Bautizakunqampita patsëqa, Jesusqa alläpa reqishqam tikrarirqan. Tsë watakunachöqa waranqëpayan judïukunam ruranqan milagruta rikäyashqa kayarqan, y tsëpitam nunakunaqa më tsëchö parlëkäyarqan. Jerusalenchö rurayanqan Ramäda fiestachöqa mëtsikaqmi ashikäyarqan.

Jesuspaqqa tukïtam nunakuna niyaq. Wakinqa alli nuna kanqantam niyarqan, peru wakinnam mëtsikaqta engañarnin mana alli nuna kanqanta niyarqan (Juan 7:12). Fiesta qallashqana junaqchöqa mëtsikaqmi Jesuspaqqa parlëkäyarqan, peru judïukunapa pushakoqninkunata mantsarninmi pipis defendirqantsu.

Tsë fiestachö këkarmi Jesusqa templuchö yachatsikur qallëkurqan. Y alli yachatsikunqanta wiyarmi, tsëchö këkaqkunaqa espantakuyarqan. Pëqa manam judïukunapa precisaq escuëlanman ëwashqatsu karqan, tsëmi kënö tapukuyarqan: “¿Imanöpataq kë nunaqa Diospa Palabrampita tsëläya yachëkun escuëlakunaman yachakoq mana ëwashqa këkar?” (Juan 7:15).

Jesusnam kënö nirqan: “Yachatsikunqäqa manam noqapatsu, sinöqa kachamaqnïpam. Pipis Pëpa munëninta rurëta munaq kaqqa, musyanqam yachatsikunqä Diospa kanqanta o kikïllapita kanqanta” (Juan 7:16, 17). Jesus yachatsikunqanqa Diospa Leynin ninqannöllam karqan, tsënömi rikätsikurqan Jehoväta alabayänanta munanqanta y manam pëtatsu.

Jina Jesusqa kënömi nirqan: “Moisesmi Leyta qoyäshurqëki, ¿aw? Peru manam ni mëqëkipis Leytaqa wiyakuyankitsu. ¿Imanirtaq wanutsiyämëta tïrayanki?”. Tsëchö këkaqkunapita wakinkunaqa manam tsë markapitatsu kayarqan, tsëchi Jesusta wanutsita munayanqantaqa musyayarqantsu. Juk alli yachatsikoqta wanutsita munayanqanqa mana creipaqnömi pëkunapaqqa karqan. Tsëmi supëyoq kanqanta pensarnin, kënö tapuyarqan: “¿Pitaq wanutsishïnikita tïran?” (Juan 7:19, 20).

Juk nunata säbaduchö kachakätsinqanrëkurmi Jesustaqa wanutsita munayarqan, tsëpitaqa juk wata pullannam pasashqa karqan. Kë kutichöqa, imëkatapis llutalla ruraq nunakuna kayanqantam Jesusqa cläru rikätsikurqan. Ollqu wamra puwaq junaqta cumpliramuptin, penqëninchö señalatsiyänampaq kaqtam Leyqa mandakoq y tsëtaqa säbadu junaqchöpis rurëta puëdiyanqantam yarpätsirqan. Tsëpitanam kënö nirqan: “Moises qellqanqan Leyta mana kaqpaq mana churayänëkirëkur säbadu junaqchö ollqu wamrata penqëninchö señalatsirqa, ¿imanirtaq noqawan feyupa piñakurkuyanki säbadu junaqchö juk nunata chipyëpa kachakäratsinqäpita? Amana rikäyanqëkillapitaqa juzgarnin sïguiyëtsu, tsëpa rantinqa alli kaqta cuentaman churar juzgayë” (Juan 7:23, 24).

Jerusalen nunakuna wanutsita munayanqanta musyarmi kënö niyarqan: “¿Këmi wanutsita tïrayanqan nunaqa aw? Y tsënö kaptimpis, ¡rikäyë!, nunakuna jananchömi parlëkan, y manam ni imatapis niyantsu. ¿Pë Cristu kanqantatsuraq gobernadorkunaqa alleq musyariyashqa?”. Mëtsikaqmi Jesus Cristu kanqantaqa creiyarqantsu; porqui musyayarqanmi pë mëpita kanqanta y “Cristu shamuptinqa manam ni pipis musyanqatsu” ninqanmanmi creiyaq (Juan 7:25-27).

Templuchö këkäyaptinmi Jesus kënö nirqan: “Qamkunaqa reqiyämankim, jina musyayankim mëpita kanqäta. Noqaqa manam kikïpa munënïpitatsu shamurqö, kachamaqnï Kaqqa rasumpam kawan, y qamkunaqa manam reqiyankitsu. Noqaqa pëta reqïmi, porqui pëpa jutinchömi  shamurqö, y Pëmi kachamashqa” (Juan 7:28, 29). Ninqanta wiyëkurmi, itsa carcelman llawitsita o wanutsita munarnin tsarita tïrayarqan. Peru manam tsariyarqantsu, porqui manam wanutsiyänampaq höraraqtsu karqan.

Peru tsënö kaptimpis, milagrukuna ruranqanta rikäyanqanrëkurmi mëtsikaq pëman markäkur qallëkuyarqan. Jesusqa yaku janampam purirqan, feyupa vientutam päraratsirqan, chusku tantallawan y ishkë pescädullawanmi waranqëpayan nunakunata mikutsirqan, qeshyëkaqkunatam kachakätsirqan, cöjukunata, wiskukunata, lepra qeshyayoq kaqkunata... ¡y wanushqakunatapis kawaritsirqanmi! Tsërëkurmi kënö tapukuyarqan: “Cristu shamurqa manachi kë nuna ruranqan señalkunapita mas señalkunataqa ruranqatsu, ¿aw?” (Juan 7:31).

Nunakuna tsënö niyanqanta fariseukuna wiyarirmi, pëkuna y precisaq sacerdötikunaqa guardiakunata kachayarqan Jesusta tsariyänampaq.