Gomba markachömi yurirqä, tsëqa këkan Ugandachömi. Tsë markachöqa llapampis waktsam kayaq. Y manam tsë markachöqa luzpis karqantsu.

 Teytäkunaqa Ruandapitam Ugandata ëwkuyarqan, tsëchöqa plätanusta y cafëtam muruyaq. Plätanuspitam juk washkuta rurayaq. Y papänïkunaqa wallpata cabrata, kuchïta y wäkakunatam wätayaq. Tsë markachö nunakunapitam warmikunata mana alli tratëta yachakurqä. Warmikunaqa nunankuna niyanqantam upällalla rurayaq.

 23 watayoq këkarmi Ruandaman ewkurqä, tsëchöqa jövin mayïkunawanmi fiestakunaman ëwayaq kayä. Cada vezlla discotëca fiestaman ëwaptïmi librina yekukunäpaq dejayämarqan. Y televisionchöqa pasëpa maqanakuykunata y wanutsikuykunallatam rikaq kä. Tsëkunata ruranqämi borrächu, maqakoq y jukwan jukwan kakoq këman chätsimarqan.

 2000 watachömi Escolastica shipashwan täraq ewkurqä. Pëwanqa kimam wamräkuna karqan. Wamra kanqächö yachakunqänöllam warmïqa qonqurikur saludamänanta y imatapis mañamänanta munarqä. Y imëkapis kayäpamanqanqa noqallapa kanqantam neq kä. Y tsëwanqa munanqätam rurakuyta munaq kä. Paqaskunapam ewkoq kä, fiestakunam y las 3-nöran borrächu kuteq kä. Punkuta tsaqtakuptï tsë höra warmï mana kichamuptinqa, maqaqmi kä.

 Tsë witsampaqqa trabäjüchö allim pagayämaq, tsëmi atska qellëyoq karqä. Warmï Escolasticaqa yanapamëta munarmi, Pentecostes iglesiaman ëwayänäpaq nimarqan. Peru noqaqa manam tsëman ëwëta munarqätsu. Tsëpa rantinqa juk warmiwanmi warmïta engañar qallëkurqä. Tsënö nuna kanqäta mana aguantarmi, Escolasticaqa kiman wamräkunata aparkur teytankuna kaqta ewkurqan.

 Juk edäna amïgükunam mana allita rurëkanqäta nimarqan. Warmïwan amishtayänäpaq y wamräkunawan juntu kayänäpaqmi nimarqan. Tsëmi 2005 watachö washku upyëta y këkäyanqä warmita dejarqä. 2006 watachömi warmï Escolasticawan casakuyarqä. Peru tsënö kaptimpis, warmïtaqa mana alli tratar y maqarllam këkarqä.

 2008 watachömi Jehoväpa testïgun Joel Diospita yachatsikur wayïman tsaktakamurqan, y noqaqa wiyarqämi. Pëwan yanaqin Bonaventuraqa atska kutim watukäyämarqan. Y imëkatam Bibliapita yachakuyarqä. Noqaqa testïgukuna mana alli këkäyanqanta rikätsita munarmi, imëkata tapuparqä. Y masqa Apocalipsis librupitam. Apocalipsis 7:9 “mëtsikaq nunakuna” Teyta Diospa ‘y Achkaspa nöpanchö shëkäyanqanta’ nikaptinqa, ¿imanirtan qamkuna niyanki kë Patsachö kawayänampaq kaqta? Joelqa shumaqmi yachatsimarqan y manam piñakurqantsu. Isaïas 66:1-tam leyimurqan, tsëchömi nin Teyta Diospaqqa kë Patsa chakï jaluränanlla kanqanta. Rasumpëpam mëtsikaq nunakuna, Teyta Diospa nöpanchö këkäyan. Salmus 37:29-tapis leyirqämi, tsëchöqa nin alli nunakuna kë Patsachö imëyaqpis kawayänampaq kaqtam.

 Tsëpitanam warmïwan noqaqa Bonaventura wawqiwan Bibliapita yachakur qallëkuyarqä. Ichikllapa ichikllapam Bibliaqa yanapamarqan jukläyana kanäpaq. Kananqa warmïta respetämi y manam shuyaränatsu saludamänampaq y imatapis mañamänampaq qonqurikunanta. Y imëkapis ishkäkunapa kanqantam yachakushqä. Televisionchö pelyaqkunatapis manam rikänätsu, maqakoq këta dejanäqa manam fäciltsu kashqa. Kananyaqmi humildi kanäpaq kallpachakü.

 Juk ishkë watanam pasarishqa mayor kaq wamrä Cristianta familiäkunawan täräyänampaq Ugandata apanqäpita. Peru Deuteronomiu 6:4-7 ninqanta leyirmi, teytakuna wamrankunata cuidayänampaq kaqta yachakurqä. Tsëmi wamräta apamoq ëwarqä. ¡Imanö kushikuypaqmi tsëqa karqan! ¡Y wamräpis alläpa kushishqam këkarqan!

 Teyta Jehovä llakipäkoq kanqantam yachakushqä. Y allim musyä unë witsan mana allikunata ruranqäta perdonamashqa kanqanta. Kushikurqämi warmï Escolasticapis Bibliapita yachakuptin. Tsëmi ishkäkuna Jehovä Diosllatana sirwiyänäpaq änikuyarqä. Y 2010 wata 4 de diciembrim bautizakuyarqä. Kananqa ishkäkunapis kushishqam kawakuyä. Warmïqa kushishqa këkan, trabäjüpita wayiman defrenti kutiptï, shumaq trataptï y washkuta mana ichikllatapis upuptï. Unënö feyu nuna manana kaptïmi kananqa kushishqa këkan. 2015 watam anciänunö yanapakunäpaq churayämarqan. Y pitsqa wamräkunapitaqa kimam bautizakushqana kayan.

 Jehoväpa testïgunkunawan Bibliapita yachakurpis, manam llapan niyämanqantatsu llutalla creikoq kä. Peru llapan yachatsiyämanqanqa Diospa Palabrampitam karqan. Warmï Escolasticawan noqaqa rikäyarqä Diospa sirweqninkunaqa pë munanqannö kawakuyänampaq kaqtam. Teyta Jehovätam alläpa agradecikü sirweqnin kanäpaq akramanqampita. Kikïchömi rikarqö Bibliapita yachakurqä cambiëta puëdinqantsikta. Tsëmi rikätsimantsik pï më nunakunapis cambiëta puëdiyanqanta.