Ezequiel 33:1-33
33 TAYTA DIOSMI kayno nimarqan:
2 “Runapa tsurin, marka mayikikunata wilapar kayno ninki: ‘Musyashqaykinöpis may nacionchöpis guërra kaptinqa juk runatami rikachakunanpaq churapäkun.
3 Paymi contrapartin soldädukuna nacionninman yaykuykaqta rikar jukla *cornëtata tukan marka mayinkuna kamarikärinanpaq.
4 Cornëta tukamushqanta mayaykar mana kamarikuptinqa contrapartinkuna chayaykurmi tsay markacho taq runakunata wanutsipäkun. Mana kamarikurqa kikinkunami wanunanpaq jutsayuq karkaykan.
5 Tsayno ushakanqa cornëtata tukamushqanta mayaykarpis mana kamarikärishqanpitami. Kamarikuq kaqmi itsanqa mana wanunqatsu.
6 “ ‘Tsay rikachakuq runa contran soldädukuna aywaykämuqta rikaykar cornëtata mana tukaptinqa markaman yaykuykur pitapis tarishqan kaqtami wanutsipäkun. Jutsata rurashqanpita runakuna wanutsishqa kaptinpis rikachakuq runami jutsayuq kaykan cornëtata mana tukashqanpita’.
7 “Runapa tsurin, Israel runakunapa rikachakuqninno kanaykipaqmi qamta churashqä.* Tsaymi wilapashqäta paykunata wilanki.
8 Jutsa ruraq runata ushakätsinäpaq qamta wilaptï jutsa rurayta kacharinanpaq wilay. Mana wilarqa qammi jutsayuq kankipaq tsay runa wanushqanpita.
9 Jutsa rurayta kacharinanpaq niykaptikipis tsaynöla jutsata rurarqa jutsanpitami tsay runa wanunqa. Wilapashqaykicho wanuptinqa manami jutsayuqnatsu kankipaq.
Lapan runa kawananta Tayta Dios munashqan
Ezequiel 18.21-32
10 “Runapa tsurin, Israel runakunata kayno ninki: ‘Qamkuna nirkaykanki jutsata rurashqaykipita Tayta Dios castigashuptiki mana awantapäkunaykipaq kashqantami. Tsaynöpis nirkaykanki manana kawapäkunaykipaq kashqanta’.
11 “Tsaymi TAYTA DIOS jurar kayno nin: ‘Jutsa ruraqkuna wanunanta manami munätsu, sinöqa lutan ruraykunata kacharir noqa munashqäno kawanantami munä. Israel runakuna, jutsa rurashqaykita kacharir cäsukamay. ¿Imanirtaq wanuyta ashirkaykanki?’*
12 “Runapa tsurin, Israel mayikikunata kayno ninki: ‘Ali runapis jutsata rurarqa castigashqami kanqa. Fiyu runapis jutsa rurayta kacharirqa perdonashqami kanqa.
13 “ ‘Aybësisqa ali runapis ali ruraq kashqanman atiënikushpan lutankunatami rurakun. Tsay runata ali kawananpaq promitishqa karpis mana alita ruraptinqa wanutsishaqmi. Nawpata alita rurashqankunatapis manami yarpäshaqnatsu.
14 “ ‘Aybësisqa fiyu runa jutsata rurashqanta kacharir munashqänömi kawan. Tsaymi jaqankuna prenda churashqanta y suwakushqanta kutitsir leynïkunata cäsukun. Tsayno kawaq runataqa wanutsinäpaq nishqa karpis manami wanutsishaqnatsu.
15 -
16 Nawpata jutsa rurashqantapis manami yarpäshaqnatsu. Lutankunata manana rurarqa manami wanunqanatsu’.
17 “Tsayno niptikimi marka mayikikuna kayno nipäkushunkipaq: ‘Jutsa ruraqkunata jutsa rurashqanta kachariptinpis Tayta Dios ama perdonatsuntsu. Perdonarqa lutantami ruraykan. Ali runata itsanqa jutsankunapita perdonatsun. Mana perdonarqa lutantami ruraykan’. Tsayno rimarqa toqshun tsakishqami karkaykan.
18 “Yapaymi kayno nï: Ali runapis jutsata rurarqa wanunqami.
19 Jutsa ruraq runapis jutsa rurayta kacharishpan munashqäno kawarqa salvakunqami.
20 Israel runakuna, ¿imanirtaq nirkaykanki shumaq mana juzgashqäta? Imanöpis kawashqaykiman tupumi lapaykitapis juzgashayki”.*
Jerusalénta ushakätsinanpaq nishqan
21 Babiloniaman prësu apapäkamashqan chunka ishkay wataman aywaykaptinnami chunka kaq killa pitsqa junaqcho Jerusalénpita qeshpimuq runa kayno nimarqan: “¡Jerusaléntami ushakätsishqa!”
22 Tsay runa chayamunanpaq juk junaq pishiykaptinmi patsa tsakashqan höra TAYTA DIOS shimïta pashtatsirqan. Tsaymi tsay tuta runa chayamunanpaqqa rimarqäna.*
23 Tsaymi TAYTA DIOS kayno nimarqan:
24 “Runapa tsurin, raqälan kaykaq Israel markakunacho taykaq runakunami kayno nirkaykan: ‘Abrahamqa kikilanmi kay nacionta munaynincho tsarararqan. Noqantsipis atskaq kaykarqa ¡imanirtaq kay nacionta munaynintsicho tsararantsitsu!’
25 “Tsaymi paykunata kayno ninki: ‘TAYTA DIOSMI kayno nin: Qamkunaqa uywakunapa yawarnintami mikurkaykanki. Tsaynöpis ïdulukunatami manakurkaykanki y runa mayikitami wanurkaykätsinki. ¿Tsayno kaykarku kay nacionpa duëñun kayta munarkaykanki?
26 Qamkunaqa runa wanutsiq, ïduluta adoraq y jukpa warminwan kakuqmi karkaykanki. ¿Tsayno kaykarku kay nacionpa duëñun kayta munarkaykanki?’
27 “Ezequiel, paykunata mastapis kayno ninki: ‘TAYTA DIOSMI jurashpan kayno nin: Raqälana kaykaq markakunacho taqkunapis guërrachömi wanunqapaq. Chakracho taqkunatapis jirka uywakunami mikunqapaq. Qaqakunacho y machaykunacho pakakuqkunapis pesti qeshyawanmi wanupäkunqapaq.
28 Chipyaq ushakätsiptïmi Israel nación chunyaq rikakunqa. Tsaypaqa manami pipis purinqanatsu. Tsayno ushakätsiptï runa tukärinanpaq pipis manami kanqanatsu.
29 Melanashqäta rurapäkushqaykipita kay nacionta ushakätsiptïraqmi TAYTA DIOS kashqäta musyapäkunkipaq’.
30 “Runapa tsurin, Israel runakunami marka murällakunacho y wayi punkukunachöpis juntakaykur kayno nipäkun: ‘TAYTA DIOSPA wilakuyninta Ezequiel wilakushqanta mayanantsipaq aywashun’.
31 Tsayno nir juntakämushpan wilapashqaykita mayaykarpis manami cäsukamantsu. Kuyamashqanta niykarpis manami rasunpatsu kuyaman. Tsaypa trukanqa codiciösu karmi lutanta rurananpaq yarpachakurkaykan.
32 “Paykunapaq qam kaykanki arpata tukapaylapa jipashta cantapaq mözunömi. Tsaymi nishqaykita mayaykarpis cäsukärintsu.
33 Tsayno kaptinpis wilakushqayki lapanpis cumplinanpaqnami kaykan. Cumpliptinraqmi wilakuqnï profëta kashqaykita tantiyakärinqa”.*
Ichic wilacuycuna
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ 33.7 Jer. 6.17; Ose. 9.8.
^ 33.11 Eze. 18.23, 32; 2Ped. 3.9.
^ 33.22 Tsaypita masta musyanaykipaq liyinki Eze. 3.26-27; 24.27. Jerusalén manaraq ushakaptin Ezequiel parlarqan wilakunanpaq Tayta Dios nishqankunalatami.
^ 33.33 Deut. 18.21-22; Jer. 28.9.
