinmi tsaycho lapan yörakuna qarwashtarqan. Tsayno kananpaq noqami kamakätsirqä.
16 “ ‘Cedru yörano qapaparraq tuniptinmi maytsay nación runakunapis mantsakur siksikyarqan. Wanushkuna kaykashqanman chayatsiptïmi Edéncho y Líbanucho atska yakuwan winaq kuyaylapaq yörakuna kushikärirqan kayno nir: “Noqakunawannami wanushkuna kaykashqancho kaykanki”.
17 “ ‘Nawpataqa tsay yörakuna cedru yörapa lantuynincho kar yanapaqninmi karqan. Kananqa lapanpis tsay yörakuna espädawan wanutsishqa runakunanömi ushakashqa karkaykan.
18 “ ‘Egipto nación, cedru yöranömi qampis kaykanki. Kuyaylapaq kashqaykiman Edéncho yörakuna manami mayqanpis tinkuntsu. Tsayno karpis Edéncho kaq wakin yörakunanömi wanushkuna kaykashqanman chayankipaq. Mana cäsukamaqkuna y guërracho espädawan wanuqkuna ushakashqannölami qampis y qamcho taq runakunapis ushakanki. TAYTA DIOSMI tsayno nin’ ”.
Ichic wilacuycuna
^ 31.4 Kay capïtulucho yörakunapaq parlar wakin nacionkunapaqmi parlaykan.
^ 31.8 Kay capïtulucho Tayta Diospa huertanpaq y Edén huertapaq parlarqa kay patsapaqmi parlaykan.
^ 31.8-9 Gén. 2.8-9.
