Pa ri junabʼ 1949, ri nutat kʼo pa Alemania tekʼuriʼ xbʼe pa Australia che utzukuxik uchak pa ri minería ri kbʼan wi ri energía eléctrica. Y xkʼojiʼ pa jun alaj tinamit pa ri estado rech Victoria, tekʼuriʼ xkʼuliʼ rukʼ ri nunan. Ri in xinalax pa ri junabʼ 1953.

Qʼaxinaq chi kebʼ oxibʼ junabʼ, ri nunan xumajij jun etaʼmanik re ri Biblia kukʼ ri testigos rech Jehová, rumal laʼ xwetaʼmaj jujun jastaq che kubʼij ri Biblia are chiʼ kʼa in nitzʼ na. Are kʼu, ri nutat utz ta krilo che kojbʼe pa jun kojonem. Xux jun itzelalaj winaq. Ri nunan kuxeʼj ribʼ chuwach; paneʼ jewaʼ riʼ, ri areʼ xuya ta kan ri etaʼmanik chrij ri Biblia xa kukʼuʼ ribʼ rumal che nim kril wi ri tajin kretaʼmaj. Are chiʼ kʼo ta ri nutat, ri nunan kukʼut chqawach rukʼ ri wanabʼ ri tajin kretaʼmaj. Kubʼij chqe che ri uwach Ulew kux na jun kotzʼiʼjalaj Ulew y che kqariq na kikotemal we kqabʼan ri kubʼij ri Biblia (Salmo 37:10, 29; Isaías 48:17).

Rumal che ri nutat xux jun itzel achi, xinel bʼik are chiʼ kʼo 18 nujunabʼ. Paneʼ kinkoj ronojel ri xukʼut ri nunan chnuwach chrij ri Biblia, are kʼu xinbʼan ta pa ri nukʼaslemal. Xinmajij ubʼanik ri chak re electricista pa ri minas de carbón y xinkʼulik are chiʼ kʼo 20 nujunabʼ. Qʼaxinaq chi oxibʼ junabʼ xkʼojiʼ ri nabʼe qalkʼwal ali, wariʼ xubʼan chwe che xinchoman chrij ri más nim ubʼanik pa ri nukʼaslemal. Wetaʼm che ri Biblia kutoʼ ri nufamilia, rumal laʼ xinmajij jun etaʼmanik kukʼ ri testigos rech Jehová. Are kʼu ri wixoqil utz ta keril ri Testigos. Ri nabʼe mul che xinbʼe pa ri riqbʼal ibʼ kukʼ ri Testigos, xubʼij chwe: che kinya kan ri etaʼmanik chrij ri Biblia o are kinel bʼik. Wetaʼm taj jas kinbʼano, are xinbʼan ri kraj ri areʼ rumal laʼ xinbʼe ta chi kukʼ ri Testigos. Chiʼ xqʼax ri tiempo xinbʼisonik rumal che xinbʼan ta ri kraj ri Dios.

Jun qʼij, ri wachiʼl pa ri chak xkimajij ukʼutik pornografía chnuwach. Paneʼ wetaʼm che sibʼalaj itzel are kʼu xwaj xwilo, wariʼ xubʼano che xinnaʼo che in ajmak. Xnaʼtaj chwe ronojel ri wetaʼmam pa ri Biblia y wetaʼm che ri Dios kukʼajisaj na nuwach. Are kʼu rumal che amaqʼel kinwil itzel taq wachbʼal, xkʼaman chwe kinwil pornografía y kinkun ta chik kinya kanoq.

Pa taq ri veinte junabʼ riʼ, nojimal xinya kan ronojel ri xukʼut ri nunan chnuwach. Ri tajin kinbʼan pa ri nukʼaslemal kukʼut ri tajin kwetaʼmaj, kinbʼij itzel taq tzij y kinbʼij tzʼilalaj taq chistes. Xkʼextaj ri nuchomanik chrij ri relaciones sexsuales, paneʼ in kʼo rukʼ ri wixoqil xinqʼoyi kukʼ nikʼaj chi ixoqibʼ. Jun qʼij xwil wibʼ pa ri espejo y xinchomaj: «Itzel kinwil wibʼ». Xinnaʼo che kwaj ta chi wibʼ rumal ri itzel taq jastaq che tajin kinbʼano.

Xsach uwach ri nukʼulanem y xinriq kʼax pa ri nukʼaslemal. Xinbʼan nuchʼawem che ri Jehová rukʼ ronojel wanimaʼ. Paneʼ qʼaxinaq chi veinte junabʼ xinmajij chi jumul ri etaʼmanik. Pa taq ri tiempo riʼ, kaminaq chi ri nutat y ri nunan testigo rech Jehová chik.

Xwilo che ri tajin kwetaʼmaj pa ri Biblia kjunamataj ta rukʼ ri itzelalaj nukʼaslemal. Are kʼu pa ri tiempo riʼ qas xinchomaj ubʼanik ri utaqanik ri Dios. Xinya kan ubʼixik itzel taq tzij y xinkoj nuchuqʼabʼ rech kpe ta chi woyowal. Xuqujeʼ xinya kan kichʼabʼexik ri ixoqibʼ, ri apuestas, ri qʼabʼarik, y xinelaqʼ ta chi pa ri empresa.

Ri e wachiʼl pa ri chak kkichʼobʼ taj jasche tajin kinkʼex ri nukʼaslemal. Pa oxibʼ junabʼ xkikoj kichuqʼabʼ rech kinbʼan chi jumul ri itzel taq jastaq. Are chiʼ kinbʼan chi jumul ri itzelal, kinbʼij jun itzel tzij o kpe woyowal, ri e areʼ rukʼ kikotemal kkiraq kichiʼ y kkibʼij: «¡Ma kqabʼij che at kunaq taj ayaʼom kanoq!». ¡Sibʼalaj xinbʼison rumal ri xkibʼij chwe! Xinnaʼo che kinkun taj kinxutuj ri itzelal.

Konojel ri wachiʼl pa ri nuchak kkil pornografía. Ronojel taq horas kkiya kan wuj chwe che kʼo pornografía chuwach o kkitaq bʼi pa ri computadoras, junam rukʼ ri xinbʼan in ojer. Xinkoj nuchuqʼabʼ rech kinya kan ubʼanik, are kʼu ri areʼ kkaj che kinqaj chi jumul che ubʼanik. Xintaʼ tobʼanik che ri Testigo ri tajin kyaʼow etaʼmanik chwe rech kinutoʼo y kuya nuchuqʼabʼ, ri areʼ qas xinutatabʼej are chiʼ xinbʼij ronojel che. Xusikʼij textos re ri Biblia che kchʼaw chrij wariʼ y xinutoʼo rech kinkunik kinya kanoq. Xuqujeʼ xubʼij chwe che amaqʼel kintaʼ ri utobʼanik ri Jehová pa chʼawem (Salmo 119:37).

Jun qʼij xenmulij ri wachiʼl pa ri chak y are chiʼ in kʼo kukʼ, xinbʼij chke che kkiya tzam chke kebʼ qachiʼl che tajin kkikoj kichuqʼabʼ chuwach ri tzam. Rukʼ oyowal xkiraq kichiʼ chwij y xkibʼij: «¡Ri achijabʼ riʼ tajin kkikoj kichuqʼabʼ chuwach ri tzam rumal laʼ kqaya ta chke!». Xinbʼij chke «ri in xuqujeʼ tajin kinkoj nuchuqʼabʼ chuwach ri pornografía». Pa ri qʼij riʼ xketaʼmaj che xuqujeʼ tajin kinkoj nuchuqʼabʼ rumal laʼ xinkitaqchiʼj ta chik.

Are chiʼ xqʼax ri tiempo xinkun kan che uyaʼik, rumal che ri Jehová xinutoʼo. Pa ri junabʼ 1999 xinbʼan nuqasanjaʼ y xinux testigo rech Jehová. Sibʼalaj kinmaltyoxij che xintoʼ chi jumul rech kinriq jun utzalaj kʼaslemal y rech kinriq kikotemal.

Kimik riʼ wetaʼm chik jasche itzel kril ri Jehová ri xinbʼan kanoq. Ri areʼ kjunamataj rukʼ jun tat, che xraj xinuchajij chuwach ri kʼax che kuya ri pornografía. Qastzij ri kubʼij pa Proverbios 3:5, 6: «Rukʼ ronojel awanimaʼ chakuʼbʼaʼ a kʼuʼx chrij ri Ajawaxel man chrij ta kʼut ri awetaʼmanik pa awech wi. Chayaʼ uqʼij ri ukʼolem ri Ajawaxel pa ronojel ri kabʼano, chnaʼtaj ri Ajawaxel chawe, areʼ kʼu katkʼamow na bʼik pa ri sukʼalaj bʼe». Ri pixabʼ che kuya ri Dios chqe pa ri Biblia kojuchajij y kojutoʼo rech kqariq utzilal pa ri qakʼaslemal (Salmo 1:1-3).

Ojer kanoq itzel kinwil ri nukʼaslemal, are kʼu kimik je ta chik. Kʼo chi jun utz nukʼaslemal chuwach ri Jehová, xukuy numak y tajin kinutoʼo. Pa ri junabʼ 2000 xinkʼuliʼ rukʼ jun jeʼlalaj Testigo ubʼiʼ Karolin. Ri areʼ sibʼalaj kuloqʼoqʼej ri Jehová junam wukʼ in. Sibʼalaj kojkikot pa ri qakʼulanem. Y más na kojkikotik rumal che oj kʼo pa ri utinamit ri Dios che kʼo cho ronojel ri uwach Ulew y che kchʼobʼotaj qawach rumal ri qaloqʼoqʼenik y che kʼo jun utz qakʼaslemal.