5 Mana rasun kaq yachatsikï: Marïaqa Diospa mamanmi

¿Imanötaq tsë yachatsikï yurimushqa? “Diospa mamantaqa más adorayarqan, [...] punta kaq Iglesiachö tukï dioskunata adoraqkuna más mirayaptinmi. [...] [Pëkunaqa] ‘hatun mama diosata’ y ‘divina virgenta’ unëpitana adorar yachakäkushqa karmi, Dios munanqannö adoracionta paqwë haqiriyarqan.” (The New Encyclopædia Britannica, 1988.)

¿Imatataq Bibliaqa yachatsikun? “Qeshpikunki[m] juk wamrata, i jutin churanki JESUS. Keymi kanqa jatun, i kanqa jutitsashqa Altïsimupa Tsurin; [...] tseyreykurmi Santu Yureqpis, jutitsishqa kanqa Dyospa Tsurin.” (Lucas 1:31-35, QKW.)

Kë textochö rikanqantsiknöpis, Marïaqa manam Diospa mamantsu karqan, antis ‘Dyospa Tsurinpa’ mamanmi karqan. Ciëlopis Diospaq ichiklla kanqantam Bibliaqa rikätsimantsik, ¿tsëtsuraq Marïapa pachanchö Dios rurakanman karqan? (1 Reyes 8:27.) Hinamampis, pëqa manam ni imëpis Diospa mamanmi kä nerqantsu. Tsëpenqa, ¿imanirtaq nunakuna creiyan Maria Diospa maman kanqanta? Kima Dios hukllëllachö kanqanta creirmi. 431 wata Efeso markachö religioso nunakuna ëllukarnin Marïapaq “Diospa maman” o Theotokos (kë palabraqa “Diosta qeshpikoq” ninanmi Griego idiömachöqa) niyanqampitam, pëta adorar qallëkuyarqan. Alli musyashqaqa, religiösokuna ëllukäyanqan Efeso markachöqa, miratsikoq diosa nirmi unë tiempopitana adorayaq Artemis nishqan diösata.

Kanan witsan Marïata adorar procesionkunata rurayanqanqa, unë Artemis diösata adorar rurayanqannöllam, y tsë diösapa imägennimpaqqa creiyaq “cielupita shicwamushga” kanqantam (Hechos 19:35, NTCN). Tsënömi ichikllapa ichikllapa imägenkunata unë cristiänokuna adorar qallëkuyarqan.

Kë versïculokunata rikäri: Mateo 13:53-56; Marcos 3:31-35; Lucas 11:27, 28.

RASUN KAQ:

Diospa Tsurimpa mamanmi karqan Marïaqa. Diospa mamanmi nirqa yachatsikuyarqan, Kima Dios Hukllëllachö kanqanta creirmi.