DIOS aunishgan Pachacho cawaj israelitacunaga año seglar nishganta galaycärej chacracunacho arur y murupacur. Y chayga cargan canan reguishganchi setiembre-octubre quillacuna wichan.

Juc quilla ayca junajcuna cashganta musyapäcunanpäga Quillata ricapäcoj. Y Intiwanna musyapäcoj juc wata ayca junajcuna cashgantapis. Pero Quillata ricar juc wata ayca tiempo cashganta yupashganga manami igualchu cargan Intiwan yupashganwanga. Chaymi runacunaga watacho waquin quillacunata juc junaj masta yaparcoj. Chaynopa paycuna chacracunacho arur y murupacur wichanwan tincunanpaj.

Ichanga Moisespa tiempuncho Jehová marcanta nergan mushoj caj wataga abib (o nisán) nishgan quillacho galaycunanpaj, chayga cargan canan reguishganchi marzo-abril quillacuna wichan (Éx. 12:2; 13:4). Chay quillacho israelitacuna juc fiestata rurapäcurmi Jehovapaj apapäcunan cargan cebada cosechashganpita punta caj wayuynincunata (Éx. 23:15, 16).

Emil Schürer jutiyoj estudioso runaga nin: “Unaycho waquin quillacunaman juc junajta yaparcunanpäga caytami cuentaman churaj: Pascua fiestataga ruracänan Nisán quillacho, quilla pura captin (14 de Nisán) y cayga imaypis canman cargan primavera wichancho, junajpa y chacaypa horancuna igual cashganpita pasariptinraj [...]. Ichanga chayno mana captenga, wata ushashgancho juc mushoj quillata yaparcoj nircur-raj Nisán quilla galaycunanpaj” (Historia del pueblo judío en tiempos de Jesús 175 a. C. - 135 d. C., traducción de J. Cosgaya y A. Piñero).

Jehovapa testiguncunaga chaynolami ruranchi Jesuspa wanuyninta imay junaj yarpänapaj, hebreo calendariutami ricanchi 14 de nisán nishgan junaj, imay junaj cashganta musyanapaj. Nircur lapan congregaciuncunata musyachicun Jesús wanushganta imay junaj yarpänapaj. *

Pero ¿imanotaj hebreo runacuna musyapäcurgan imaytaj juc quilla galaycushganta y imaytaj juc quilla ushashganta? Canan wichanga celularninchita o almanaquicunata ricarmi musyanchi imay junaj cashganta. Pero unay tiempuchoga manami chaynochu cargan.

Noepa tiempunchoga cada quillacuna 30 junajcunayojmi cargan (Gén. 7:11, 24; 8:3, 4). Ichanga tiempuwan hebreo calendariuta camacächiptin manami lapan quillacuna 30 junajcunayojchu cargan. Mushoj caj quillataga yupayta galaycoj 29 o 30 junajcuna pasariptinraj guepa caj quilla galaycushganpita.

Juc cuticho Davidwan Jonatán juc mushoj quilla galaycunanpaj parlarmi nergan: “Wara junajmi llullu quilla” canga (1 Sam. 20:5, 18). Chauraga cayga ninanmi achca watacuna pishiycaptin Jesús cay Pachaman shamunanpaj runacunaga musyapäcurganna imay juc quilla galaycushganta y imay ushashgantapis. ¿Y imanotaj israelitacunaga musyapäcurgan imaytaj juc quilla galaycamunanpaj? Chaypäga tantiarcushun Misná nishgan libro ima wilacushganta, chaychomi wilacun judiucunapa costumbrincunapita y leynincunapitapis. Judiucuna marcanman cutipäcamurshi, más autoridäyoj cajcunaga (Sanedrín nishgan) watacho ganchis quillacunapa 30 caj junajninchoshi tuta tutala juntacärej camacächinanpaj imaytaj gatejnin caj quilla galaycunanpaj. ¿Imatataj rurapäcoj chayta camacächinanpaj?

Waquin runacunata cachaj Jerusalén marcapa acrashgan sitiucunaman aywar chacaypa cielo azulyaraycajta ricachacunanpaj. Paycuna ricaptin Quilla ichicla winaycajta, jucla cutipäcamur Sanedrín nishganta wilacärej. Chauraga paycuna wilacushganta shumaj tantiarcurna, Sanedrín nishgan wilachicärej juc mushoj quilla imay galaycunapaj cashganta. Y pucutay cieluta chaparashganraycur Quilla mana ricacaptenga, wilachicärej  aywaycaj quilla 30 junajcunayoj cananpaj y nircur mushoj quillana galaycunanpaj.

Misná libro wilacun Sanedrín nishgan camacächishgantaga musyachicärej ninata ratarcachir Jerusalén marca, Olivos jircacho y Israelpa waquin jircacunapa puntancho. Tiempuwan ichanga wilacojcunawan wilachicärej, chauraga Jerusalenpita judiucuna may chaycho caycaptinpis musyapäcurganmi imaytaj mushoj quilla galaycushganta, chaynopa ima fiestatapis chay junajla lapan marcacunacho rurapäcoj.

Uracho caycaj recuadruga tantiachimanchi hebreo calendariucho quillacuna, fiestacuna y chay wichancuna ima ruracashgantapis.