CANADÄ nacionchö täraq Don jutiyoq Jehoväpa testïgunqa, alläpam kallpachakun cällikunachö täraq nunakunata Diospita parlapänampaq. Pëmi juk nunawan ima pasakunqanta kënö willakun: “Cällikunachö täraq nunakunata reqinqäpitapis, Pëterqa mas qanra o qacha nunam karqan. Alläpa mana allim tratakoq, y pipis pëman witinantaqa manam permiteqtsu. Kuyëpa tratëta munaqkunatapis manam chaskeqtsu”. Tsënö kaptimpis, Donqa 14 watapitapis masmi kallpachakurqan shumaq tratarnin.

Juk junaqmi Pëterqa Donta kënö nir tapurqan: “¿Imanirtaq noqapaq alläpa yarpachakunki? Porqui manam pipis noqamanqa yarpachakuntsu, peru ¿imanirtaq qamqa?”. Donqa yachëllapam textukunata utilizarqan Pëterpa shonqunman chänampaq. Puntataqa Diospa jutinta musyanqanta o mana musyanqantam tapurirqan, tsëpitanam Bibliachö Salmus 83:18 textuta leyirinampaq nirqan. Tsëpitanam, imanir pëman yarpachakunqanta rikätsinampaq Romänus 10:13, 14 textuta leyinampaq nirqan. Tsë textuqa kënömi nin: “Jehoväpa jutinchö llapan qayakoq kaqkunam salvashqa kayanqa”. Y ushanampaqnam leyirapurqan Mateu 9:36 textuta y kënömi nin: “Mëtsikaq nunakunata rikëkurmi [Jesus] alläpa ankuparqan, porqui mitseqninnaq üshakunanömi sufritsir ushashqa y ramakashqa këkäyarqan”. Tsëpitanam, Pëterta kikin leyirinampaq nirqan. Leyirirnam, nawimpis weqillana kënö tapurqan: “¿Tsë üsha cuentaku noqa këkä?”.

Pëterqa cambiukunatam rurarqan. Bañakurirqanmi y shapruntapis shumaqmi rutukurirqan y Don qaranqan röpawanmi shumaq vistikurqan. Tsëpita patsëmi, limpiu y alli altsapäkushqallana purita procurarqan.

Pëterqa cada junaq imata ruranqantam juk cuadernuman qellqaq. Tsëraq qellqar qallanqankunaqa llakinëpaqmi kaq, peru ushanan kaqkunaqa jukläyanam karqan. Kënö nirmi qellqanaq: “Kanan junaqmi Diospa jutimpita yachakurqö. Kananqa, mañakurnin Jehoväwan parlëta puëdïnam. Jutinta reqiqa alläpa kushikïpaqmi.  Donmi nimashqa Jehoväwan amïgü këta puëdinqäta, y imapita o imë höra parlapaptïpis Jehoväqa wiyamänampaq kaqta”.

Ushanan kaq qellqanqankunaqa familiankunapaqmi karqan. Y kënömi nin:

“Kanan junaqqa mana allinam sientikü. Porqui edäyashqanam këkä. Peru wanukurqa, Shumaq Patsachö amïgu Donwan tinkunäpaq kaqtaqa segürum këkä. Kë qellqanqäta leyïkäyaptikiqa mananam qamkunawan këkäshaqnatsu. Pampayämanqëki junaq, mana reqiyanqëki juk nunata tsëchö rikarninqa pëwan parlayanki, y rogayaqmi leyiyë kë azul libruta. * Mushoq patsachö amïgüta yapë rikänäpaq kaqtam nin, tsëtaqa llapan shonqüwanmi crei. Kuyayäshoqniki Pëter”.

Pëterta pampariyaptinmi, panin Ummiqa kënö nirqan: “Ishkë watanönam pasarishqa Pëter ashimanqampita. Manam imëpis rikarqätsu tsënö kushishqataqa”. Jina Dontapis kënömi nirqan: “Kë librutaqa leyishaqmi, porqui turïpa shonqunman chashqa këkarqa alläpa shumaqchi”. Jina Ummiqa, munarqanmi Jehoväpa juk testïgun watukananta Rasumpëpaqa, ¿imatataq Biblia yachatsikun? libruwan yachakuyänampaq.

Noqantsikpis ama janapa imanö kayanqanllataqa rikäshuntsu. Rasumpa kaq kuyakïta rikätsikïta y tukïläya nunakunawan pacienciayoq këtaqa puëdintsikmi (1 Tim. 2:3, 4). Tsënö rurarqa, janapa rikëninkunachö mana allinö kayaptimpis, itsa Pëternö nunakunapa shonqunkunaman rasumpa kaq chänampaq yanapëta puëdishunmi. Awmi, Jehoväqa ‘shonqukunata rikaq’ Diosmi. Y pëman witita munaqkunapa shonqunkunachö rasumpa kaq yachatsikïta winatsinampaq kaqtaqa, segürum këkantsik (1 Sam. 16:7; Juan 6:44).