Gälatas 3:1-29
-
Ley ninqanta rurë y markäkoq kë imachö jukläya kanqan (1-14)
-
“Allita ruraq nunaqa, markäkoq o yärakoq kanqampitam kawanqa” (11)
-
-
Abrahanta Dios äninqanqa manam Leyrëkurtsu (15-18)
-
Abrahanpa kastan: Cristu (16)
-
-
Ley imanö yurimunqan y imapaq kanqan (19-25)
-
“Markäkurmi o yärakurmi, llapëkipis Teyta Diospa tsurin kayanki” (26-29)
-
Abrahanpa kastan: Cristupa kaqkuna (29)
-
3 Juiciunnaq Galaciapita nunakuna, ¿pitan engañayäshurqunki+ Jesucristu qeruman clavashqa kanqanta alli cläru rikätsishqa këkäyapteq?+
2 Këllatam tapuyënikita* munä: ¿ley ninqanta rurarku santu espïrituta chaskiyarqëki, o wiyayanqëkiman markäkurku o yärakurku?+
3 ¿Tsëläya juiciunnaqku kayanki? Santu espïritu pushayäshunëkita dejashqa këkarku, ¿kananqa nunakuna pensayanqannö pensar tsëman chëta munayanki?+
4 ¿Envänuku imëkata sufriyarqunki? Noqaqa segürum këkä mana envänu kanqanta.
5 Tsëqa, santu espïrituwan yanapayäshoqniki y qamkunachö milagrukunata ruraqqa,+ ¿ley ninqanta rurayanqëkipita o wiyayanqëkiman markäkuyanqëkipitaku o yärakuyanqëkipitaku tsëkunata ruran?
6 Tsënömi Abrahanwan pasarqan: “Abrahanqa Teyta Jehoväman* markäkurmi o yärakurmi, allita ruraqnö rikashqa karqan”.+
7 Qamkunaqa musyayankichi markäkoq o yärakoq kaqkunaqa, Abrahanpa tsurinkuna kayanqanta.+
8 Tsënö kaptimpis, markäkoq o yärakoq kayaptin juk nacion nunakunata allita ruraqtanö Teyta Dios rikänampaq kaqta puntallapitana willakurmi, qellqarëkaqchöqa tsë alli noticiakunata Abrahanta puntallapitana willar kënö nirqan: “Qamwanmi llapan nacionkuna bendicishqa kayanqa”.+
9 Tsëmi markäkoq o yärakoq kaqkunaqa, markäkoq Abrahanwan juntu bendicishqa këkäyan.+
10 Ley ninqanta rurayanqanman confiakoqkunaqa maldicishqam këkäyan, awmi, kënö nirmi qellqarëkan: “Ley libruchö llapan ninqanta mana seguïdu cäsukoqkunaqa maldïtum kayan”.+
11 Manam tsëllatsu, kënö nirmi qellqarëkan, “allita ruraq nunaqa, markäkoq o yärakoq kanqampitam kawanqa”. Tsëmi cläru rikätsikun ley ninqanta cäsukunqampitatsu,+ pï nunapis Teyta Diospa rikëninchö allita ruraqnö rikashqa kanqanta.+
12 Leyqa manam nunakuna markäkoq o yärakoq kayänanta wanantsu,* sinöqa “tsëkunata ruraq nunaqa, tsëkunata ruranqampitam kawanqa”.+
13 Cristum rantimarnintsik+ Leypa maldicionnimpita salvamarqantsik,+ tsënömi noqantsikpa rantintsik maldicishqa karqan, kënö nir qellqarëkanqannö: “Qeruman warkushqa kaqkunaqa maldïtum kayan”.+
14 Tsënöqa karqan, Abrahanpa bendicionnin Cristu Jesusrëkur juk nacion nunakunaman chänampaqmi,+ tsënöpa markäkoq o yärakoq karnin Teyta Dios änimanqantsik santu espïrituta chaskinapaq.+
15 Wawqikuna y panikuna, nunakuna rurayanqampaq parlar këta niriyashqëki: acuerdu välir qallëkuptinqa, nunalla välitsishqa kaptimpis manam pï nunapis mana kaqpaq churantsu ni imata yapantsu.
16 Teyta Dios änikunqankunataqa Abrahanwan kastanmi chaskiyarqan.+ Manam atskaqpaq parlaqnötsu “kastëkikunata” nin, sinöqa jukllëllapaq parlarmi, awmi, Cristullapaq parlarmi “kastëkita” nin.+
17 Këtapis niyaqmi: tsëpita cuatrocientus treinta wata pasariptin patsakaq Leyqa,+ manam Teyta Dios ruranqan acuerduta mana väleqpaqtsu churarin, y manam änikunqanta ushakäratsintsu.
18 Leyrëkur herencia kaptinqa, manam änikunqanrëkurnatsu kanman. Tsënö kaptimpis, Teyta Diosqa alli karmi äninqanrëkur Abrahanta herenciata entregashqa.+
19 Tsëqa, ¿imapaqtan Ley karqan? Leytaqa änikunqanta chaskeq chämunqanyaq+ jutsata* ruraq kanqantsikta rikätsikunampaqmi chaskirqantsik,+ y Teyta Diosqa angelkunawanmi+ Moisesta musyatsirqan,+ y Moisesnam nunakunata musyatsirqan.
20 Tsënö kaptimpis, acuerduta juk nunalla ruraptinqa, manam acuerdu rurakänampaq pillapis yanapakunanraqtsu y Teyta Diosqa japallanmi tsëta rurarqan.
21 Tsëqa, ¿Teyta Dios änikunqampa contranku Ley këkan? ¡Manam tsënötsu! Kawëman chätsikoq leyta chaskishqa kayaptinqa, allita ruraqnö rikashqa këqa leypitam kanman karqan.
22 Peru markäkoq o yärakoq kaqkuna, Jesusman markäkoqkuna chaskiyanqan änikuyta chaskiyänampaqmi, Diospa Palabranqa jutsapa* makinman llapanta churarqan.
23 Tsënö kaptimpis, Cristuman manaraq markäkurqa o yärakurqa, musyakänampaqna këkaqta shuyarar këkanqantsikyaqmi, leypa makinchö këkarqantsik y leymi cuidamarqantsik.+
24 Tsëmi Leyqa Cristuman chanqantsikyaq pushamaqnintsik karqan,+ tsënöpa markäkoq o yärakoq kanqantsikpita allita ruraqnö rikashqa kanapaq.+
25 Peru kananqa Cristuman markäkurmi o yärakurmi,+ pushamaqnintsikpa makinchönatsu këkantsik.+
26 Rasumpa kaqchöqa, Cristu Jesusman markäkurmi o yärakurmi,+ llapëkipis Teyta Diospa tsurin kayanki.+
27 Awmi, llapëki bautizakoqkunaqa Cristuwanmi juknölla këkäyanki, y Cristu ruranqantam rurayarqunki.+
28 Kananqa manam judïupis ni griëgupis kantsu,+ manam sirwipakoq ni libri nunapis kantsu,+ manam ollqupis ni warmipis kantsu.+ Qamkunaqa llapëkim Cristu Jesuswan juknölla këkäyanki.+
29 Manam tsëllatsu, Cristupa karqa, änikunqannö+ herenciata chaskeq+ Abrahanpa kastanmi kayanki.+
Nötakuna
^ Griëgu idiömachöqa “qamkunapita yachakuyta” ninmi.
^ Kënöpis niyanmi: necesitantsu.
^ Kënöpis niyanmi: pecäduta.
^ Kënöpis niyanmi: pecädupa.
