Jesusqa Jerusalenchömi Ramäda fiestachö sïguirqan. Tsëchö këkaqkunapita mëtsikaq pëman markäkushqa kayaptinmi kushishqa këkarqan. Peru pushakoq religiösukunaqa manam, tsëmi guardiakunata mandayarqan tsariyänampaq (Juan 7:31, 32). Tsënö kaptimpis, Jesusqa manam escapakurqantsu.

Tsëpa rantinqa yachatsikurninmi sïguirqan, y kënömi nirqan: “Kachamaqnï kaqman manaraq ëwakurmi ichik mas tiempu qamkunawan karishaq. Qamkunaqa ashiyämankim, peru manam tariyämankitsu, y noqa ëwanäpaq kaqmanqa, manam shamïta puëdiyankitsu” (Juan 7:33, 34). Judïukunaqa manam entiendiyarqantsu, tsëmi kikinkunapura kënö ninakuyarqan: “¿Mëtaraq këqa ëwëta pensëkan mana tarinantsikpaqqa? ¿Manachi Grecia nunakunachö këkaq judïukunaman ëwëta y Grecia nunakunata yachatsitatsu pensëkan aw? ¿Ima nitataq munashqa, ‘ashiyämankim, peru manam tariyämankitsu, y noqa ëwanäpaq kaqmanqa, manam shamïta puëdiyankitsu’ nirqa?” (Juan 7:35, 36). Wanunqampita kawariramurnin ciëluta ëwakunampaq kaqpaqmi Jesusqa parlëkarqan, tsëmanqa manam chikeqninkuna qatita puëdiyanmantsu karqan.

Tsëpitanam, qanchis kaq junaq fiesta qallëkurqan. Tsë fiestachömi, juk sacerdöti Siloam pözupita yakuta jorqarir cada qoya templuchö këkaq altarman jichaq. Itsa tsë costumbrita yarpätsikurnin Jesusqa sinchipa kënö nirqan: “Pipis yakunaq kaqqa, noqaman shamutsun y yakuta uputsun. Pipis noqaman markäkuptinqa, Diospa Palabranchö qellqarëkanqannöpis: ‘Pëpa mas rurin kaqpitam kawatsikoq yaku mayunöraq yarqamunqa’” (Juan 7:37, 38).

Jesusqa parlëkarqan qateqninkuna santu espïrituwan akrashqa kayaptin y ciëluta ëwakuyaptin  ima pasakunampaq kaqpaqmi. Pentecostes fiestachömi “kawatsikoq yaku mayunöraq” yarqamur qallëkurqan, tsëqa pasakurqan qateqninkuna santu espïrituta chaskirir wakinkunata rasumpa kaqta yachatsir qallëkuyanqampitam.

Jesus ninqanta wiyarirmi kënö niyarqan: “Këqa rasumpëpam shamoqpaq kaq Diospa Willakoqnin”. Tsënöqa niyarqan Diospa Palabranchö willakunqannöpis, Moisespita mas precisaq Kaq shamunampaq kaqman pensarmi. Y wakinnam, “këqa Cristum” niyarqan. Tsënö kaptimpis wakinkunaqa kënömi niyaq: “¿Cristuqa manam Galilëa provinciapitatsu kanan karqan aw? ¿Manaku Diospa Palabranchöqa nin Cristuqa Davidpa kastampita, y David täranqan Belen caserïupita kanampaq kaqta?” (Juan 7:40-42).

Nunakunaqa manam ima rurëtapis churapakäyarqantsu. Wakinkunaqa Jesusta prësuyänantam munayarqan, peru manam pipis tsarirqantsu. Fariseukunaman y precisaq sacerdötikunaman guardiakuna kutiriyaptinmi, pëkunata kënö tapuyarqan: ‘¿Imanirtaq apayämurqunkitsu?’. Y guardiakunanam, “manam ni imëpis pënöqa ni pï nunapis parlashqatsu” niyarqan. Tsënam fariseukunaqa alläpa piñakurnin y pëkunapita burlakurnin kënö niyarqan: “¿Manachi qamkunapis pantatsiyäshunëkita jaqiyarqunkitsu aw? Manam ni mëqan gobernador o fariseupis pëman markäkur qallayashqatsu, ¿aw? Peru Leyta mana reqeq kë mëtsikaq nunakunaqa maldïtum kayan” (Juan 7:45-49).

Tsëpitanam, Judïukunapa Precisaq Cortinchö yanapakoq Nicodëmu nuna Jesusta defendirqan. Jesus kaqman paqaspa ëwanqampitaqa, ishkë wata pullannam pasarishqa karqan, y tsëchömi pëman markäkunqanta rikätsikurqan. Tsërëkurmi kënö nirqan: “Leynintsikqa manam permitintsu pï nunatapis manaraq wiyar y imata ruranqanta manaraq musyar juzganataqa, ¿aw?”. Tsënö niptinmi kënö niyarqan: “¿Qampis manam Galilëa provinciapitatsu kanki aw? Diospa Palabrampita alleq yachakï, y rikë Galilëa provinciapitaqa ni jukllëllapis Diospa willakoqnin mana sharkunampaq kaqta” (Juan 7:51, 52).

Galilëapita juk willakoq kanampaq kaqtaqa manam Diospa Palabranqa clärullaqa nirqantsu. Peru “juk nacion nunakuna täräyanqan Galilëa” markachö ‘alläpa atsikyaqta’ rikäyänampaq kaqtaqa musyatsikurqanmi (Isaïas 9:1, 2; Mateu 4:13-17). Jina Diospa Palabran ninqannömi Jesusqa Belenchö yurirqan y Davidpa kastampitam karqan. Itsachi fariseukunaqa tsë llapanta musyayarqan, tsënö karpis pëkuna llutanta parlayanqanrëkurchi nunakunaqa Jesuspaq llutanta pensayarqan.