Ezequiel 4:1-17
4 “Runapa tsurin, juk adöbita nawpaykiman churaykur janancho Jerusalén markata ruray.
2 Toldukunatapis jiruruypa ichitsiy. Puklana soldädukuna yaykuykaqtano jiruruypa churay. Murälla waqtankunapa alpata qotuy. Markaman yaykunanpaq escalëratapis ruray. Murällata juchutsinanpaq mäquinakunatapis jiruruypa churay.
3 Nirkur tsay markapita rakishunaykipaq juk lätata ichitsiy. Tsaypitana markaman contrankuna atacaq yaykuqno rikakunki. Tsayno rurashqaykimi señal kanqa Israel mayikikunata ima pasananpaq kashqantapis musyananpaq.
4 “Tsaypitana itsuq kaq nawpaykipa wequräkunki. Tsayno wequranki Israel runakunapa jutsankunata qamta jitapaptïmi. Tsayno wequrashpaykimi paykuna jutsata rurashqanpita nakanki.
5 Tsayno wequranki kimsa pachak isqun chunkan (390) junaqyaq. Cada junaq wequrar jitarashqaykimi tinkunqa Israel runakuna cada wata conträ sharkushqanman.
6 “Tsay junaqkunata cumplirkurnami chusku chunka (40) junaqyaq alawqa kaq lädupana wequranki. Tsayno wequrashpaykimi Judá runakuna jutsata rurashqanpita nakanki. Juk junaq wequrashqaykimi tinkunqa juk wata conträ sharkushqanman.
7 “Tsayyaqmi adöbi janancho rurashqayki Jerusalén kaq lädupa tikraranki. Camisaykita patikurkur tsay markata ima pasananpaq kashqantapis wilanki.
8 Tikrapakuytapis mana kamäpakunaykipaqmi wamrata inchaqno waskawan liyatsishayki. Tsayno kanki wequränaykipaq nishqä junaqkuna cumplinanyaqmi.
9 “Trïguta, cebädata, häbasta, lentëjasta, mijuta* y avënata talurkur aqarkur mankaman churay. Tsay aqashqayki harinapitami tantata rurarkur mikunki kimsa pachak isqun chunka (390) junaq itsuq kaq lädupa wequrashpayki.
10 Cada junaq media libralata reqishqa höralacho mikunki.
11 Reqishqa höralacho pulan litru yakutapis cada junaq upunki.
12 Cebäda tantata shanshacho kuwashqaykino tsay tantata kuwarkur mikunki. Runapa chukrushqa ismayninwan shanshata rurarkur tsay tantata kuwanki. Tsayno ruranki lapan runakuna rikaykaptin”.
13 Mastapis TAYTA DIOS kayno nimarqan: “Tsaynömi Israel runakunapis qanra tantata mikupäkunqa jäpa nacionkunaman qarquptï”.
14 Tsaymi kayno nirqä: “¡Ay TAYTA DIOS! Manami imaypis qanrata mikushqätsu. Wamra kashqäpita patsa kikilan wanushqa uywapa aytsanta ni jirka uywakuna wanutsishqantapis manami mikushqätsu. Mana mikuna kaq aytsataqa manami yawaylapis yawashqätsu”.
15 Tsaymi Tayta Dios kayno nimarqan: “Runapa chukrushqa ismayninwan tantata kuwayta mana munarqa wäka karkawan kuwanki”.
16 Nirkur mastapis kayno nimarqan: “Runapa tsurin, Jerusaléncho mikuy ushakänanpaqmi kamakätsishaq. Tsaymi mikuyta tupushqalatana lakishqa mikupäkunqa. Yakupis tupushqalana kaptinmi mantsa mantsalana upupäkunqa.
17 Mikuypis yakupis ushakaptinmi pasaypa uyutashpan rikapänakur mantsakanqa. Jutsankunapita tsayno nakaykälarmi wanur ushakanqa”.
Ichic wilacuycuna
^ 4.9 Mijuqa juk casta tsaki mikuymi kaykan.
