¿IMANÖRAQ kawakushwan nacionnintsikpa gobernanten y llapan nunakuna Jehoväta kuyayaptinqa? Rey Salomonpa 40 wata gobernacionninmi tsëta musyatsimantsik.

David wanukunampaq ichikllana pishikaptinmi tsurin Salomonta rey kanampaq churarqan. Juk kutim suëñïninchö Salomonta Dios yuripurnin munanqanta mañanampaq nirqan. Kë jövenqa, Diospa markanta alli gobernanampaqmi yachëta mañakurqan. Jehoväqa mañakunqampita kushikurmi mañanqanta qorqan. Jina wiyakoq kaptinqa, kapoqyoq, respetashqa kanampaq y atska watakuna kawanampaqpis awnirqanmi.

Salomontaqa pï mëpis reqeq alläpa yachënimpitam. Juk kutim, ishkaq warmikuna ‘noqam kë llullupa mamäninqa kä’ nishpa Salomonman chätsinakuyarqan. ¿Imataraq pëqa rurarqan? Llulluta ishkëman roquriyänampaqmi mandakurqan. Juk kaq warmiqa allim kanqa nirqanmi, pero juknin kaqqa, llulluta juknin warmita qoykuyänampaqmi rogakurqan. Tsënöpam Salomon musyarirqan juknin kaq rasumpa maman kanqanta. Llapan nunakuna Salomon ruranqanta wiyarnam, Diospa yachënin pëchö kanqanta musyariyarqan.

Kë reypa alläpa shumaq y más jatun rurëninqa karqan Jerusalenchö Jehoväpa templonmi, y tsëmanmi llapampis Diosta adoraq ëwayänan karqan. Kë templopa ushëninchömi Salomon Diosta mañakur kënö nirqan: “¡Rikë! Ciëlokuna, cielo janan ciëlokunapis qampaqqa takshallam; ¡tsëtsuraq kë ruranqä wayichö tärankiman!” (1 Reyes 8:27).

Salomonpaqqa, më tsë markakunachö hasta Arabia nación Seba reinapa markanchöpis parlayaqmi. Tsë reinaqa Salomon imëkayoq kanqanta, yachaq këninta y llapanta rikänampaqmi Israel markayaq ëwarqan. Llapampis rasumpa kanqanta rikärir alli reyta akranqampitam Jehoväta alabarqan. Diospa bendicionninwanmi Salomonpa gobiernonchö imëpitapis más alli y yamë kawakuyarqan.

Pero llakikïpaqqa, Jehová yachënin qonqanmannö Salomon mana portakunqanmi. Tantearinapaq, atska warmikunawan reykuna mana casakuyänampaq Dios mandakïkaptimpis, pëqa atska pachak warmikunawanmi casakurqan y casi llapannömi juk dioskunata adorayaq. Ichikllapa ichikllapam tsë warmikuna Jehoväpita rakikäratsiyarqan y juk dioskunata adoranampaq shonqunta tumaratsiyarqan. Tsëmi Dios nirqan casi llapan gobiernonta kastan oqranampaq kaqta. Teytan Davidta Dios awninqanrëkurllam llapantaqa oqrarqantsu. Salomon mana allita rurashqa këkaptimpis, Jehoväqa Davidta awninqanta manam qonqarqantsu.

(1 Reyes 1–11, 2 Crónicas 1–9 y Deuteronomio 17:17 textokunapita jorqashqam.)