¿Imatataq Diospita Jesus yachatsikurqan?

“Noqallam Dios Yayäta reqï y noqa reqitsiptïllam waquincunapis Dios Yayata reqiyanqa.” (LUCAS 10:22.)

PATSACHÖ nunanö manaraq yurirmi Diospa mayor Tsurinqa atska tiempo kawarqan Teytampa lädonchö (Colosenses 1:15, QKW). Tsëchömi rikarqan Teytan imanö pensanqanta, imanö sientekunqanta y imanö imatapis ruranqanta. Tsëmi Patsaman shamurpis Teytampita alli reqitsikïta tïrarqan. ¿Imataraq yachakushwan Jesus yachatsikunqampita?

Diospa shutin. Jesuspaqqa alläpam precisarqan Teytampa shutin Jehová kanqanta nunakuna musyayänan y tsë shutimpa reqiyänan. Kikin Jesuspa shutimpis “Jehovämi Salvakoq” ninanmi. Tsëmi wanutsiyänan hunaqpa qanyannin paqas mañakurpis “reqitsirqömi jutikita” nirqan Teytanta (Juan 17:26, QKW). Jesusqa Diospa shutinta parlaqmi, y wiyaqninkunatapis yachatsirqanmi. Mana yachatsiptinqa, ¿imanöraq nunakuna Jehoväta reqiyanman karqan, ima shutin kanqanta y shutin ima ninan kanqantapis mana musyëkarqa? *

Alläpa hatun kuyakïnin. Huk kutim Teytanman mañakurnin, “manaraq que patsata camarninmi, noqata cuyamarqequi” nirqan Jesus (Juan 17:24). Ciëlochö këkarmi Jesus rikarqan Dios alläpa kuyakoq kanqanta; tsëmi Patsaman shamurpis nunakuna tsëta musyayänanta munarqan.

Jesusqa yachatsikurqan Jehová llapan nunakunata kuyanqantam. “Que patsacho nunacunata allapa cuyarninmi, Dios jucllella tsurinta cachamorqan, peman marcäcoqcuna mana condenashqa cayänanpaq sinoqa wiñepa cawayänanpaq” nirqanmi (Juan 3:16). Tsëqa rasunmi, Diosqa llapan nunakunatam kuyan. Nunakunata alläpa kuyarninmi, llapampita más kuyashqa Tsurin wanunanta haqirqan. Tsënömi sirveqninkunata hutsapita y wanïpita salvanan karqan, tsënöpa imëyaqpis kawakïta tariyänampaq. Kuyamanqantsikta Diosnintsik rikätsimanqantsiktaqa manam yuparpis ushashwantsu (Romanos 8:38, 39).

Cada uno sirveqninkunata Dios kuyanqantapis Jesusqa yachatsikurqanmi. Imëka huk mitsikoq atska üshayoq karpis, cada ünota kuyanqannölla Diospis cada sirveqninta kuyanqantam yachatsikurqan (Mateo 18:12-14). Hina huk pishqullapis wanur patsaman shikwariptin Jehová musyanqantam yachatsikurqan. Y manam tsëllatsu, hina “llapan aqtsequicunatapis jucllellapayan yupashqam quecatsin” nirqanmi (Mateo 10:29-31). Pensari, Jehoväqa rikëkanmi huk pishqu qeshumpita yarquptinllapis, ¿tsëtsuraq cada uno sirveqninkunapaq yarpanmantsu? Y aqtsantsiktapis yupëkarqa, ¿imanöraq qonqëkunman imata wananqantsikta, kallpachakunqantsikta y ima llakitsimanqantsiktapis?

Ciëlochö Teyta. Rikanqantsiknöpis, Jesusqa Diospa hukllëlla Tsurinmi. Tsëchi imëpis ‘Teytä’ neq Pëpaq. Hinamampis, Bibliachöqa Jesus parlanqan yurir qallamun 12 watayoq  këkar templochö Jehoväpaq ‘Teytä’ ninqampitam (Lucas 2:49, QKW). Punta qellqayanqan Bibliapa Mateo, Marcos, Lucas y Juan libronkunachöqa 190 kutim “Teyta” nin Jehoväpaq. Jesusqa Teytampaq parlarnin mëtsika kutim ‘Yayantsic’, “Yayalläcuna” y “Yayä” nirqan (Mateo 5:16; 6:9; 7:21). Tsënömi rikätsikurqan hutsasapa këkarpis pï më Jehová Diosta Teytantanö rikëta y kuyëta puëdenqanta.

Llakipäkoq y perdonakoq. Jesusqa musyarqanmi hutsasapa karnin Dios llakipämänata o ankupämänata wananqantsikta. Tsëmi huk wambra wayimpita ëwakushqa këkar kutiptin teytan kushishqa chaskinqanta yachatsikur, Diospis tsënölla kanqanta rikätsikurqan (Lucas 15:11-32). Jehoväqa mana alli ruranqantsikpita ichikllapis wanakunantsiktam shuyaran tsënöpa perdonamänapaq. ¿Imanirtaq shuyaran? Hutsampita wanakoqta perdonëta munarmi. Jesusmi kënö nirqan: “Juc jutsasapa juclaya ticrariptenqa [“wanakuptinqa”, NM], sieluchopis masraq cushicuyan tse isqon chunca isqon (99) alli ruraq nunacunapaq cushicuyanqanpitapis” (Lucas 15:7). ¿Manatsuraq tsënö llakipäkoq Diosta maslla reqita munankiman?

Wiyanmi mañakushqa. Jehoväqa “mañakïkuna Wiyaq” karninmi sirveqninkuna pëman mañakuyänanta munan, y tsëtam ciëlochö këkarnin Jesus yachakurqan (Salmo 65:2). Tsëmi Patsachö këkarnin qateqninkunata yachatsirqan imanö mañakuyänampaqpis. Mañakurnin “juc parlayashqanllata cutïcuryan ushepa ushar mana parlacuyanampaqmi’ nirqan. Hina yachatsirqanmi Diosta imata mañakuyänampaqpis: munëninta ‘sielucho rurayanqannolla, que patsachopis nunacuna rurayänampaq’, cada hunaqpaq wanayanqanta qonampaq, hutsankunapita perdonanampaq, y mana alli rurëkunaman mana ishkiyänampaq (Mateo 6:5-13). Jesusqa alli clärom rikätsikurqan Jehoväqa kuyakoq karnin, sirveqninkuna llapan shonqunkunawan mañakuyaptin wiyanqanta (Mateo 7:7-11).

Alli clärom këkan: Jesusqa yachatsikurqanmi Jehová pï kanqanta y imanö Dios kanqantapis. Pero mastaran Jesusqa musyatsikïta munarqan: kë Patsapaq y nunakunapaqpis Dios munanqanta imawan ruramunampaq kaqta. Y tsëpita yachatsikïtam más precisatsirqan.

[Päginapa ura kuchunchö willakï]