SANTIÄGUWAN Jüdasqa mamallapitam Jesuspa wawqinkuna kayarqan, y Pëdruwan Juannam apostolninkuna kayarqan. Santo espíritu yanapaptinmi chuskun qellqayarqan Escrituras Griegas nishqanchö këkaq qanchis cartakunata, y tsë cartakunaqa jutinkunatam apan. Pëkunaqa munayarqan cristiänokuna alli tsarakuyänanta y Dios awnikunqan Gobiernota imëpis shuyëkäyänantam.

Markäkïta o yärakuyta rikätsikur. Manam markäkömi ninanllatsu; rurënintsikwanmi rikätsikunantsik. Santiagu ninqannömi, “allicunata mana ruraptenqa, Dios Yayaman marcäconqan ni imapaq sirwintsu, wanushqa cuentano[mi]” këkan (Santiagu 2:26). Imëkata pasarpis alli tsarakurqa masmi kallpata tarinqa. Jina Dios qonampaq kaqman markäkurqa yachëtam mañakunqa. Y Jehovällata sirwirqa, kuyakïnintam chaskinqa (Santiagu 1:2-6, 12). Pëllata shonqupita patsë sirwiyaptinqa yanapanqam. Tsëmi Santiagu kënö nirqan: Diosman “witiyay, paypis [...] gamcunaman mas witimunanpag” (Santiagu 4:8, NTCN).

Tukï tentacionkuna kaptin cristiänokuna alli tsarakuyänampaqqa, Diosman markäkuyanqantam sinchiyätsiyänan. Rakchata ruraq nunakunapa rurinchö Judas kawashqa karmi, kënö nirqan: “Rasonpa caq marcäquiniquicunata imecanopapis defendicuy[anqui]” (Judas 3).

Imëkachöpis limpio portakur. Jehoväqa munan sirweqninkuna imëkachöpis limpio y alli portakuyänantam. Pëdrum kënö qellqarqan: “Noqantsicpis jutsannaq[mi] canantsic, allicunata rurarnin; porqui Diospa palabranmi queno escribirëcan, ‘jutsannaq cayë, noqa jutsannaq cashqäno’” (1 Pedru 1:15, 16). Tsënö kanapaqmi Jesucristo “juc ejemplunö” kashqa (1 Pedru 2:21, NTCN). Dios mandakunqankunata cäsokunan sasaraq o ajaraq kaptimpis, ‘alli consensiawan’ kanqantsikmi más precisaqqa (1 Pedru 3:16, 17). Pëdruqa nirqan, ‘allicunata rurarllana’ Paraïsochö cawayanqan witsan y Diospa Juicion manaraq shamuptin rurëninkunawan Diosta kuyayanqanta rikätsikuyänan alläpa precisanqantam (2 Pedru 3:11-13).

Kuyakïta rikätsikur. “Diosqa allapa cuyacoqmi” ninmi apóstol Juan. Jehoväqa kuyamanqantsikta rikätsikurqan kuyë Tsurinta kachamurninmi, pëqa “wanur[qan] llapan jutsa rurashqantsicpita Dios perdonamänantsicpaq[mi]”. ¿Tsë kuyakïnimpita imataraq noqantsik yachakushwan? Juanmi kënö nin: “Cuyashqa wauqicuna y panicuna, sitsun Dios tseno allapa cuyamarqantsic, tsenolla noqantsicpis jucnintsic jucnintsic cuyanacushun” (1 Juan 4:8-11). Cristiano mayintsikkunata kuyanqantsiktaqa rikätsikushun wayintsikman shumaq chaskirmi (3 Juan 5-8).

Y, ¿imanötaq cristiänokunaqa rikätsikuyan Jehoväta kuyayanqanta? Juanmi kënö nin: “Mandacushqancunata cäsucurnenqa, Diosta[m] cuyantsic. Y mandacushqancunaqa manam allapa sasatsu” (1 Juan 5:3; 2 Juan 6). Diosta wiyakoqkunaqa musyayanmi kuyakïninchö imëpis karqa, mana wanushpa kawëta chaskiyänanta (Judas 21).

(Santiagu, 1 Pedru; 2 Pedru, 1 Juan; 2 Juan; 3 Juan y Judas librokunapita jorqashqam.)