Jipashman ticrashgä wichanga Diosta sirviyta munargänachu. Escuelächomi ricargä waquincuna munashgalanta ruracojta y noga nirgä ‘paycunanola nogapis cäman’. Taytäcuna mandamashganta y Biblia nishgancunataga ruranapäga sasatanomi ricargä, ima ruraylatapis munargänachu. Nogapäga Jehová Diosga cieluchomi caycargan, pero payta sirvinäpäga imapis yanapämajchu.

Aywacuytaga aywacurgächu Diospa nawpanpita, pero ichiclatanami predicaciuncho ruraj cä waquincuna ricamänanlapaj. Manami ichiclatapis yachacojchu cä predicaciunman manaraj yargur, chaymi piwanpis shumaj Diospita parlajchu cä, ni pitapis cutinäpaj awnipajchu cä. Shongüga juc laduchonami caycargan, chaymi cayno tapucurgä: “Sasa caycaptinga ¿imata ashirtaj puncun puncun puriycäshaj?”

17 watayojna caycar mananami munargänachu taytäcunawan cawayta, chaymi Australia naciunpa aywacurgä. Paycunaga laquicärirganmi,  imano captinpis jaguirganmi aywacunäta. Diosta mana jaguinäpaj cajtaga musyapäcurganchi.

Australia naciunchoga más laquicuyparaj cawaynï ticracurirgan. Lapan reuniuncunaman aywargänachu, öraga waquin jovincunawan juntacaycurmi fiestapa aywacärej cä. Shongüga raquicashganomi caycargan, ima ruraylatapis camäpacurgänachu.

Juc ishcay wata pasarcuptinmi Tamara jutiyoj nanawan reguinacurgä. ¡Ima alitaj payga chayaramurgan! Chay wichanpäga cawaycargä majaynaj pichga nanacunawanmi, Tamara nanaga runanwanmi congregaciunta watucaj, y nogacunaga nipäcurgä wasinchicho posadacunanpämi. Runan mana caycashgan horaga cushi cushilami paywan parlapacärej cä. Nogacunanolami cargan, imalapitapis wilanacärejmi cä.

Tamara nanaga alapami Tayta Diosta cuyaj, runacunata yachachiptinpis ganas ganaslami ruraj. Paytaga cushishgala Diosta sirviycajtami ricargä, noga ichanga Diostaga mana sirviycargächu lapan shongüwan. Mana uticaypa Jehovapa cajcho rurashganga cushicuypaj cargan. Rurashganta ricashgämi yarpächimargan cayno Biblia nishganta: “Kushisqala payta adorapäkuy. Nawpanman kushishqa cantar yaykapäkuy” (Sal. 100:2).

Imanomi nana Tamara Diosta sirvir cushishgala caycargan, chaynolami nogapis cawayta munargä, chaypäga calpachacunärämi cargan. Tiempuraj pasargan cambiucunata ruranäpaj. Nawpalapita shumaj yachacurir-rämi predicaciunmanpis yargurgä y precursor auxiliarnopis yanapacurgämi. Chayno cada cadala Diospita yachachicurga manchacoj cashgäpis ilacaycashgana. Bibliata quichaycur waquincunata parlapaptïga alapami cushichimaj, chaymi más  tiempupana precursor auxiliarno yanapacurgä.

Amigücunatapis acrarmi galaycurgä, Diosta cuyajcunata y ganas ganasla arojcunata. Chayno paycunawan juntacushgämi yanapämargan tiempöta camäcachir y Bibliata shumaj estudiar Diosta sirvinäpaj. Tiempuwanga predicaciunlacho cacuyta munargä, chaynami precursor regularnona yanapacurgä. Rurashgäcunapitaga cushicurgämi, hermanuläcunapita raquicayta munargänachu.

Tiempo pasarcuptinga Alex turiwanmi reguinacurgä, payga ali shongu y Diosta cuyaj runa cargan. Precursor regularno sojta watapana yanapacuycargan y siervo ministerialnopis. Malaui naciunchopis payga Diospita yachachicuycargan, chaychoga walcaj yachachicojcunalashi caj. Chay naciunchoga tincurganshi misionerucunawan, paycunaga alapashi yanapargan cawaynincho imapitapis Dioslata sirvinanpaj.

2003 watachomi Alex turiwan casacärirgä. Ishcäcunami canancama Diosta sirvir carcaycä. Cawaynïcunachoga imaycatami yachacärishcä y Jehovapa maquintapis ricapäcurgämi.

Timor Oriental (Indonesia caj ladupa) sitiupa aywapäcunäpami 2009 watacho invitapäcamargan. Cushicärirgämi chayta musyarga, jina yarpachacärirgämi chaypa aywanapaj imano cananpaj. Pichga quillacuna pasarcuptinga Dili marcaman chayapäcurgä.

Juc marcaman chayarga imapis mushojlami caycan, imano cawapacushgan, rimaynincuna y micuynincunapis. Puncun puncun aywarmi taripäcoj cä ichiclawan cawaj runacunata, waquincunaga leiylatapis yachajchu.  Guerraraycur chay runacuna imano cawashgantapis ricapäcurgämi. *

¡Amatarmi cushicärej cä predicaciuncho caycarga! Juc cutichomi tincurgä 13 watayojla, María * jutiyoj wamrawan. Payga laquishga caycargan, mamäninmi wanushgana cargan y taytanwanpis manash cawajchu. Maypapis aywayta, imano cawaytapis manash shumaj tantiajchu. Chaypita wilapämarga payga wagarejrämi. Juc idiomacho parlapämaptinmi shumaj tantiapajchu cä. Chauras Tayta Jehovata ruwacurgä imanolapapis yanaparcunäpaj. Chaypitana Bibliata leipargä shacyächinäpaj. Watacuna pasarcuptinna cay jipashga mastaraj Diospita yachacurgan y imayca cambiucunata rurargan. Nircurpis bautizacurgan y cananga waquincunatanami Bibliapita yachaycächin. Hermanucunawanmi cushi cushila cananga cawacun.

Jehovapa yanapacuynincunawanga imaycacunami ruracaycämun Timor Oriental naciuncho. Cay guepa watacunataga achcajmi bautizacärishga, waquincunaga precursorno, siervo ministerialno o ancianuno sirviycan. Waquincunana chay marcacunacho parlaj juc idiomacunamam ticrachiycan publicaciunninchicunata. Reuniuncho cantapäcushganta wiyarga, imano Diosta sirvir calpachacärishganta ricarga cushicuypämi nogacunapaj cargan.

Australia naciunchoga jucnopa cawacärë, Timor Oriental sitiuchopis runacuna jucnopa cawacärïn. Pero yachacärishcä y cushishga cawapäcurgä. Öraga carruwanraj maylapapis aywarga, chaycho runacuna wichächimoj chaquishga pescaducunata y mercadupita rantipacamushgantapis. Jina Bibliapita yachachicurpis öraga tacsha wasilamanmi pasachipäcamaj, imanomi chaychoga achachaycoj, walpacunapis ‘taraj taraj’ nirmi saltacachaj. Imano captinpis ¡cushicuypämi cargan! chaycho runacunata yachachiyga.

Wamralaraj cashgä wichanman yarpachacuptïga, yarpämi imano taytäcuna Jehovapita yachachimashganta, paycunaga cuyapämashpanmi chay sasa tiempucho yanapämargan. Proverbios 22:6 texto ima nishgantaga manami gongächu. Mamänïga papänïga Jehovata sirvipäcushgäpita cushishgami carcaycan nogawan y runäwanpis. 2016 watapitana congregaciuncunata watucar sirvircaycä Australasia sucursal ricashgan naciuncunacho.

Imanir-raj juc tiempucho Diospita yachachicuyta munargächu, tantiargächu Diospaj arur-raj cushishga cawacushganchita. Cananga imacunapa pasarpis cushi cushilami Jehovata sirvircaycä. Casacurishgäpita ishcäcuna Diosta sirvishgäcunaga alapami cushichipäcamash. Bibliacho David cayno nishganga shumajmi caycan: “Qamman yärakamuqkunaqa kushikäritsun. Ali rikashqaykipita imaypis alabaykuläshunki. Kuyashuqnikikunaqa imaypis kushishqa kawapäkutsun” (Sal. 5:11).