Romanos 6:1-23
6 Tsayno kaptinqa Tayta Dios mas kuyapämänantsipaq ¿jutsata rurartsuraq kawashun?
2 ¡Manami! Noqantsiqa jutsa ruraypaq wanushqanönami kaykantsi. Tsayno kaykarqa ¿imanöparaq jutsata rurar kawashwan?
3 ¿Manaku musyapäkunki Jesucristo cruzcho wanushqanno noqantsipis *bautizakushpantsi jutsa ruraypaq wanushqanöna kashqantsita?
4 *Bautizakushqantsi hörami Jesucristuwan pampakuqno kashqantsi. Tsaypitami Jesucristuta Tayta Dios munayninwan kawaritsimushqanno noqantsitapis mushuq kawayta qomashqantsi.*
5 Jesucristo wanushqanno noqantsipis jutsa ruraypaq wanushqa kaykarqa pay kawarimushqannömi kawarimushunpaq.
6 Shumaq tantiyakushun. Unay kawaynintsiqa Jesucristuwan cruzcho wanushqanami kaykan. Tsaymi kananqa jutsa ruraypa munayninchönatsu kaykantsi.*
7 Wanushkuna jutsata mana rurashqannömi noqantsipis jutsata mana ruraypa kawanantsipaq kaykantsi.
8 Tsaymi kananqa Jesucristuwan wanushqana kar musyantsi paypa makinchöna kawanantsipaq kashqanta.
9 Tsaynöpis musyantsi Jesucristo kawarimushqana kar imaypis manana wanunanpaq kashqanta. Payqa wanuyta vincishqanami.
10 Juk kutila wanurmi jutsa ruraypita jorqamänantsipaq wanurqan. Kananqa Tayta Diospa nawpanchönami kawaykan.
11 Tsaynöla qamkunapis jutsa ruraypaq wanushqanöna kapäkuy. Kananqa [Señornintsi] Jesucristucho kashpayki Tayta Dios munashqanno kawapäkuy.
12 Tsayno kaykaptinqa jutsa ruraypa munaynincho amana kawapäkuynatsu. Shonquyki jutsa ruraypaq rapita rapiptinpis ama rurapäkuytsu.
13 Lutan ruraykunamanpis ama jatikaytsu. Wanushqaykipita kawarimushqano kaykarqa Tayta Diospa makinchöna kawapäkuy. Lapan cuerpuykipis Tayta Dioslapaqna katsun.
14 Manami Tayta Diospa leyninkunata cumplishqaykiman yärakurtsu salvakärinki, sinöqa kuyapäkuq Tayta Diosman yärakurmi. Tsayno karqa manami jutsa ruraypa munayninchönatsu karkaykanki.
Tayta Dios patronnintsi kashqanta tantiyatsishqan
15 Kuyapäkuq Tayta Diosman yärakur salvacionta chaskiykarqa ¿jutsata ruralartsuraq kawapäkushun? ¡Manami!
16 Jutsata ruralar kawaptintsiqa jutsa ruraymi patronnintsi rikakun. Ashmayninta lapan munashqanta patrón ruratsishqannömi jutsa ruraypis patronnintsi kar munashqanta ruratsimantsi. Tsayno kawarqa castigashqami kashun. Patronnintsi Tayta Dios kaptinmi itsanqa salvacionta chaskintsi.
17 Nawpataqa qamkunapapis jutsa ruraylami patronniki karqan. Kananqa Jesucristupa wilakuyninta lapan shonquykiwan chaskikushqa karmi Jesucristupa munayninchöna karkaykanki. Tsaymi Tayta Diosta agradëcikü.
18 Jutsa ruraypa munayninpita jorqushqana karmi Tayta Dios munashqanta ruralarna kawarkaykanki.
19 Patronman tinkutsiypa tsayno parlaykä shumaq tantiyapäkunaykipaqmi. Nawpataqa jutsa ruraypa munaynincho karmi melanaypaq kaqkunata rurar kawapäkushqanki. Tsaynöqa amana kawapäkuynatsu, sinöqa jutsata mana ruraypa Tayta Dios munashqannöna kawapäkuy.
20 Jutsa ruraypa munaynincho karqa Tayta Diosta mana cäsukuypami kawapäkurqayki.
21 Tayta Diosta mana cäsukur ¿ima alitataq jorqupäkushqanki? Tantiyakuptikiqa tsay lutan rurashqaykikuna lapanpis penqakuypaqmi kaykan. Tsayno kawashqaykipitami wanupäkunkipaq.
22 Kananqa jutsa ruraypita jorqushqana karmi Tayta Diospa makinchöna kawarkaykanki. Tsaymi pay munashqanno kawanaykipaq yanapaykäshunki. Tsayno kawarmi paypa nawpancho imayyaqpis kawapäkunki.
23 Jutsa rurayqa wanuymanmi apamantsi. Señornintsi Jesucristo noqantsi rayku wanushqa kaptinmi Tayta Dios dembaldila salvamantsi nawpancho imayyaqpis kawanantsipaq.*
Ichic wilacuycuna
^ bautizay Jesucristuta chaskikuqkuna bautizakurqa runakunata musyatsipäkun jutsankunata kacharishqanta, Jesucristuman yärakärishqanta y Jesucristuta cäsukärinanpaq kashqantami. Discïpulunkunatami Jesucristo nirqan payta chaskikuqkunata bautizananpaq (Mat. 28.19; Mar. 16.16).
^ bautizay Jesucristuta chaskikuqkuna bautizakurqa runakunata musyatsipäkun jutsankunata kacharishqanta, Jesucristuman yärakärishqanta y Jesucristuta cäsukärinanpaq kashqantami. Discïpulunkunatami Jesucristo nirqan payta chaskikuqkunata bautizananpaq (Mat. 28.19; Mar. 16.16).
^ 6.23 Prov. 12.28.
