¿Imatataq rurayanman kanan witsan kaq cristiänokuna?

RASUMPA kaq cristiänokunaqa Jesus ruranqantam qatiyan, tsëmi polïticaman mëtikuyantsu. Jesusqa alli clärom nirqan “cay mundupita mana can[ganta]”. Y qateqninkunapaqnam kënö nirqan: “Paycunaga manam cay munduchö runacunanönatsu cayan” (Juan 15:19; 17:14, NTCN). Rikärishun cristiänokuna polïticaman imanir mana mëtikuyanqanta.

1. Nunakunaqa manam puëdeyantsu alli gobernëta. Bibliaqa willakun nunakunaqa o runakunaqa kikinkunapura gobernanakïta mana puëdeyanqanta, y gobernanakuyänampaq mana kamashqa kayanqantam. Profeta Jeremïasmi nirqan nunaqa “kikinllapita mana purinqanta” (Jeremías 10:23).

Imanömi nunaqa volanampaqtsu o pärinampaqtsu kamashqa, tsënöllam gobernanampaqtsu kamashqa. Unë pasanqankunata willakoq David Fromkin jutiyoq nunam, nunakuna alli gobernëta mana puëdeyanqampaq parlar kënö nin: “Gobernaqkunaqa nunakunallam kayan, y nunakunaqa imëpis pantayanmi, tsëmi munayanqannö alli gobernëtaqa puëdeyantsu” (The Question of Government). ¡Tsënö kaptinchi Bibliaqa nimantsik nunakunaman mana markäkunapaq o yärakunapaq! (Salmo 146:3.)

2. Mana alli espïritukunaqa pakëllapam imëkata rurayan. Satanasqa llapan gobiernokunatam Jesusta awnirqan, y Jesusqa manam negarqantsu Satanaspa makinchö llapan këkanqanta. Tsëmi juk kuti Jesus nirqan “mana alli ruraqcunapa mandacoqnin[qa] diablu” kanqanta. Y atska watakuna pasariptinnam, apóstol Pablupis nirqan “que patsacho mandacoq[qa] diablu” kanqanta (Juan 14:30; 2 Corintios 4:4). Juk kutim cristiano mayinkunaman cartakurnin Pablu kënö nirqan: “Pelyecantsic [...] mana ricanqantsic puedeq supëcunawanmi, diabluwanmi y tse diablupa mandaduncuna ruraq demoniucunawanmi. Pecunam jinantin munducho nunacunata llutanta ruratsiquican” (Efesios 6:12). Rikanqantsiknöpis, kë Patsata rasumpa gobernaqkunaqa kayan pakëllapa tukïta ruraq mana alli espïritukunam. Tsëta musyëkarqa, ¿imanötaq cristiänokuna rikäyanman polïticata?

Këman pensarishun. Nunakuna patsätsiyanqan o kamakätsiyanqan polïticakunaqa kayan imëka tamya witsan jatun mayuman ishkeq  nuna cuentam, y tsë jatun mayu cuentaqa mana alli espïritukunam kayan. Imanömi tsë jatun mayuman ishkeq nuna ni imanöpa tsarakïta puëdentsu, tsënöllam polïticokunapis ni imata rurëta puëdeyantsu mana alli espïritukunapa munëninkunapita tsarakuyänampaq. Tsë mëtsika demoniokunaqa chipyëmi churapakäyashqa nunakunata imëka mana allikunata ruratsirnin sufritsiyänampaq (Apocalipsis 12:12). Tsëmi Satanaspitawan demonionkunapita más puëdeqraq tsëta altsëta puëden. ¿Pitaq tsë puëdeqqa? Jehová Diosmi (Salmo 83:18; Jeremías 10:7, 10).

3. Rasumpa kaq cristiänokunaqa Diospa Gobiernonllatam yanapayan. Jesuswan qateqninkunaqa musyayarqanmi Dios Gobiernonta ciëlochö patsätsinampaq o kamakätsinampaq kaqta. Bibliaqa nin tsë Gobiernochö Jesucristu mandakunampaq Jehová patsätsinqantam (Apocalipsis 11:15). Tsë Gobierno nunakunarëkur imëka allikunata ruramunampaq kaqtam Jesusqa musyarqan, tsëmi tsë Gobiernopa “mandaquinincho nunacuna imano cayänanpaq canqanta willa[curqan]” (Lucas 4:43). Jina qateqninkunatapis yachatsirqanmi “llapan nunacuna mandadiquicho catsun” nir mañakuyänampaq. ¿Imanir? Porque tsë gobiernochöqa ciëlochönömi Diospa munënin Patsachöpis rurakanqa (Mateo 6:9, 10).

Tsëqa, ¿imaraq pasanqa nunakunapa gobiernonta? Bibliaqa willakun entero nasionkunachö këkaq tukï clase polïticakuna ushakäyänampaq kaqtam (Apocalipsis 16:14; 19:19-21). Tsëmi, Diospa Gobiernon nunakunapa gobiernonkunata ushakätsinampaq kaqta creeqkunaqa, ni mëqan clase polïticaman markäkuyantsu o yärakuyantsu. Jinamampis, ushakäyänampaq kaqta musyëkarnin nunapa gobiernonta yanaparqa, Diospa contranchi churakëkäyanman.

Tsëqa, rasumpa kaq cristiänokuna política asuntokunaman mana mëtikuyanqanqa, ¿markankunachö yanapakïta mana munayanqantaku rikätsikun? Kë tapukïpa respuestantaqa qateqnin kaq yachatsikïchömi rikäshun.

[7 kaq päginachö ninqan]

Jehoväpa testïgonkunaqa Diospa Gobiernonta yanaparmi política asuntokunaman mëtikuyantsu