Punta nuna (runa) Adanqa, atska pachak watakunapam kawarqan, tsënö karpis awkinyarqan y wanurqanmi. Tsëpita patsëmi nunakunaqa imëkata rurayashqa mana awkinyäyänampaq ni wanuyänampaq, peru manam lograyashqatsu. ¿Imanir? Jutsarëkur. Diosta mana wiyakurnin jutsaman ishkinqanrëkurmi Adanqa wanurqan, y tsë jutsata noqantsikta muyamashqantsik kaptinmi noqantsikpis pënölla wanuntsik. (Leyi Genesis 5:5 y Romänus 5:12.)

Imëyaqpis kawakunapaqqa, ministintsik pillapis rescätita pagakunantam (Job 33:24, 25). Juk rescätiqa, presurëkaqta libri dejayänampaq pagakïmi; y noqantsikpaq parlarninqa wanïpita libramänapaqmi (Exodu 21:29, 30). Noqantsikrëkur kawëninta qorninmi, Jesusqa tsë rescätita pagakurqan. (Leyi Juan 3:16.)

Manam llapan nunakunatsu qeshyapita y wanïpita librakäyanqa. Adan ruranqannö Diosta mana wiyakoqkunaqa, wanuyanqam. Jutsankunapita perdonashqa kaqkunallam imëyaqpis kawayanqa. (Leyi Isaïas 33:24 y 35:3-6.)

Perdonashqa kanapaqqa, Diospitam yachakunantsik Palabran Bibliata estudiarnin. Alli kawakunapaq, Diospa rikëninchö alli kanapaq y imëyaqpis kawakïta tarinapaqmi Bibliaqa yanapamantsik. (Leyi Juan 17:3 y Hëchus 3:19.)