1, 2. ¿Imanötaq Jehoväqa alli këninta rikätsikun?

¿PITAQ qomarquntsik imëka kapamanqantsikkunata? Jehovä Diosnintsikmi. Porqui pëllapam örupis, plätapis y imëkakunapis. Pëqa alläpa alli Dios karmi, kawanantsikpaq llapan wananqantsikkunata qomantsik (Sal. 104:13-15; Ageu 2:8). Bibliaqa willakun, sirweqninkunata yanaparnin höraqa hasta milagrukunatapis ruranqantam.

² Këkunallaman pensarishun, Jehoväqa alli karmi israelïtakuna mikuyänampaq 40 watakunapa manä mikïta y yakuta qorqan (Ex. 16:35). Tsëmi imankunapis pishirqantsu (Neh. 9:20, 21). Jina juk waktsa viudapa ichiklla aceitintam mëtsikaman miraratsipurqan. Y viudaqa tsëta rantikurirmi jaqa këninta paqakurqan, y sobraq qellëtanam wamrankunawan utilizäyarqan (2 Rëy. 4:1-7). Jina Jesustapis podertam qorqan milagruta rurarnin mëtsikaq nunakunata mikïta qaranampaq y hasta wananqan qellëtapis tarinampaq (Mat. 15:35-38; 17:27).

3. ¿Imapitataq kë yachatsikïchö yachakushun?

³ Jehoväqa llapan wanaqkunatam yanapëta puëdin, peru tsënö  kaptimpis, sirweqninkunatam invitamantsik tarinqantsikkunawan markanchö yanapakunapaq (Ex. 36:3-7; leyi Proverbius 3:9 *). ¿Imanirtaq Jehoväqa qomanqantsikkunawan yanapakunantsikta munan? ¿Imanötaq Diospa unë sirweqninkunaqa Jehoväpita chaskiyanqankunawan yanapakuyarqan? ¿Imanötaq Diospa markan utilizan winakunqantsik qellëta? Kë yachatsikïchömi tsëkunapita rikärishun.

4. ¿Imatataq rikätsikuntsik kapamanqantsikkunawan yanapakurninqa?

⁴ Jehovätaqa, kuyarninmi y imëka qomanqantsikkunapita agradecikurninmi tarinqantsikkunapita qarantsik. Imëka qaramanqantsikman pensarqa rey Davidnömi sientikuntsik. Pëqa templu rurëpaq parlarninmi, llapan chaskinqantsikkunaqa Jehovällapita kanqanta, y pëta qaranqantsikkunapis pëpita chaskinqantsikkunalla kanqanta nirqan (leyi 1 Crönicas 29:11-14 *).

5. ¿Imanötaq Biblia rikätsikun kutitsimänata mana shuyarashpa yanapakurninqa Jehoväta adorëkanqantsikta?

⁵ Jina kapamanqantsikkunawan yanapakurqa Jehovätam adorëkantsik. Juk kutim apostol Juan wiyarqan Diospa sirweqninkuna ciëluchö kënö nikäyaqta: “Diosnïkuna Jehovä, qamllam derëchuyoq kanki alläpa precisaqpaq churayäshunëkipaq, respetayäshunëkipaq, y poderyoq kanëkipaq, porqui qammi llapan imëkakunata kamarqëki, y qampa munënikirëkurmi yuriyarqan y kamashqa kayarqan” (Rev. 4:11). Awmi, Jehoväqa alabanantsikta y respetanantsiktam merecin, tsëmi mas allin kaqkunata qaranantsik. Israelïtakunatam Dios mandarqan watachö kima kutipa fiestata rurayänampaq. Y kënömi nirqan: “Tsë fiestamanqa manam pipis jinëllaqa chänantsu” (Deut. 16:16). Rikanqantsiknöpis, qarëninkunawan ëwarninqa, israelïtakunaqa Jehovätam adorëkäyarqan. Jina tsënöllam kanampis, kutitsimänantsikta mana shuyarashpa Diospa markanchö yanapakurninqa Jehoväta adorëkantsik.

6. ¿Imanötaq kapamanqantsikkunapita Jehoväta qaranqantsik yanapamantsik? (Rikäri kë yachatsikïpa qallananchö këkaq fötuta).

⁶ Jehoväta shonqupita patsë qaranqantsikqa alli nuna kanapaqmi yanapamantsik (leyi Proverbius 29:21 *). Këllaman pensarishun, ¿imanötaq juk teyta sientikun qaranqan qellëwan juk wamran imatapis rantirir qarariptin? Alli kanqanta rikarmi alläpa kushikun. O ¿imanöraq juk jövin precursorpa teytankuna sientikuyanman wayichö gastukunapaq qellëta churaptin? Itsa teytankunaqa voluntäninta rikarnin alläpa kushikuyanqa. Jina tsënöllam, kapamanqantsikkunapita Jehoväta qararninqa alli kanqantsikta rikätsikïkantsik y pëqa tsënö kanqantsikpita alläpam kushikun.

7, 8. (1) Diospa unë sirweqninkunaqa, ¿ima rurëkunapaqtaq cösasninkunawan yanapakuyarqan? (2) ¿Jina ima maspaqtaq yanapakuyarqan?

⁷ Bibliam willakun, Diospa unë sirweqninkuna imapis pishiptin cösasninkunawan yanapakuyanqanta. Moisesmi israelïtakunata nirqan, carpa wayita Diospaq rurayänampaq materialkunawan  yanapakuyänampaq, jina tsënöllam rey Davidpis templu rurakänampaq materialkunawan yanapakuyänampaq nirqan (Ex. 35:5; 1 Crön. 29:5-9). Rey Jehoaspa tiempunchönam, sacerdötikuna templuta altsayarqan israelïtakuna qoyanqan qellëwan (2 Rëy. 12:4, 5). Y apostolkuna kawayanqan witsanchöpis, Judëachö cristiänu mayinkuna mallaqëta pasëkäyanqanta musyarirnin cada ünu kayäpunqanmannö yanapakuyarqan (Hëch. 11:27-30).

⁸ Jina Diospa markanchö yachatsikoqkunatapis yanapayarqanmi. Tsënöpa yachatsikur sïguiyänampaq. Yarpärishun, lëvitakunaqa manam wakin kastakunanötsu herenciata chaskiyarqan. Tsëmi Diospa carpa wayinchö trabajar sïguiyänampaqqa yanapayänantaraq wanayaq, tsëmi israelïtakunaqa diezmuta qornin yanapayaq (Nüm. 18:21). Tsënöllam Jesustawan apostolninkunatapis wakin warmikuna kayäpunqankunawan yanapayarqan (Lüc. 8:1-3).

9. ¿Diospa sirweqninkuna imanötaq tariyarqan yanapakuyänampaq?

⁹ Tsë yanapakuyanqan cösaskunaqa tukïnöpa tariyanqankunam karqan. Këllaman pensarishun, israelïtakuna Diospa carpa wayinta rurayänampaqqa Egiptupita apayanqan cösaskunatachi qoyarqan (Ex. 3:21, 22; 35:22-24). Apostolkuna kawayanqan witsanchönam, wakin cristiänukunaqa chakrankunata, wayinkunata o juk cösasninkunata rantikïkur tsë qellëta apostolkunata qoyarqan. Y apostolkunanam mas necesidäyoq kaqkunata repartiyarqan (Hëch. 4:34, 35). Wakinkunanam cada semäna ganayanqampita qellëninkunata rakiyaq, tsëwan Diospa kaqchö yanapakuyänampaq (1 Cor. 16:2). Rikanqantsiknömi, waktsa kaqkunapis y kapoqyoq kaqkunapis tariyanqankunawanqa yanapakïta puëdiyaq (Lüc. 21:1-4).

10, 11. (1) ¿Imanötaq yanapakushwan Diospa unë tiempu sirweqninkunanö? (2) ¿Imanötaq sientikunki Diospita yachatsikï më tsëman chänampaq yanapakurnin?

¹⁰ Kanampis kapamanqantsikkunawan yanapakïqa alläpam precisan. Itsa yanapakïta wanashun Diosta adoranantsik wayita altsanapaq o mushoqta ruranapaq. O itsa niramashwan Betel wayita altsayänampaq, asamblëakuna rurakänampaq, desgraciakunapa pasaq cristiänu mayintsikkunata yanapayänampaq qellënintsikkuna winakunantsikpaq. Jina winakunqantsikqa yanapanmi misionërukunata, congregacionkunata watukaqkunata, precursor especialkunata, Jehoväpa principal oficïnankunachö trabajaqkunata y juk sucursalkunachö trabajaqkunatapis. Itsa congregacionnintsikpis decidishqa Diosta adorana wayikunata o asamblëa localkunata rurakänampaq sucursalman qellëta ëkata apatsiyänampaq kaqta. Tsë qellëqa entëru Patsachö cristiänu mayintsikkunatam yanapan.

¹¹ Kë ushanan junaqkunachöqa Jehoväpa markan rurëkanqanchö llapantsikmi yanapakïta puëdintsik. Musyanqantsiknöpis, salonman ëwarninmi pitapis mana musyatsillapa tsëchö këkaq cäjaman kapamanqantsikmannö winakuntsik o jw.org päginapa aparatsintsik. Itsa pensashwan winakunqantsik qellëqa alläpa mana yanapakunqanta. Peru rasumpa kaqchöqa Jehoväpa markan chaskinqan qellëqa juntakan ichik ichik winakunqantsikpitam. Llapan cristiänu mayintsikkunam, hasta mas waktsa kaqkunapis apostolkuna kawayanqan witsanchö Macedoniapita cristiänukunanö kayan. Macedoniapita cristiänukunaqa alläpa waktsa këkarnimpis, imallawampis yanapakuyänampaqmi rogakuyarqan (2 Cor. 8:1-4).

12. ¿Imanötaq Jehoväpa Testïgunkunata Pushaqkunaqa yanapakunqantsik qellëta utilizäyan?

 ¹² Jehoväpa Testïgunkunata Pushaqkunaqa manam winakunqantsik qellëtaqa llutaqa gastayantsu (Mat. 24:45). Kë cristiänukunaqa Jehoväman alleq mañakurirnin y alleq pensëkurmi tsë qellëta utilizäyan (Lüc. 14:28). Unë witsankunapis confiakïpaq nunakunapa makinmanmi qellëta churayaq. Y pëkunaqa Jehoväta adoranapaq kaqkunallachömi utilizäyaq. Këllaman pensarishun, juk kutim Esdrasqa Jerusalenta ëwarqan Persiapita rey qonqan tesörukunata apakurkur; öruta, plätata y juk cösaskunatam aparqan y tsë llapankunapa chaninqa 100 millon dölarkunanömi karqan. Tsë tesörukunataqa Esdrasqa rikarqan Jehoväpatanömi, tsëmi apaqkunata mandarqan viäjichö alleq cuidayänampaq (Esd. 8:24-34). Tsëpita tiempuwannam apostol Pabluqa qellëta ëllurqan necesidäpa pasëkaq Judëachö cristiänukunapaq, y reparteqkunatam cläru mandarqan mana engañakushpa Jehoväpa y nunakunapa rikëninchö shumaq repartiyänampaq (leyi 2 Corintius 8:18-21). Kanan witsampis Jehoväpa Testïgunkunata Pushaqkunaqa Esdrasnö y Pablunömi yanapakurnin qonqantsik qellëtaqa shumaq utilizäyan.

13. ¿Jehoväpa Testïgunkunata Pushaqkuna kë qepa watakunachö ima cambiukunatataq rurayashqa?

¹³ Höraqa familiachöpis alläpa mana gastayänampaq o ganayanqampita masta mana gastayänampaqmi cuentata shumaq jorqarir cada killachö ëkallata gastayänampaq o imakunata mana rantiyänampaq shumaq patsätsiyan. Jina tsënöllam Jehoväpa Testïgunkunata Pushaqkunapis kë qepa watakuna imëkata rurayänan precisashqa, y tsëqa chaskiyanqampita mastam qellëta wanakashqa. Tsëmi churakunqantsik qellëta lluta mana gastayänampaq mas precisaq kaqkunallatana rurayashqa.

14-16. (1) ¿Imakunata rurayänampaqtaq utilicëkäyan churakunqantsik qellëta? (2) ¿Y qamtaqa imanötaq yanapashurqunki Jehoväpa markampita chaskinqëki qarëkuna?

¹⁴ Jehoväta mëtsika watapana sirweqkunam niyan, kanan witsanqa imëpitapis mas Jehoväpa markampita qarëta chaskishqa kayanqanta. Y rasun kaqllatam niyan, porqui kë qepa watakunaqa yarqamushqa jw.org pägina, JW Broadcasting nishqan canal, Bibliatapis idiömankunachö chaskiyashqa, jina 2014 y 2015 watachömi atska nacionkunapaq “Diospa Gobiernunta puntata ashiyë” nishqan asamblëapis rurakarqan 14 nacionkunachö. Tsëman llapan ëwaqkunam alläpa kushishqa sientikuyarqan.

¹⁵ Diospa mëtsikaq sirweqninkunam alläpa agradecikuyan Jehoväpa markampita tukïläya  yanapakïkunata chaskiyanqampita. Asiapa juk markanchö täraq juk matrimonium JW Broadcastingpaq kënö nirqan: “Höraqa, alläpa karuchö karninmi qonqashqanö sientikuyä y Jehovä markanwan rurëkanqankunataqa raslla qonqariyä. Peru JW Broadcastingta rikärirqa yarpäriyämi entëru Patsapa këkaq Diospa markanchö këkäyanqäta. Këchö cristiänu mayïkunaqa alläpa kushishqam sientikuyan JW Broadcastingta cada killa rikarnin. Y Jehoväpa Testïgunkunata Pushaqkunawan juntu këkaqnö sientikuyanqantam imëpis parlayan. Kananqa imëpitapis masmi Jehoväpa markanchö kayanqanta alläpa kushishqa sientikuyan”.

¹⁶ Entëru Patsapam Diosta adoranantsik wayikunata cäsi 2 mil quinientustanö rurëkäyan o altsëkäyan. Juk mushoq salonta rurariyaptinmi Hondüraspita wawqikuna kënö niyarqan: “Jehoväpa markanchö kayanqäpita y cristiänu mayïkunawan juk shonqulla kayanqäpitaqa alläpam kushikuyä. Porqui Jehovä y entëru Patsachö cristiänu mayïkuna yanapayämaptinmi alläpa shuyaräyanqä shumaq salonyoqna këkäyä”. Jina tsënöllam wakin cristiänukunapis alläpa kushikuyan idiömankunachö Bibliata o juk publicacionkunata chaskirnin, desgraciakunapa pasarnin yanapakïta chaskirnin o markankunachö nunakuna mas puriyanqan sitiukunachö yachatsikuyaptin nunakuna shumaq wiyakuyaptin.

17. ¿Imanötaq musyantsik markanta Jehovä kanan witsan yanapëkanqanta?

¹⁷ Mana Testïgu kaqkunaqa manam creiriyantsu voluntänintsikpita churakunqantsik qellëllawan imëkata ruranqantsikta rikarnin. Juk emprësachö trabajaq precisaq nunam publicacionnintsikkunata imanö impriminqantsikta rikaq ëwarqan. Tsëchö trabajaqkuna llapampis grätislla trabajayanqanta rikar, churakunqantsik qellëlla tinkunqanta y qellëta ëllunantsirëkur actividäkunata mana ruranqantsikta musyarirmi alläpa espantakurqan. Y noqantsik rurëkanqantsikta pipis rurëta mana puëdinampaq kaqtam nirqan. Y rasun kaqllatam nirqan, porqui Jehovä mana yanapamashqaqa manam tsë llapanta rurëta puëdishwantsu (Job 42:2).

18. (1) ¿Jehoväpa Gobiernumpita yachatsikïchö yanapakurninqa imataraq chaskishun? (2) ¿Imanöraq wamrakunata y tsëraq yachakïkaqkunatapis yachatsishwan yanapakuyänampaq?

¹⁸ Gobiernumpita yachatsikïchö kanan witsan yanapakunapaqmi Jehoväqa permitimantsik. Y tsëta rurashqaqa bendicimänapaqmi änimantsik (Mal. 3:10). Jina qarakoq nunapa llapan rurëninkunapis allilla yarqunampaq kaqtam nimantsik (leyi Proverbius 11:24, 25 *). Qarakoq karninqa kushishqam kashun, porqui “imatapis qokïmi imata chaskipitapis mas kushikïtaqa apamun” (Hëch. 20:35). Rurënintsikwan y parlakunqantsikwanmi wamrantsikkunata y tsëraq yachakïkaqkunatapis yachatsita puëdintsik pëkunapis qellëninkunawan imanö yanapakuyänampaq y bendicionkunata chaskiyänampaq.

19. ¿Imanötaq kë yachatsikïqa yanapamarquntsik?

¹⁹ Llapan kapamanqantsikpis Jehoväpitam shamun. Tsëmi kapamanqantsikwan yanapakunqantsikqa rikätsikun, pëta kuyanqantsikta y noqantsikpaq ruranqankunapita agradecikunqantsikta (1 Crön. 29:17). Templuta rurayänampaq israelïtakuna yanapakurirqa “alläpa[m] kushikuyarqan voluntäninkunapita qarashqa karnin, porqui shonqunkunapita patsëmi voluntäninkunapita Jehoväta qarayarqan” (1 Crön. 29:9). Noqantsikpis Jehovä qomanqantsikwan yanapakurqa kushishqam kashun.