24 KAQ YACHAKUNËKIPAQ

¿Imatataq angelkunapaq Bibliachö willakun?

KICHË

Ciëluchö familiankunata reqinantsiktam Jehoväqa munan y angelkunaqa ciëluchö familiankunam kayan. Pëkunataqa “Teyta Diospa tsurinkuna” nirpis reqiyanmi (Job 38:7). ¿Imatataq angelkunapaq Bibliachö willakun? ¿Imatataq angelkuna rurayan? ¿Llapan angelkunatsuraq Jehoväpa familian kayan?

1 KAQ: ¿Imanötan angelkunaqa kayan?

Patsata manaraq kamarmi Jehoväqa angelkunata kamarqan. Angelkunaqa ciëluchömi kawayan y Jehovänö espïritu kayaptinmi rikëta puëdintsiktsu (Hebrëus 1:14). Mëtsika angelkuna karpis manam llapantsu igual kayan (Apocalipsis 5:11). Angelkunaqa Jehovä ‘ninqantam rurayan’ y ‘llapan mandakunqantam cäsukuyan’ (Salmus 103:20). Unë witsanqa sirweqninkunata imatapis musyatsinampaq y salvanampaqmi Jehoväqa angelninkunata mandaq. Kanan witsampis angelkunaqa Jehoväpita yachakuyta munaq nunakunata tarinapaqmi yanapamantsik.

2 KAQ: ¿Diabluwan demoniukunaqa pikunatan kayan?

Wakin angelkunaqa Jehoväpa contranmi churakäyarqan. Jukqa karqan ‘entëru patsata engañëkaq Diablu y Satanas niyanqanmi’ (Apocalipsis 12:9). Diabluqa gobernëta munarmi Adantawan Ëvata Diospa contran churakätsirqan. Tiempuwannam ciëluchö wakin angelkunatapis inkitarqan Diospa contran churakäyänampaq. Tsë angelkunam demoniukuna kayan. Mana cäsukoq angelkunataqa ciëlupitam Patsaman Jehovä qarqamushqa y ushakätsishqam kayanqa (leyi Apocalipsis 12:9, 12).

3 KAQ: Diabluwan demoniukunaqa, ¿imanötan nunakunata engañayan?

Diabluwan demoniukunaqa wanushqakunapa alman kawanqanta y nunakunawan parlëta puëdinqantam creitsikuyan. Tsëmi nunakunaqa brüjukunata ashiyan, curandërukunaman ëwayan, suertita qatitsikuyan y chaqchatsikuyampis. Qeshyarnimpis brüjukunamanmi jampikoq ëwayan. Tsënömi Satanaswan demoniukunaqa nunakunata engañayan. Peru Jehoväqa kënömi nin: “Wanushqakunawan parlayanqanta neqkunaman ni suerti qateqkunaman ama ëwayankitsu” (Levïticu 19:31). Jehoväqa musyanmi Diabluwan demoniukunaqa imëka mana allikunaman chätsimänantsikpaq kaqta, tsëmi nimantsik pëkunapita cuidakunantsikpaq.

MASLLA YACHAKUSHUN

Angelkuna imakunata rurayanqanta, brujerïa cösaskunata ashi, rikë o rurë mana alli kanqanta, y Diablupitawan demoniukunapita cuidakunapaq kaqtam yachakushun.

4 KAQ: Nunakuna Jehoväta reqiyänampaqmi angelkunaqa yanapakuyan

Angelkunaqa manam nunakunata Diospita yachatsiyantsu, sinöqa Jehoväpa sirweqninkunatam yanapayan Diospita yachakuyta munaq nunakunata tariyänampaq. Leyiyë Apocalipsis 14:6, 7 ima ninqanta y këkunapaq parlayë:

Diospita yachatsikurqa, ¿imanirtan angelkuna yanapamänata necesitantsik?
¿Ima ninkitan Diospita yachakuyta munaqkunata tarinëkipaq angelkuna yanapayäshunëkipaq kaqta musyar?

5 KAQ: Brüjukuna rurayanqanman ama creishuntsu

Diabluwan demoniukunaqa Jehoväpa contran karmi noqantsiktapis chikimantsik. Leyiyë Lücas 9:38-42 ima ninqanta y këpaq parlayë:

¿Demoniukunaqa imanötan nunakunata tratayan?

Nunakunata engañayänampaq demoniukuna rurayanqantaqa ama rikäshuntsu, wiyashuntsu ni katsishuntsu. Leyiyë Deuteronomiu 18:10-12 ima ninqanta y këkunapaq parlayë:

¿Demoniukunaqa imakunawantan nunakunata engañayan? ¿Markëkichöqa imakunawantan demoniukunaqa nunakunata engañayan?
¿Imanirtan Diosnintsikqa demoniukuna rurayanqankunapita cuidakunapaq nimantsik?

VIDEUTA rikäyë y këkunapaq parlayë:

VIDEU: “Diablupa contran churakäyë” (5:02)

Demoniukunapita tsapänanta munar llullumpa makinman Pamëla watanqanqa, ¿imanirtan peligrösu karqan?
¿Imatataq Pamëlaqa rurarqan demoniukunapita cuidakunampaq?

Jehoväta sirweqkunaqa manam demoniukunapa kaqtaqa nï imatapis katsinantsiktsu. Leyiyë Hëchus 19:19 y 1 Corintius 10:21 ima ninqanta y këpaq parlayë:

Brujerïa cösasta katsir o suertipaq nirnin imatapis katsirqa, ¿imanirtan llapanta ushakätsinëki?

6 KAQ: Diablutawan demoniukunataqa ama mantsëtsu

Satanas Diablum demoniukunapa mandaqnin, peru arcangel Miguelmi alli kaq angelkunata dirigin. Arcangel Miguelqa Señornintsik Jesucristum. ¿Imatataq Miguelpaq Bibliachö willakun? Leyiyë Apocalipsis 12:7-9 ima ninqanta y këkunapaq parlayë:

Pikunatan mas puëdeq kayan, ¿Diabluwan demoniunkunaku, o Miguelwan angelninkunaku?
Jehoväpa sirweqninkunaqa, ¿Diabluta y demoniukunata mantsashwanku?

Diabluta y demoniukunata vencita puëdinkim. Leyiyë Santiägu 4:7 ima ninqanta y këpaq parlayë:

Diablupita y demoniukunapitaqa, ¿imanötan cuidakunkiman?

WAKIN IMA NIYANQAN: “Brujerïa cösaskunata pelïculakunachö rikë, tsënö pukllakunawan pukllë o brüjukunaman ëwëqa allillam, manam peligrösutsu”.

Tsënö pensëqa, ¿imanirtan allitsu kanman?

KËTAM YACHAKURQUNKI

Alli angelkunaqa yanapamantsikmi, peru Diabluwan demoniukunaqa Jehoväpa contranmi churakäyashqa, y brüjukuna rurayanqankunawanmi nunakunata engañayan.