1 Tesalonicensis 2:1-20
2 Wawqikuna y panikuna, qamkunaqa musyayankim watukayanqaqqa mana kaqllapaq mana kanqanta.+
2 Qamkunaqa musyayankim, Filïpuschö imëkata sufriyanqäta+ y mana alli tratayämanqanta. Peru imëkanöpa michäkuykäyaptimpis* Teyta Diospa alli noticiankunata willayänaqpaqmi,+ Teyta Dios yanapayämaptin kallpayoq* tikrayarqä.
3 Qamkunata consejayanqaqqa,* manam ulikuytsu o llullakuytsu, y manam mana alliman yarpartsu o engañayënikita munartsu niyarqoq,
4 sinöqa Teyta Dios allitanö rikäyämaptin alli noticiakunata willakuyänäpaq carguta chaskishqa karmi, nunakunata kushitsiyänäpaqtsu parlayä, sinöqa shonqükunata rikaq Teyta Diosta kushitsiyänäpaqmi.+
5 Qamkunaqa musyayankim mana imëpis alabapäyanqaqta y imatapis ërayëpa munar janallapa mana alli tukuyanqäta.+ ¡Tsëtaqa Teyta Diospis musyanmi!
6 Cristupa apostolnin kar yanapayämänëkipaq gastatsiyënikita puëdirpis, manam qamkuna ni jukkuna alabayämänanta ashiyarqötsu.+
7 Tsëpa rantinqa, wamrankunata chichir* shumaq* cuidaq mamanömi, shumaq tratayarqoq.
8 Tsëmi qamkunata alläpa kuyayarniki listu këkäyarqä,+ Diospita alli noticiakunata kushishqa willayänaqpaq y qamkunata yanapayarniki vïdäkunatapis entregayänäpaq.+
9 Wawqikuna y panikuna, qamkunaqa yarpäyankichi alli trabajayanqäta y kallpachakuyanqäta. Teyta Diospa alli noticiankunata willayarnikiqa, mëqëkitapis mana gastatsiyänaqpaqmi, paqasta junaqta trabajayarqä.+
10 Qamkunaqa musyayankim, y Teyta Diospis musyanmi, qamkunawan imanö portakuyanqächö confiakuypaq, allita ruraq y culpannaq kayanqäta.
11 Qamkunaqa allim musyayanki juk papä tsurinkunawan ruranqannölla,+ cada ünuta consejayanqaqta, shoqayanqaqta y imanö kawayänëkipaq kaqta yachatsiyanqaqta,+
12 tsënöpa Gobiernunman+ y puëdeq këman churashqa kayänëkipaq+ qayayäshoqniki Teyta Dios munanqannö kawar sïguiyänëkipaq.+
13 Noqakunapita wiyayanqëki Teyta Diospa palabranta chaskikur, nunakunapa palabrantanö mana chaskikuyanqëkipita, sinöqa Teyta Diospa palabrantanö chaskikuyanqëkipitam, Teyta Diosta imëpis agradecikuyä,+ tsë palabram qamkunachö imëkata rurëkan.
14 Wawqikuna y panikuna, qamkunaqa Judëa provinciachö Cristu Jesuswan juknölla këkaq Diospa congregacionninkunachö kaqkuna pasayanqantam pasayarqunki. Awmi, pëkunata judïu mayinkuna sufrikätsiyanqannöllam, qamkunatapis marka mayikikuna sufritsiyäshurqëki.+
15 Pëkunaqa Señor Jesustapis+ y Diospa willakoqninkunatapis wanutsiyarqanmi y noqakunatapis imëkata rurarmi sufritsiyämarqan.+ Manam tsëllatsu, pëkunaqa manam Teyta Diosta kushikätsiyantsu y nunakunapa biennin mana munarmi
16 salvakuyänampaq juk nacion nunakunata parlapäyänäta michäkuyan.+ Tsënömi pëkunaqa mas jutsayoqraq* tikrayan. Peru kananqa Teyta Diospa cöleranmi ichikllachöna pëkunaman chämunqa.+
17 Wawqikuna y panikuna, qamkunapita wallka tiempullapa rakikashqa këkarpis* (kikïkuna, peru mana shonqükunachöqa), qamkunata rikäyënikita* munarmi, qamkunaman shayämunäpaq imëkanöpa kallpachakuyarqä.
18 Tsëmi qamkunaman shamuyta munayarqä. Awmi, noqa Pablum, juk kutillatsu, sinöqa ishkë kuti shamuyta munarqä. Tsënö kaptimpis, Satanasmi michäyämarqan.
19 Qamkuna alli tsarakuyanqëkim, kushitsiyäman y alabakuyanqä coröna, y Señornintsik Jesus këkämunqan witsan qamkunawan juntu pëpa rikëninchö këtam shuyaräyä.+
20 Awmi, qamkunarëkurmi alabakuyä y kushikuyä.
Nötakuna
^ O capazchi “imëkata pasëkarpis”.
^ O “valoryoq”.
^ O “cläru niyanqaqqa”.
^ Kënöpis niyanmi: chuchur.
^ O “kuyëpa”.
^ Kënöpis niyanmi: pecäduyoqraq.
^ O “rakiyämaptimpis”.
^ Griëgu idiömachöqa “cärëkikunata rikëta” ninmi.
