JESUS ciëlota kutikunqampita chunka junaq pasarinqanchömi, 33 wata Jerusalenchö Pentecostes fiestapaq juk wayichö Jesuspa 120 qateqninkuna ëllukäyarqan. Tsëchö këkäyaptinnam illaqpita wiyëkuyarqan imëka shukukï vientonö waqaqta, y discïpulokunaqa imëpis mana parlayanqan idiömachömi parlar qallëkuyarqan. ¿Imataq pasakïkarqan? Diosmi santo espïritunta ramarqan.

Tsë markamanqa më tsë nacionkunapitam fiestaman ëwayashqa kayarqan. Nunakunaqa alläpam mantsakäyarqan Jesuspa qateqninkuna idiömankunachö parlapäyaptin. Tsë pasakïkanqanta entiendeyänampaqmi profeta Joel willakunqanta Pedru yarpätsikurqan, santo espïritunta Dios ramanampaq y tukï yachëninkuna qonampaq kaqta (Joel 2:28, 29). Tsë milägrokunam rikätsikurqan punta cristiänokunata Dios bendecinqanta y israelïtakunataqa manana bendecinqanta. Tsëmi, tsëpita patsë Diosta sirwita munaqkunaqa cristiänoraq tikrayänan karqan.

Pero Cristuta chikeqkunaqa, qateqninkunatanam qatikachar qallëkuyarqan. Juk kutim wakinta carcelman llawiriyarqan, pero juk angelmi paqaspa jorqarirqan y yachatsikur siguiyänampaq nirqan. Patsa waräriptinnam temploman yëkurir Jesuspaq parlar qallëkuyarqan. Y religiösokunaqa piñakurninmi manana yachatsikuyänampaq mandayarqan. Pero apostolkunaqa mana mantsakushpam kënö contestayarqan: “Nunacunata cäsuyanqäpitaqa, presisanmi puntata Diosta cäsucuyänä” (Hechos 5:28, 29).

Pero chikeqninkunaqa tukïta rurarmi qatikachäyarqan. Wakin judïokunaqa Jesuspa discïpulon Estëbantapis Diospa contranmi parlan nishpam tumpayarqan, y rumiwan qompëpa o saqmaypam wanutsiyarqan. Y tsënö wanutsiyanqantaqa, cristiänokunata chikeq Tarsupita Saulu jövenpis rikarëkarqanmi. Tsëpitanam Sauluqa ëwarqan Damasco markachö cristiänokunata carcelman llawitsinampaq. Pero nänipa ëwëkaptinnam juk aktsi yurirkur wiskuyäratsirqan y ciëlopita kënö nimoqta wiyarqan: “Saulu, Saulu, ¿imanirtaq jipatsimar, allqutsamanqui?”. Pï kanqantapis mana musyarnam kënö tapurqan: “¿Pitaq canqui, Teyta?”. Y parlëkämoqnam kënö nirqan: “Jesusmi noqaqa cä” (Hechos 9:3-5).

Kima junaq pasariptinnam, wiskuyënimpita Saulu kachakänampaq Jesus Ananïasta mandarqan. Sauluqa bautizakurirmi yachatsikur qallëkurqan. Tsëpita tiempowanqa apóstol Pablu nirnam reqiyarqan, më tsëchömi mana jaqita yachatsikurqan.

Yachatsikur qallarninllaqa, Jesuspa discïpulonkuna judïokunata y samaritänokunallatam Diospa Gobiernompita yachatsiyaq. Pero juk kutinam juk ángel romano soldädokunapa mandaqnin Corneliuta yuripurqan, peqa rasumpa kaq Diosmanmi creikoq, tsëmi apóstol Pëdruta qayatsinampaq ángel nirqan. Y wakin discïpulokunawan Pedru chärirnam, kë soldädota y wayinchö llapan kaqkunata Diospita parlaparqan. Apóstol parlapëkaptinnam tsëraq yachakïkaqkunaqa santo espïrituta chaskiyarqan, y Jesuspa jutinchö bautizakuyänampaq Pedru mandarqan. Tsëpita patsëmi, llapan nunakuna më nacionpita karpis mana wanushpa kawakïta chaskita puëdeyaq. Awmi, Diospa alli willakïnintaqa jinantin Patsachömi yachatsikuyänan karqan.

(Hechos 1:1–​11:21 textokunapita jorqashqam.)