OLIVOS hirkachö Jesús këkaqmi këqa. Apostolninkunash kayan pëwan kë chusku nunakuna këkaqqa. Pedro wawqin Andreswan, hina Juan wawqin Santiägowan. Jerusalenchö Teyta Diospa templonshi tsë karuchö rikakëkämoq hatun wayiqa.

Ashnun montashqa Jerusalenman Jesús yëkonqampitaqa ishkë hunaqnash pasarishqa. Martes hunaqnash. Y tsë martes hunaqchönöshi Jesús templochö këkänaq. Tsëchöshi wanïkatsita tïrayänaq tsë sacerdötekuna. Pero nunakuna Jesusta kuyayaptinshi mantsapäyänaq.

‘¡Culebrapa tsurin, culebrakuna!,’ nishpash tsë religiösokunapa pushaqninkunata Jesús nïkunaq. Tsëpitanash, ‘llapan mana alli rurayanqëkipitam Teyta Dios castigayäshunki,’ nïkunaq. Tsë llapanta nirïkurnash, Olivos hirkaman witsärinaq, y tsëchönash tapupar qallëkuyänaq tsë chusku apostolninkuna. ¿Imataraq tapuyan, musyankiku?

Llapan shamoq tiempokunapaqshi tapupëkäyan apostolninkunaqa. Hina Patsachö llapan mana alli rurëkunata Jesús ushakätsimunantash musyayan. Y imëpis kanantash musyëta munayan. ¿Imëraq Jesús yapë shamonqa Reynö gobernamunampaq?

Jesusqa musyanshi Patsachö qateqninkunaqa yapë shamuptin mana rikäyänanta. Y tsëshi pëkunaqa rikäyanqanatsu ciëlochö Jesús këkaptin. Tsëshi ciëlochö pë reinëkaptin, llapan mana allikuna kë Patsachö pasakunanta Jesús nikan qateqninkunata. ¿Mëqanyanraq kayan wakinqa?

Tsëshi, ‘wamayëpaq guërrakuna, atska nunakunam qeshyayanqa, y mallaqë, atska mana alli rurëkuna, hina wamayëpaq patsa kuyïkunam kanqa. Y Teyta Diospa reinompita alli willakïkunatapis hinantin Patsachömi willakuyanqa,’ nishpash nikan Jesusqa. ¿Kë llapanta kananqa rikëkantsikku? ¡Awmi! Tsënöpam musyantsik kanan Jesús ciëlopita reinëkämonqanta. Y limpush Patsapita llapan mana allikunata ushakätsimonqa.