Lucas 7:1-50
7 Runakunata parlapayta usharkurmi Capernaúm markaman Jesús aywarqan.
2 Tsaychömi Roma capitanpa kuyay ashmaynin pasaypa antsa qeshyaykarqan.
3 Tsay capitanmi Jesúspita parlapäkushqanta mayaykur Israel mayor runakunata kacharqan ashmayninta aliyätsiq pushamunanpaq.
4 Tsaymi paykuna chayaykur Jesústa ruwakurqan kayno nir: “Capitanpa ashmayninta aliyätsinaykipaq aywaykuläshun, tayta. Capitanqa ali runa karmi
5 marka mayintsikunatapis ali rikan y *sinagögantsitapis sharkatsipämashqantsi”.
6 Tsayno ruwakuptinmi paykunawan Jesús aywaykarqan. Wayiman chayananpaqna kaykaptinmi amïgunkunata capitán kacharqan Jesústa kayno ninanpaq: “Amashi afanakur aywankinatsu, tayta. Mana Israel runa kaykaptinqa manashi wayinmanpis yaykunkimantsu.
7 Tsayshi kikinqa mana shamushqatsu. Ashmaynin aliyänanpaq kaylapitashi niykunki.
8 Paypis mandaqninpa munayninchöshi kaykan. Tsaynöshi paypa munaynincho soldädunkunapis kaykan. Tsayshi mayqantapis ‘ayway’ niptinqa aywan, ‘shamuy’ niptinqa shamun y ashmayninta ‘kayta ruray’ niptinpis ruran”.
9 Tsayno wilapäkuptinmi Jesús kushikur paywan aywaykaq runakunata kayno nirqan: “Noqa kaynömi nï: Payno yärakamaq runataqa manami Israel runakunachöpis tarishqätsu”.
10 Capitán kachashqan runakuna kutiykurmi ashmayta aliyashqatana taripäkurqan.
Viüdapa wawanta Jesús kawaritsimushqan
11 Tsaypitanami discïpulunkunawan Jesús aywarqan Naín markaman. Paykunawanmi atska runakuna aywapäkurqan.
12 Markaman yaykuykarnami Jesús tinkurqan atska runakuna ayata aparkaykaqwan. Tsay ayaqa viüdapa juklayla mözu wawanmi karqan.
13 Viüda waqaykaqta rikarmi kuyapashpan Jesús kayno nirqan: “Ama waqaytsu”.
14 Tsayno nishpan kirmata yataykuptinmi aya apaqkuna ichiykurqan. Nirkurnami Jesús kayno nirqan: “¡Mözu, sharkuy!”
15 Tsayno niptinmi kawarirkamur parlayta qalaykurqan. Tsawraqa viüdata Jesús kayno nirqan: “¡Wawayki kawarimushqanami!”
16 Tsayta rikaykurmi lapan runakuna kushikushpan Tayta Diosta alabapäkurqan kayno nir: “¡Munayniyuq profëtami noqantsiman chayamushqa! ¡Tayta Diosmi kuyashqan runakunaman shamushqa!”
17 Tsaymi intëru Judeacho y nawpan markakunacho Jesús rurashqankunata mayapäkurqan.
Bautizaq Juanpa discïpulunkuna Jesúsman tapuq aywashqan
Mateo 11.2-6
18 Jesús rurashqankunata musyaykurmi Bautizaq Juanta discïpulunkuna wilarqan. Tsawraqa ishkay discïpulunkunata qayaykur
19 Señor Jesústa tapumunanpaq kacharqan kayno nir: “¿Qamkush kaykanki Tayta Dios kachamushqan Cristo o juktaraqkush shuyarpäshaq?”
20 Jesúsman chayaykurnami kayno nipäkurqan: “Bautizaq Juanmi musyayta munaykan, tayta. ¿Qamkush kaykanki shamunanpaq kaq Cristo o juktaraqkush shuyarpäshaq?”
21 Tapuq chayashqan hörami Jesús aliyaykätsirqan atska qeshyaqkunata, nakaykaqkunata, *supay nakatsishqankunata y atska qaprakunatapis.
22 Tsawraqa Jesús kayno nirqan: “Kutiykur Juanta wilapäkuy rikashqaykita y mayashqaykita. Qaprakuna rikannami. Makllukuna purinnami. *Leprawan qeshyaqkuna aliyashqanami. Upakuna wiyannami. Wanushkuna kawarimushqanami. Waktsakunapis Tayta Diospa ali wilakuyninta mayaykannami.
23 Yarpashqanno mana ruraptïpis mana ajayaypa noqaman yärakamaq runaqa kushishqami kawanqa”.
Bautizaq Juan Diospa profëtan kashqan
Mateo 11.7-15
24 Juanpa discïpulunkuna kutikäriptinnami runakunata Jesús kayno nirqan: “¿Ima rikaqtaq chunyaq jirkaman aywapäkurqayki? ¿Shoqushta wayra kuyutsiqta rikanaykipaqku?
25 O ¿ima rikaqtaq aywapäkurqayki? ¿Ali röpashqa runata rikaqku aywapäkurqayki? Musyashqaykinöpis reypa wayincho taq rïcu runakunalami ali röpan jatishqa karkaykan.
26 Tsayno kaptinqa ¿ima rikaqtaq aywapäkurqayki? ¿Profëtata rikaqku? Aw, profëta rikaqmi. Noqa kaynömi nï: Paynöqa manami mayqan profëtapis kashqatsu.
27 Juanta kachamunanpaqmi kayno qelqaraykan: ‘Nänita pitsaqno runakunata kamarikatsinanpaqmi wilakuqnïta puntaykita kachashaq’.*
28 “Noqa kaynömi nï: Lapan profëtapitapis Bautizaq Juanqa mas tantiyakuqmi. Tsayno kaptinpis Tayta Dios *mandaykashqanman tsayraq yaykuqkunaqa Juanpitapis masmi tantiyapäkun”.
29 (Juan wilakushqanta mayaykurmi impuestuta cobraqkunapis Tayta Diosta cäsukur Juan *bautizananpaq aywapäkurqan.
30 *Fariseukuna y ley yachatsiqkunami itsanqa Diosta mana cäsukur mana bautizakärirqantsu.)
Bautizaq Juanpaq y Jesúspaq runakuna parlapäkushqan
Mateo 11.16-19
31 Mastami Jesús kayno nirqan: “Kanan tiempu runakunata ¿imamanraq tinkutsïman? ¿Imanötaq karkaykan?
32 Paykunaqa pläzacho puklaq wamrakunanölami karkaykan. Tsay wamrakunami qayarpan kayno nir: ‘Pinkulluta tukaptïpis manami qatswankitsu. Ayapa cantanta cantaptïpis manami waqankitsu’. Tsay wamrakunanölami kanan tiempu runakunapis karkaykan.
33 Bautizaq Juan tantata mana mikuptin y vïnuta mana upuptinmi kayno nirkaykanki: ‘¡Payqa *supaypa munayninchömi kaykan!’
34 *Runapa Tsurin mikuptin y upuptinmi kayno nirkaykanki: ‘¡Kay runaqa mikular upularmi purikun! ¡Impuestu cobraqkunapa y jutsasapa runakunapa yanasanmi!’
35 Tsayno niptikipis discïpulükuna Tayta Dios munashqanno kawaptinmi Juanta y noqata Tayta Dios kachamashqan tantiyakaykan”.
Jutsasapakuna perdonashqa kar Tayta Diosta mas kuyashqan
36 Tsaypitanami *fariseo runa Jesústa pusharqan wayincho mikupäkunanpaq. Chayaykurnami mësaman Jesús jamaykurqan.
37 Fariseupa wayincho Jesús mikuykashqanta mayaykurmi *wayrapakuq warmi alabastro rumipita rurashqa pömuwan perfümin aptashqa chayarqan.
38 Jesúspa qepanman qonqurpakuykur waqaptinmi chakinman weqin juturqan. Tsay jutushqantanami aqtsanwan tsakirkatsir Jesúspa chakinta mutsaykushpan apashqan perfümita winaparqan.*
39 Tsayta rikaykurmi wayinman pushaq fariseo kayno yarparqan: “Kay runa Diospa profëtan karqa tantiyanmanmi jutsasapa warmi yataykashqanta”.
40 Tsawraqa Jesús kayno nirqan: “Simón, wilashayki”.
Niptinmi kayno nirqan: “Mä wilaykalämay, *rabí”.
41 Tsawraqa Jesús kayno nirqan: “Ishkay runashi juk runapa jaqan karqan. Jukninshi pitsqa pachak (500) junaq arur gänashqanno jaqan karqan. Jukaqnashi pitsqa chunka (50) junaq arur gänashqanno jaqan karqan.
42 Imanöpapis pägayta mana puëdiptinshi ishkantapis mana cobrarqannatsu. Kanan mä nimay. ¿Mayqan kaqtaq tsay qellayniyuq runata mas kuyanqa?”
43 Tsawraqa Simón kayno nirqan: “Mas atska jaqan kaq runachari, tayta”.
Niptinmi Jesús kayno nirqan: “Alimi tantiyashqanki”.
44 Tsayno nirkurnami warmita rikärir Simónta kayno nirqan: “Kay warmi rurashqanta ¿rikashqankiku? Qamqa wayikiman yaykamuptï chakïta awikunäpaq manami yakuta kamaripämashqankitsu. Kay warmimi itsanqa weqinwan chakïta ushmarkatsir aqtsanwan tsakitsipämashqa.
45 Qamqa manami winchikamar mutsamashqankitsu. Paymi itsanqa yaykamushqanpita patsa mana kachaypa chakïta mutsashqa.
46 Umämanpis manami aceitita winapämashqankitsu. Paymi itsanqa chakïman perfümita winapämashqa.
47 Tsaymi kayno nï: Kay warmiqa atska jutsankunata perdonaptïmi pasaypa kuyamar tsayno rurashqa. Wakinmi itsanqa jutsaynaq kashqanta yarpar janan shonqula kuyaman”.
48 Nirkur tsay warmita kayno nirqan: “Lapan jutsaykikunatami perdonä”.
49 Tsaymi mësacho jamarpaykaq runakuna kikinpura kayno parlapäkurqan: “¡Pitaq payqa runapa jutsanta perdonananpaqqa!”
50 Jesúsnami tsay warmita kayno nirqan: “Yärakamashqaykipitami salvashqa kaykanki. Kananqa kushishqana aywakuy”.
Ichic wilacuycuna
^ sinagöga Sinagögaqa Israel runakuna juntakänan wayimi karqan. Tsaymanmi juntakäriq Tayta Diosta manakärinanpaq, Moisés qelqashqan leykunata yachakärinanpaq, sesionkunata rurapäkunanpaq y wamrakuna liyiyta yachakärinanpaq (Mar. 1.21; Juan 9.34; Hech. 15.21).
^ supay Supaykunaqa Tayta Diosta mana cäsukuq angilkunami kaykan. Paykunami Satanás mandashqanta rurar runakunata qeshyatsin, löcuyätsin, chikinakatsin y yarpayninta pantakätsin Tayta Diospa ali wilakuyninta mana tantiyapäkunanpaq (Mat. 12.43-45; Mar. 1.23-26; Luc. 8.2). Masta musyanaykipaq liyinki Satanáspita tantiyatsikuyta.
^ lepra Lepra qeshyaqa runapa qarancho tukuy casta qerikunami karqan. Israel nacioncho lepra qeshyawan qeshyaykaqkunaqa markapita juk läduchömi täkäriq (Lev. 13.45-46). Paykunataqa runakuna manami yataylapis yataqtsu (Lev. 22.5). Tsayno kaptinpis Jesucristo munayniyuq karmi leprawan qeshyaykaqkunata yataykur aliyätsirqan (Mar. 1.40-43).
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
^ bautizay Jesucristuta chaskikuqkuna bautizakurqa runakunata musyatsipäkun jutsankunata kacharishqanta, Jesucristuman yärakärishqanta y Jesucristuta cäsukärinanpaq kashqantami. Discïpulunkunatami Jesucristo nirqan payta chaskikuqkunata bautizananpaq (Mat. 28.19; Mar. 16.16).
^ fariseo runa Fariseukunaqa Moisés qelqashqan leykunata lapantami yachakärirqan. Tsay leykuna jananmanmi mas leykunata y costumbrikunata yapapäkurqan (Mar. 7.1-4). Tsaykunata yachaykarpis runa mayinta manami kuyarqantsu (Mat. 16.5-12; 23.1-36).
^ supay Supaykunaqa Tayta Diosta mana cäsukuq angilkunami kaykan. Paykunami Satanás mandashqanta rurar runakunata qeshyatsin, löcuyätsin, chikinakatsin y yarpayninta pantakätsin Tayta Diospa ali wilakuyninta mana tantiyapäkunanpaq (Mat. 12.43-45; Mar. 1.23-26; Luc. 8.2). Masta musyanaykipaq liyinki Satanáspita tantiyatsikuyta.
^ Runapa Tsurin Runapa Tsurinpaq parlarqa Jesucristo kikinpaqmi parlarqan (Juan 9.35-37). Tsaynöpami tantiyatsirqan Daniel 7.13-14-cho qelqaraykashqanno Runapa Tsurin kashqanta, kutimunanpaq kashqanta (Mat. 13.41-42; 24.27, 30, 44; 25.31) y lapanpaq munayniyuq kashqanta (Mar. 2.10; 2.28).
^ fariseo runa Fariseukunaqa Moisés qelqashqan leykunata lapantami yachakärirqan. Tsay leykuna jananmanmi mas leykunata y costumbrikunata yapapäkurqan (Mar. 7.1-4). Tsaykunata yachaykarpis runa mayinta manami kuyarqantsu (Mat. 16.5-12; 23.1-36).
^ wayrapakuq warmi Wayrapakuq warmiqa pägupaq rayku jukwan jukwan kakuq warmimi kaykan. Tsayno warmikunata Tayta Dios imaypis mana perdonananpaq kashqanta runakuna yarpaptinpis Jesucristuqa nirqan jutsankunata kacharir Tayta Dios munashqanno kawarqa perdonashqa kananpaq kashqantami (Mat. 21.31-32; Heb. 11.31).
^ 7.38 Tsay witsanqa runakuna pampaman wequykurmi mikuq. Tsayno mikuykaptinmi Jesúspa chakinman perfümita winaparqan.
^ rabí Rabíqa Tayta Diospa palabranta yachaq y yachatsiq runami karqan. Jesucristo kawashqan witsanmi Tayta Diospa palabranta yachatsir markan markan rabíkuna puripäkurqan. Rabíkunawanmi wakin runakunapis yachakuyta munar puripäkurqan. Tsay runakunatami rabípa discïpulun kashqanta nipäkurqan. Jesucristupis rabími karqan (Juan 1.38; 3.2, 26; 4.31; 6.25).
