Ezequiel 45:1-25
45 “ ‘Suerti jitaypa runakunata posisionta aypur NOQAPAQPIS juk partita rakipäkunki. Tsaypa largunmi kanqa ishkay lëwa pulan y anchunnami kanqa ishkay lëwa. Noqapaq rakishqayki partiqa *sagrädumi kanqa.
2 Tsay partichömi templupaq rakipäkunki chuskun lädunpa ishkay pachak pitsqa chunka (250) metruta. Intëru kuchunpami libri kanqa ishkay chunka pitsqa (25) metru anchu.
3 “ ‘Noqapaq rakishqayki partita ishkayman rakiykur juk partita tupupäkunki ishkay lëwa pulan larguta y juk lëwa anchuta. Tsaychömi templupis Lugar Santïsimupis kanqa.
4 Tsaynöpis tsay rakishqayki partiqa templucho sirvimaqnï cürakuna wayinkunata sharkatsinanpaqmi kanqa. Tsaychömi templupis kanqa.
5 Tsaynöla jukaq partitapis tupupäkunki ishkay lëwa pulan larguta y juk lëwa anchuta. Tsay parti kanqa templucho aruq *levitakunapaqmi. Tsaychömi paykunapis markankunata rurapäkunqa.
6 “ ‘Tsaypita noqapaq rakishqayki partipa nawpancho markata sharkatsinaykipaq tupupäkunki ishkay lëwa pulan larguta y pulan lëwa anchuta. Tsaynöpami noqapaq rakishqayki parti nawpankunapa wayikikunata sharkatsipäkunkipaq.
Mandaq autoridäpaq rakishqan posision
Ezequiel 48.21-22
7 “ ‘Tsaynölami mandaq autoridäpaqpis posisionta rakipäkunkipaq. Tsay posision ishkay partiman rakishqami kanqa. Juk parti kanqa inti jeqamunan kaq lädupa y jukaq partinami kanqa inti jeqanan kaq lädupa. Chawpinchömi noqapaq rakishqayki y markapaq rakishqayki parti kanqa. Inti jeqamunan kaq lädupa largun Israel nacionpa lindërunyaq tinkuranqa. Tsaynölami inti jeqanan kaq lädupapis largun Israel nacionpa jukaq lindërunyaq tinkuranqa. Tsaymi juk kuchunpita jukaq kuchunyaq largun kanqa nawpan kaq trïbukuna chaskishqan posisionpa largun kashqannöla.
8 Tsay posision kanqa mandaq autoridäpa chakranmi. Tsaynöpami churashqä mandaq autoridäkuna chakraykikunata mana qechushunkipaqtsu. Tsaypa trukanqa Israel nacioncho cada trïbupami chakrankuna kanqa.
Mandaq autoridä imano rurananpaqpis nishqan
9 “ ‘TAYTA DIOSMI kayno nin: Israel runakunapa mandaqninkuna, mana ali kaqkunata ama rurapäkuynatsu ni pitapis nakatsipäkuynatsu. Lapantapis munashqäno ali kaqlatana rurapäkuy. Kuyashqä runakunapa chakranta ama qechupäkuynatsu’. TAYTA DIOSMI tsayno nin.
10 “ ‘Balanzaykipis y tupuykipis exactu katsun.*
11 Efa tupupis y bato tupupis tsay tamäñula katsun. Chunka batukunaqa juk homermanmi yaykunqa. Tsaynölami chunka efakunapis juk homerman yaykunqa.*
12 “ ‘Pësanaykipaq siclo nishqan pësumi kanqa.* Juk sicluqa ishkay chunka (20) gera nishqanmi lasanqa. Soqta chunka (60) siclumi juk mina kanqa.
13 “ ‘Israel runakuna, trïgutapis y cebädatapis cosecharqa soqta chunka (60) partiman rakipäkunki. Nirkur juk parti kaqta mandaq autoridäman apapäkunki.
14 Aceitita aparqa cada pachak (100) bato tupupita jukta apapäkunki.
15 Uyshata aparqa cada ishkay pachakpita (200) juktami ali weranninta apapäkunki. Trïguta, cebädata, aceitita y uyshata apashqaykipitami mandaq autoridä churanqa tsaki mikuy ofrendapaq, rupatsina sacrificiupaq y jawka kawakuy sacrificiupaq. Tsaynöpami jutsa rurashqaykikunata perdonashaykipaq’. TAYTA DIOSMI tsayno nin.
16 “ ‘Israel nacioncho may markacho tashpaykipis tsay ofrendakunata apar Israelcho mandaq autoridäta entregapäkunki.
17 Cada wata rurapäkushqayki fiestakunacho, lulu killa fiestakunacho, jamay junaqkunacho y lapan fiestakunachöpis mandaq autoridänami kikinpa chakrankunapita sacrificiukunapaq apamunqa. Tsaynöpami kanqa rupatsina sacrificiupaq, tsaki mikuy ofrendapaq, vïnu ofrendapaq, purificatsina sacrificiupaq y jawka kawakuy sacrificiupaq. Tsaynöpami jutsa rurashqaykikunata perdonashaykipaq.
18 “ ‘TAYTA DIOSMI kayno nin: Cada wata qalaykunan killa punta kaq junaqchömi sänu turituta pishtarir templuta cüra purificanqa.
19 Tsay pishtashqan turituqa purificatsina sacrificiumi kanqa. Cürami templupa columnankunata, *altarpa chuskun esquïnancho patakninkunata y templu ruri kaq patiuman yaykuna punkuta pishtashqan turitupa yawarninwan tsaqtsupanqa.
20 Pipis mana yarpaypa o mana tantiyakuypa jutsata rurashqanpita perdonanäpaq wata qalaykuq killa qanchis kaq junaqchöpis tsaynölami cüra ruranqa. Tsaynöpami templuta purificanqa.
21 “ ‘Tsay qalaykunan killalacho chunka chusku junaqchömi *Pascua fiestata rurayta qalaykärinki. Tsay fiestataqa qanchis junaq rurapäkunki. Tsay junaqkunacho levadüraynaq tantata mikupäkunki.*
22 Fiesta qalaykunan junaqmi mandaq autoridä kikinpa jutsanpita y qamkunapa jutsaykikunapita sacrificiuta rupatsipäkunanpaq juk turituta churamunqa.
23 “ ‘Qanchis junaq fiesta kashqanyaqmi cada junaq rupatsina sacrificiupaq churamunqa qanchis sänu turitukunata y qanchis sänu carnikunata. Purificatsina sacrificiupaqnami juk chïvuta cada junaq churamunqa.
24 Cada turituta y cada carnita churamurmi ishkay chunka (20) kïlu tsaki mikuy ofrendata y kimsa litru pulan aceitita churamunqa altarman jichananpaq.
25 “ ‘Qanchis kaq killa chunka pitsqa junaqcho fiestata rurar* wakin kaq fiestakunacho churamushqannölami mandaq autoridä churamunqa. Tsayno churamunqa purificatsina sacrificiupaq, rupatsina sacrificiupaq, tsaki mikuy ofrendapaq y aceitita altarman jichananpaq.
Ichic wilacuycuna
^ sagrädu Liyinki santupita tantiyatsikuyta.
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ 45.10 Lev. 19.36.
^ 45.11 Bato nishqan tupumanmi ishkay chunka ishkay (22) litru yaku yaykun. Efa nishqan tupumannami ishkay chunka ishkay (22) litru tsaki mikuy yaykun. Tsaymi trïgu kaptin juk efa kaykan chunka qanchis kïluno.
^ 45.12 Juk sicluqa chunka juk grämumi karqan.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ Pascua fiesta Pascua fiestata Israel runakuna rurapäkun Tayta Dios Egiptupita jorqamushqanta yarpapäkurmi. Moisés qelqashqan leykunacho nishqannölami lapan olqu kaqkuna chunka ishkay watayuqpita janaman tsay fiestaman aywapäkuq. Warmikunapis tsay fiestaman aywapäkuqmi (Éxo. 12.1-28; Deut. 16.1-8; Mar. 14.12; 1Cor. 5.7).
^ 45.21 Éxo. 12.1-20; Núm. 28.16-25.
^ 45.25 Lev. 23.33-36; Núm. 29.12-38.
