Leeqkuna tapukuyanqan

¿Shumaq Patsachö kawëta ajayäshuntsuraq?

▪ Bibliaqa nimantsik huk shumaq Patsachö mana wanushpa kawakunapaq kaqtam (Salmo 37:29; Lucas 23:43). Tsënö kaptimpis, ¿mana wanushpa hutsannaq kawakïqa ajayëpaqtsuraq kanqa?

Tsënö tapukïqa entendïpaqmi. Imëpis aburrido kawaq nunakunaqa, yarpachakurlla y llakikurllam imëka qeshyakunaman y mana allikunamampis chäriyan. Hinamampis imapaq kawayanqanta mana musyaqkuna y huk rurëllachö imëpis kakoqkunaqa, imatapis rasllam ajayäriyan. Pero, ¿shumaq Patsachö täraqkunaqa kawëta ajayäriyanqatsuraq? ¿Huk rurëyoqllatsuraq imëpis kawakuyanqa?

Tsëta musyanapaqqa, puntataqa yarpänantsik mana wanushpa kawëtaqa kikin Jehová Dios awnikunqantam (Juan 3:16; 2 Timoteu 3:16). Pëqa alläpa kuyakoqmi (1 Juan 4:8). Alläpa kuyakoq karmi, kanan witsan kawakunapaqpis tukïta qomarquntsik (Santiago1:17).

Kamamaqnintsikqa musyanmi alli trabäjokunata kushishqa kawakunapaq wananqantsikta (Salmo 139:14-16; Eclesiastés 3:12). Mushoq Patsachö täraqkuna trabajayanqanqa kanqa kikinkunapaq y familiankunapaqmi, manam huk máquina cuentatsu imachöpis mana kushikushpa trabajayanqa (Isaías 65:22-24). ¿Ajayärinkimantsuraq imëpis mana ruranqëki alli trabäjokunata rurarnin?

Hina yarpänantsikmi, Jehoväqa manam llapan nunakunatatsu mana wanushpa kawëtaqa qonqa. Sinöqa wambran Jesucristu mandakunqanta ruraq kaqkuna y qateq kaqninkunallam tsëchö kawayanqa (Juan 17:3). Jesus kë Patsachö këkarqa Teytan munanqantam kushishqa rurarqan. Qateqninkunatam parlëninwan y rurëninwan yachatsirqan rasumpëpa kushikïta wakinkunata yanaparlla tariyänampaq kaqta (Hechos 20:35). Tsë mushoq Patsachöqa: Jehová Diosnikita kuyë y nuna mayikitapis kuyë nishqan mandamientokunata wiyakurmi llapan nunakuna kawakuyanqa (Mateo 22:36-40). Pensakurki, imanö kushikïpaqraq kanqa kuyamanqantsik nunakunawan y trabajëta gustaq nunakunawan junto këqa. Tsënö kaptinqa, ¿ajayärinkitsuraq tsënö junto kawakïta?

¿Hina ima mastaq kanqa mushoq Patsachö? Cada hunaqmi Diosnintsikpita más yachakushun. Kanan witsan nunakunaqa Jehová kamanqampitam tukïta yachakïkäyan (Romanos 1:20). Tsënö karpis kananyaqqa ichikllatam reqiyan. Atska waranqa pasaq watakunachö kawashqa Job nunam, Diosnintsik kamanqankunaman pensarqan, tsëmi ichikllata reqinqanta rikätsikurqan kënö nirnin: “¡Rikäyë! Këkunaqa rurëninkunapa kuchunllam, y, ¡ima parlëkunataq shimi rurinllachönö Jehoväpita wiyakashqa! Mana tanteana kallpampita, ¿pitaq tsëta musyanman?” (Job 26:14).

Imëyaqpis mana wanushpa kawarnimpis, manam musyashuntsu Jehoväpa llapan rurënintaqa. Bibliaqa nimantsik Dios kamamarnintsik shonquntsikman imëyaqpis kawakï munëta churamunqantam. Hina ninmi, “qallanqampita ushanqanyaq Dios ruranqankunata nunakuna imëpis mana musyayänampaq” kaqta (Eclesiastés 3:10, 11). ¿Jehová Diospita yachakïta ajayärinkitsuraq?

Kanan witsampis manam ajayäkuriyantsu Diosnintsikta kushitsinqan rurëkunata rurarqa y nuna mayinkunata yanaparninqa. Tsënö alli rurëkunachö ocupado karninqa, manachi mana wanushpa kawëtaqa ajayärishuntsu.

[31 kaq päginachö pikunapa kanqan]

Globo terráqueo: cortesía de Image Science and Analysis Laboratory, NASA-Johnson Space Center; galaxia: The Hubble Heritage Team (AURA/STScI/NASA)