E jujun levitas che e kojol ta tabʼal toqʼobʼ kkibʼan nikʼaj chi chak pa rachoch ri Dios, jun chke ri chak riʼ are kechajinik. Ri kinimal ri chajinelabʼ are kyaʼow kichak. Ri escritor judío Filón xubʼij jas ri chak kkibʼano: «Jujun chke are kkichajij ri uchiʼ ja; e jujun chik e kʼo chupam ri ja chuwach ri tastalikalaj kʼolbʼal, rech ri e winaq keʼok ta pa ri lugar che yaʼtal ta bʼe, weneʼ xa rumal che ketaʼm taj o xa kkaj kekilaʼ ri kʼo chilaʼ; nikʼaj chik kechajin chaqʼabʼ xuqujeʼ pa qʼij, kbʼan jun sorteo rech kkilo jampaʼ kechajinik».

Wajun jupuq chajinelabʼ riʼ xuqujeʼ kechakun pa ri Sanedrín. Ri qʼatal tzij romano uyaʼom bʼe chke rech kkekʼaj kichʼichʼ.

Ri especialista Joachim Jeremias kubʼij: «Jesús xubʼij chke ri chajinelabʼ ri xechapowik, che ronojel taq qʼij xtʼuyiʼ chuwach ri rachoch ri Dios che ukʼutik chkiwach ri winaq chrij ri Dios, are kʼu xkichap ta chilaʼ» rumal laʼ, ri tzij che xubʼij ri Jesús kʼo ta upatan riʼ wet mat are ri chajinelabʼ rech ri rachoch ri Dios ri xechapowik (Mat. 26:55). Ri especialista riʼ xuqujeʼ xubʼij che are ri chajinelabʼ riʼ ri xkaj xkichap ri Jesús pa ri jumul kanoq (Juan 7:32, 45, 46). Qʼaxinaq chi ri tiempo, xyaʼ ri taqanik chke ri chajinelabʼ xuqujeʼ che ri kicapitán che kkikʼam bʼi ri utijoxelabʼ ri Jesús chuwach ri Sanedrín. Weneʼ are ri chajinelabʼ riʼ ri xeʼesan bʼi ri Pablo pa rachoch ri Dios (Hech. 4:1-3; 5:17-27; 21:27-30).