Ri makaj are uchomaxik o ubʼanik jun jastaq che kʼo ta pa ri utaqanik ri Dios (1 Juan 3:4; 5:17). Ri Biblia xuqujeʼ kubʼij che are jun makaj chiʼ kqabʼan ta ri utzilal o ri kqaj chuwach ri Dios (Santiago 4:17).

 Pa ri idiomas originales re ri Biblia, ri e tzij che kkoj che «makaj» kraj kubʼij kchʼakan taj o kuriq taj. Jun kʼutbʼal, jun jupuq ajchʼojabʼ re ri ojer Israel sibʼalaj kekunik kekʼaqan rukʼ ondas y «mawi jubʼiqʼ kjechʼobʼ ri kiqʼabʼ». We ta kbʼan traducir literalmente wajun tzij riʼ, kraj kubʼij «kemakun taj» (Jueces 20:16). Rumal laʼ, makunik kraj kubʼij che kbʼan ta ri kubʼij ri utaqanik ri Dios.

 Rumal che ri Dios are ri Bʼanol qe, ri areʼ kkunik kuyaʼ pixabʼ chqe (Apocalipsis 4:11). Chqajujunal ri Dios kutaʼ na chqe ri xqabʼano (Romanos 14:12).

¿La kʼo jun winaq che mat kmakunik?

 Kʼo taj, ri Biblia kubʼij: «konojel kʼut e makuninaq. E najtajisam che ri ujuluwem ri Dios» (Romanos 3:23; 1 Reyes 8:46; Eclesiastés 7:20; 1 Juan 1:8). ¿Jasche je kkʼulmataj wariʼ?

 Nabʼe kanoq ri Adán y Eva kemakun taj rumal che e tzʼaqat taq winaq xebʼanik je jas ri uwachbʼal ri Dios (Génesis 1:27). Are chiʼ xemakunik xeniman ta chi che ri Dios (Génesis 3:5, 6, 17-19). Are chiʼ xekʼojiʼ kalkʼwal xkiqʼaxej kan ri makaj y ri kamikal chke (Romanos 5:12). Rumal laʼ ri qʼatal tzij David xubʼij: «In lawalo qas are taq xinalaxik» (Salmo 51:5).

¿La kʼo makaj más itzel chuwach jun chik?

 Jeʼ kʼolik, jun kʼutbʼal ri Biblia kubʼij che konojel ri e kʼo pa ri ojer Sodoma «sibʼalaj e itzel taq winaq, xuqujeʼ chi sibʼalaj e nimaʼq taq ajmakibʼ» (Génesis 13:13; 18:20). Chqilaʼ oxibʼ jastaq che kukʼut ri ubʼanik jun mak.

1.   Ri unimal. Ri Biblia kubʼij che ri inmorarilidad sexual, ri kiqʼijilaxik tyox, ri elaqʼ, ri qʼabʼarik, ri kamisanik, ri qʼijinik o apachike jastaq che kʼo ubʼanik rukʼ ri itzel taq uxlabʼal e nimaʼq taq makaj che utz taj kqabʼano (1 Corintios 6:9-11; Apocalipsis 21:8). Ri Biblia kubʼij che ubʼanik ri e mak riʼ junam ta kukʼ nikʼaj chik che qachomam ta ubʼanik, junam rukʼ are chiʼ kqabʼij o kqabʼan jun jastaq che kubʼan kʼax che jun winaq (Proverbios 12:18; Efesios 4:31, 32). Ri Biblia xuqujeʼ kubʼij che rajawaxik kqachajij qibʼ chuwach apachike makaj, rumal che weneʼ kubʼano che kqabʼan jun nimalaj makaj (Mateo 5:27, 28).

2.   Ri rumal che kbʼanik. Jujun taq winaq kkibʼan makaj rumal che ketaʼm ta ri kubʼij ri utaqanik ri Dios (Hechos 17:30; 1 Timoteo 1:13). Are kʼu ri Biblia kubʼij che ri winaq riʼ, e junam ta kukʼ ri nikʼaj chik che xa chubʼanik kkibʼano keniman taj (Números 15:30, 31). Ri Biblia kubʼij che ri winaq che xa chubʼanik kubʼano kmakunik kʼo jun «itzelalaj [...] ranimaʼ» (Jeremías 16:12).

3.   Jampaʼ mul kbʼanik. Ri Biblia kubʼij che ri winaq che xa jumul kmakunik junam ta rukʼ ri jun che amaqʼel kmakunik (1 Juan 3:4-8). Ri Dios itzel keril ri winaq che paneʼ ketaʼm ri utaqanik kkiya ta kan ubʼanik ri makaj (Hebreos 10:26, 27).

 Ri winaq che kibʼanom jun nimalaj mak weneʼ kebʼisonik. Jun kʼutbʼal ri qʼatal tzij David xubʼij: «Ri wetzelal in kiqajbʼem; je jas jun alalaj eqaʼn ri man kinchʼij taj» (Salmo 38:4). Are kʼu ri Biblia kuya wajun kubʼsal kʼuʼx riʼ: «Ri itzel winaq cheʼuyaʼ kan ri itzel taq uchomanik chixtzelej rukʼ ri Ajawaxel, kel kʼu na ukʼuʼx chiwe chixtzelej rukʼ ri qaDios, xaq kʼu ix reyem che usachik ri imak» (Isaías 55:7).