Apostol Pablum Tesalönicachö cristiänukunata kënö nirqan: “Pillapis kë cartachö niyanqaqta mana wiyakuptinqa, penqakunampaq pëpita cuidakuyë” (2 Tes. 3:14). Unëqa pensarqantsik, tsënö nirqa anciänukunallata Pablu parlapëkanqantam. Juk wawqi o juk pani mana alli portakuptinqa anciänukunam Bibliawan kutin kutin consejayaq, peru mana cäsukuptinqa congregacionchömi discursuta rurayaq mana alli portakoq cristiänupita cuidakuyänampaq. Tsë discursuta wiyarirqa congregacionchö wawqi panikunaqa, reunionkunallachönam y Diospita yachatsikurllanam mana alli portakoq cristiänuwan juntakäyaq.

Peru Pablu ninqanwanqa cada cristiänum decidinan karqan tsë mana alli portakoq wawqiwan o paniwan juntakänampaq o mana juntakänampaqpis. Tsëqa, ¿mana alli portakoq wawqipita o panipita cuidakuyänampaq discursuta anciänukuna rurayänanku? Mananam. ¿Imanirtan kananqa tsënöna entiendintsik? Apostol Pablu ninqanta maslla yachakurishun.

Apostol Pablum nirqan, wakin cristiänukunaqa Diospa Palabranwan consejëkaptimpis mana alli portakur sïguiyanqanta. Këllaman pensarishun, punta kaq visïtanchömi kënö nishqa karqan: “Pï nunapis mana trabajëta munarqa, ama mikutsuntsu”. Tsënö consejashqa këkaptimpis wakinkunaqa trabajëta puëdikarmi, wanayanqan cösaskunapaq trabajëta munayarqantsu. Y wakinkunanam jukpa asuntunkunaman mëtikuyaq. ¿Imanötan congregacionchö wawqi panikunaqa tsënö portakoqkunata tratayänan karqan? (2 Tes. 3:6, 10-12).

Apostol Pablum kënö nirqan: “Pëpita cuidakuyë”. Cuidakuyë neq palabraqa griëgu idiömachö entienditsikun tsë mana alli portakoq pï kanqanta musyayänampaq y pënö portakuypita cuidakuyänampaqmi. Pabluqa manam anciänukunallatatsu cuidakuyänampaq nikarqan, sinöqa congregacionchö llapan wawqi panikunatam (2 Tes. 1:1; 3:6). Tsëqa, Diospa Palabranwan consejëkäyaptimpis juk wawqi o juk pani mana alli portakuptinqa, ¿imatataq juk cristiänu ruranman karqan? Kikinmi decidinan karqan tsë wawqiwan o paniwan juntakänampaq o mana juntakänampaq kaqtapis.

Tsënö nirqa, ¿congregacionpita rakishqatanö tratayänampaqku nikarqan? Manam. Tsëpa rantinqa apostol Pablum kënö nirqan: “Wawqitanö o panitanö consejar sïguiyë”. Tsëmi congregacionchö wawqi panikunaqa, tsë mana alli portakoq wawqiwan o paniwan reunionkunachö o Diospita yachatsikurpis juntakar sïguiyaq, peru juk rurëkunachöqa manam juntakäyaqtsu. Tsënöqa rurayaq, Pablu ninqannöpis ‘penqakunampaqmi’. Mana juntakäyaptinqa, capazchi mana alli portakoq wawqiqa o paniqa rurëkanqankunapita penqakurnin alli kaqtana rurar qallëkunman (2 Tes. 3:14, 15).

Y kanan witsanqa, ¿imanötan Pablu ninqanta cäsukushwan? Tsëpaqqa alliran musyanantsik, Pablu ninqannöpis, juk wawqi o juk pani rasumpa mana alli portakuykanqanta. Pabluqa manam conciencia asuntuchö jukläyata decideqkunapaqtsu, munanqantsiknö mana ruraqkunapaqtsu, nï ofedimaqnintsikkunapaqtsu nikarqan. Sinöqa Bibliawan cläru consejëkäyaptimpis mana cäsukoqkunapaqmi.

¿Imatataq rurashwan Bibliawan consejëkäyaptimpis juk wawqi o juk pani mana alli portakur sïguiptinqa? a Tsëtaqa cada ünum decidinantsik ima rurëkunachöpis mana juntakänapaq. Peru kikintsik decidishqa karmi, familiantsikwan tsë asuntupaq parlarpis, wakin wawqi panikunataqa willanantsiktsu. Peru tsë mana alli portakoq wawqiwan o paniwanqa, reunionkunachö o Diospita yachatsikurpis juntakarmi sïguinantsik. Y mana alli portakuyta dejarir alli kaqkunata rurar qallëkuptinqa, yapëmi invitanakur juntakëta puëdishun.