Ezequiel 7:1-27
7 TAYTA DIOSMI kayno nimarqan:
2 “Runapa tsurin, NOQA nishqäta Israel runakunata kayno ninki:“ ‘¡Kay intëru nación ushakänanpaq kaq junaq chayaykämunnami!
3 ¡Ushakänaykipaq walkalanami pishiykan!Qamkunata castigaptïraqmi rabyaynï pasanqa.Jutsata rurapäkushqaykiman tupumi juzgashayki.Melanaypaq mana alikunata rurapäkushqaykipitami castigashayki.
4 Manami perdonashaykitsu ni kuyapäshaykitsu.Tsaypa trukanqa jutsata rurapäkushqaykiman tupumi juzgashayki.Melanaypaq mana alikunata rurapäkushqaykipitami castigashayki.Tsayraqmi TAYTA DIOS kashqäta tantiyapäkunkipaq’.
5 “Noqa TAYTA DIOSMI kayno nï:Qatinaylanpami desgracia qamkunaman chayaykämun.
6 Ushakänaykipaq walkalanami pishiykan.Castiganäpaq listunami kaykä.
7 “Judácho taq runakuna, ushakänaykipaq kaq junaq chayaykämunnami.Janaykichönami tsay junaq kaykan.Jirkakunachöpis kushikärinaykipa trukan lakikärinkipaqmi.
8 Qamkunata castiganäpaq manami aykäpis pishinnatsu.Fiyupa castigaptïraqmi rabyaynï pasanqa.Melanaypaq mana alikunata rurashqaykipitami pasaypa ushakätsishayki.
9 Manami perdonashaykitsu ni kuyapäshaykitsu.Tsaypa trukanqa jutsata rurapäkushqaykiman tupumi juzgashayki.Melanaypaq mana alikunata rurapäkushqaykipitami castigashayki.Tsayraqmi tantiyakärinkipaq noqa TAYTA DIOS castigaykashqäta.
10 “¡Ushakänaykipaq kaq junaq janaykichönami kaykan!¡Tsay junaq chayaykämunnami!Maytsaychöpis mana alikunata rurapäkurmi runa tukärinki.
11 Lutankunata rurarmi pïmaypis fiyu rikakushqa.Tsayno kashqanpita lapanmi ushakanqa.Ni riquëzankunapis manami quëdanqatsu.
12 “Tsay junaq janaykichönami kaykan.Castiganäpaq kaq hörapis chayamushqanami.Rantikuq kaq ni rantiq kaqpis ama kushikutsunnatsu.Fiyupa rabyarmi runakunata castigashaq.
13 Rantikuq runa mana wanurpis rantikunanpaq kaqkunata manami tarinqatsu.Runakunata ushakätsinäpaq wilakatsishqänölami lapanpis kanqa.Jutsata rurapäkushqanpita castigaptï manami pipis qeshpinqatsu.
14 “Fiyupa rabyakurmi lapan runakunata castigashaq.Tsaymi *cornëtata tukaptinpis guërraman aywananpaq pipis mana kanqanatsu.
15 Tsaypa trukanqa marka rurincho pesti qeshyawan y yarqaypitami wanupäkunqa.Marka waqtancho kaqkunatanami espädawan wanutsipäkunqa.
16 Wakinnami mantsakashqa palumano jirkakunaman qeshpir aywakärinqa.Jutsata rurashqanpita nakarmi lapan waqapäkunqa.
17 Lapanpis kalpaynaqmi rikakunqa.Mantsakuylawanmi qonqurninkunapis siksikyanqa.
18 “Qachqa röpata jatikurkurmi aqtsankunatapis qara putuypa rutukärinqa.Mantsakuypitami pasaypa siksikyanqa.Penqaytukushpanmi qaqlanpis pukayashqa uysurpanqa.
19 Rabyar ushakätsishqä junaq manami qellayninpis ni qorinpis salvanqatsu.Qellaynin kaptinpis rantinanpaq mikuy manami kanqatsu.Tsaymi qellaynintapis cällikunaman mashtarinqa.Qorintapis mana väliq qanratanömi jitarinqa.Tsayno kanqa qoripaq y qellaypaq rayku jutsata rurashqanpitami.
20 “Kuyaylapaq qori adornunkuna kaptinmi pasaypa runa tukärishqa.Tsay adornukunapitami melanaypaq ïdulukunata rurapäkushqa.Tsaymi tsay adornunkuna melanaypaq kanqa.
21 Kachariptïmi jäpa runakuna imaykantapis apakärinqa.Fiyu runakuna makitsakurmi lapan riquëzankunatapis apakärinqa.
22 Kuyaylapaq templüman suwakuna yaykuykur *impüruyätsiptinpis manami imatapis nishaqtsu.
23 “Kay nacionchöqa wanutsinakuylami kaykan.Markacho taqkunapis pelyalarmi karkaykan.Tsayno kashqanpitami cadinawan watarpanqa.
24 Noqami kamakätsishaq juk lädu nación fiyu runakuna chaykamur markacho taq runakunapa wayinkunata qechupäkunanpaq.Tsaynöpami munayniyuq Israel runakunapis munayniynaq kananpaq kamakätsishaq.Respitashqan *altarkunapis manami *sagrädunatsu kanqa.
25 Tsaymi runakuna fiyupa mantsakunqa.Jawka kawayta munarpis manami kamäpakunqatsu.
26 “Desgracialami qatinaylanpa chayanqa.Desgracia kananpaq kaqlatami pïmaypis rimanqa.Tapukäriptinpis profëtankuna wilananpaq revelacionta manami chaskinqanatsu.Cürakunapis runakunata yätsinanpaq leynïkunata manami yarpanqanatsu.Mayor runakunapis manami ima yätsiytapis kamäpakunqanatsu.
27 Reypis lakikurmi lütuta jatikunqa.Mandaqkunapis lapanmi lakikärinqa.Lapan runakunami mantsakuypita siksikyanqa.Imanöpis kawashqanman tupumi castigashaq.Runa mayinta juzgashqannölami kikinkunatapis juzgashaq.Tsayraqmi TAYTA DIOS kashqäta musyapäkunqa”.
Ichic wilacuycuna
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ sagrädu Liyinki santupita tantiyatsikuyta.
