Imanö nuna kanqëkiqa manam rikäyäshunqëkillapitatsu ni jutikillapitatsu. Sinöqa allikunata ruranqëkipita, imaman creinqëkipita y imanö kanqëkipitam.

Imata ruranëkipaq kaqta y imata mana ruranëkipaq kaqta musyarqa, manam jukkuna niyäshunqëkillatatsu ruranki.

Adrianmi kënö nin: “Mëtsikaq nunakunam muñika cuenta kayan, tsëmi ima röpata churakuyänampaqpis jukkunaraq niyan”.

Cörim kënö nin: “Pï mëwan këkarpis, allita ruranäpaqmi yachakurqö. Amïgükunaqa musyayanmi alli rurëta munanqäta, y tsënö amïgukunatam noqapis akrä”.

BIBLIACHÖ YACHAKUNQANTSIK: “Kanan witsan imëkapis imanö këkanqanmannö kawëta jaqiyë; tsëpa rantinqa, pensënikikunata cambiar jukläyana tikrayë” (Romänus 12:2).

Alli kawakunëkipaqqa imata alli ruranqëkita, imachö mas alliyänëkipaq kaqta y imaman creinqëkita rikë. Kë tapukuykunam yanapashunki:

Allikunata ruranqä: “¿Imakunatatan rurëta yachä? ¿Imatatan mas alli rurä? ¿Allita ruranäpaq kallpachakokü? ¿Trabajador, yanapakoq y höranchö imatapis ruraqku kä? ¿Imakunatatan alli rurä?”.

KËMI YANAPASHUNKI: Imakunata alli ruranqëkita mana musyarqa, teytëkikunata o juk amïguïkita tapuy.

BIBLIACHÖ YACHAKUNQANTSIK: “Cada ünu alleq rikätsun kikimpa rurëninkunata, tsëqa kikin ruranqankunapitam kushikunqa, y manam juk nunawan igualatsikunqampitatsu” (Gälatas 6:4).

Këkunachö alliyänäpaq: “¿Imakunata ruranqächötan alliyänäpaq kallpachakunä? ¿Imakunata ruranqätan jutsa rurëman chäratsimanman? ¿Imakunata rurartan munënïtaraq rurëkä?”.

BIBLIACHÖ YACHAKUNQANTSIK: “Sitsun, ‘manam jutsantsik kantsu’ nintsik, tsëqa kikintsiktam engañakïkantsik” (1 Juan 1:8).

Creinqäkuna: “¿Diospita yachakunqämannöku kawakü? ¿Teyta Diosman creïkü? ¿Imanirtan Dios kanqanta creï? Qampaqqa, ¿imakunatan mana alli rurëkuna kayan, y imanir? ¿Shamoq tiempuchö ima pasanantatan shuyaranki?”.

BIBLIACHÖ YACHAKUNQANTSIK: “Yachëyuq karqa manam llutankunata rurankitsu. Alli yarpëyuq kënikim mana allikunapita tsapäshunki” (Proverbius 2:11).