“I MËKACHÖMI alleq tsarakö, peru tentacion kaptinqa manam.” Tsënö niyanqanwanmi shonqunkunachöqa mana allita rurëta munëkäyanqanta rikätsikuyan. Peru wakinkunaqa mana alli pensëkunataqa vencita munayanmi. ¿Qamqa imataq ninki? ¿Tentacionkuna chämuptin tsarakïta procurashwantsuraq o manatsuraq?

Awmi, manam llapan tentacionkunatsu problëmakunam chätsimashwan. Këllaman pensarishun, alläpa mikukurkunqëkiqa mana allim kanman, peru manam tsëwanqa llapan kawënikitatsu malograrinki. Peru warmiwan o ollquwan punukï tentacionman ishkirqa, llapan kawënikitam malograrinkiman. Proverbius 6:32, 33 textum nin, casädu këkar jukwan punukïqa upa kë kanqanta y kawëninta chipyëpa ushakäratsinqanta.

Tsënö rakcha tentacionkuna chämuptinqa, ¿imataraq rurankiman? Bibliam kënö nin: “Teyta Diosqa munan qamcuna jutsannaq cayänequitam. Ama meqequipis jucwan jucwan pununacuyëtsu. Tsepa cuentanqa personequicunata respetar tsepita awantacuyë, Dios munashqanno cawacur” (1 Tesalonicensis 4:3, 4). ¿Tsëqa imatataq rurankiman tentacionkunachö alli tsarakunëkipaq? Tsëpaqqa kima (kimsa) cösaskunatam ruranëki. Rikärishun.

Mana alliman pensatsikoq fötukunata rikanqëkiqa mana alli munëkunatam miratsin. Jesusmi nirqan rikëwan munëqa jukllëllanö kanqanta, kënömi nirqan: “Pipis juc warmita riquecur munapäreq caqqa, jucwan punanacureqnonam carishqa”. Tsëmi juk igualatsikïwan kënö nirqan: “Sitsun nawiqui jutsa  rureman ishquitsishiniquita munanqa, mejor jorqurinquimanpis” (Mateu 5:28, 29). ¿Ima nimënintsiktataq munëkan? Tentacionkunaman mana ishkinapaqqa shonqupita patsëmi alli tsarakïta procuranantsik y llutanta munapätsikoq fötukunata, ni imakunatapis rikänantsiktsu.

Këman pensarishun, soldadürapa aktsinta rikëkurninqa, ¿rikaräkurtsuraq quedakunkiman? ¡Manachi!, malograkoq kanqanta musyëkarqä raschi nawikita (ñawikita) tsapakunkiman. Tsënö kaqllam, pensënikita rakchatänanta (iskatänanta) mana munarninqa, rakchakunata rikaräkurqa quedakunëkitsu. Juanmi kënö nin: “Juk shumaqllan warmita rikëkurqa, kutin kutinmi rikapäkita munä, peru juk läduman rikëtam procurä y kënömi nikö: ‘¡Jehoväman mañaki, kananta mañakï!’. Mañakur ushariptïqa munapënïqa ichikllapa ichikllapam ushakärin” (Mateu 6:9, 13; 1 Corintius 10:13).

Jina Diosta mana jaqipa sirweq Job ninqanmampis pensari: “Nawïwanmi juk conträtuta rurarqö, shipashkunata mana munapänäpaq” (Job 31:1). Qampis pënölla rurë.

Këta rurë: Imëllapis rakcha rurëkunata munapätsikoqta imatapis rikarninqa juk lädupa tumakuri. Salmu libru qellqaqnö qampis kënö ni: “Yanapëkallämë nawillä mana alli kaqtaqa mana rikänampaq” (Salmu 119:37).

Jutsasapa karmi, mana alli munëkunapita alli cuidakunantsik. Tsëmi Bibliaqa kënö nin: “Quiquin nunam mana alli muneninta ichicllapayan munapäquican. Tseno munapëcarllanam, juclla jutsaman jeqarcun. Y jutsallacho cawacorqa, infiernumanmi ewanqa” (Santiägu 1:14, 15). ¿Imanötaq pasëpa mana alliman chätsikoq jutsakunapita librakushwan?

Mana allikunaman yarpararqa, kikikim akranëki yarparëta sïguita o manapis. Peqëkipita (umaykipita) tsë pensëta jorqë. Ama warmiwampis o ollquwampis punukïllaman yarparäkur kakïtsu. Internetchö pornografïata rikaq Tomasmi kënö willakun: “Mana alli pensëkuna peqäman chäramuptinqa, tsëkunaman mana pensar sïguinäpaqmi alli kaqkunaman pensaq kä. Manam fäciltsu kaq. Atska kutim vencimarqan, peru tiempuwanqa alli kaqkunaman  pensëtam yachakurqä”. Tentacionkunaman seguïdu ishkeq Elsapis kënömi nin: “Imachöpis ocupädu kanqä y Jehoväman mañakunqämi yanapamarqan mana allikunaman mana yarparäkunapaq”.

Këta rurë: Mana allikunaman yarparanqëki höra raslla Jehoväman mañakï. Biblia kënö ninqanman yarparë: “Imepis quecunapaq yarpacachäyë: rason caqllapaq, cabal nuna quellapaq, Diospita alli ricashqa quellapaq, limpiu shonquyoq quellapaq, waquincunapa biennincuna rurecunallapaq y imatapis allita rurayanqequirecur alabashqa quellapaq. Tsecunallapaq yarpacachäyë” (Filipensis 4:8).

Rurëta munanqëkiman yarparëkaptiki tentacion chäramunman, jina tsëllamanna ruranëkipaq ocacion karamunman rasllam jutsa rurëman ishkirinkiman (Proverbius 7:6-23). Tsënö kaptinqa, ¿imatataq rurankiman mana ishkinëkipaq?

Bibliam kënö consejakun: “Yachaq nunaqa mana allikuna pasananta tantiyarirmi witikurin, peru upa nunakunaqa mana allita rikëkarpis ëwayanllam, tsëmi imëka sufrimientuman chäyan” (Proverbius 22:3). Tsëmi imatapis rurëkanqëkita alleq rikänëki. Jina imapis mana alliman chätsikoqtanö tantiyarqa rasmi witikunëki (Proverbius 7:25). Felïpiqa pornografïa rikarë viciuta jaqirirqanmi y kënömi willakun: “Llapankuna rikäyananmanmi computadörata churarqä y Internetchö këkaptï llutakuna mana yarqamunampaqmi juk progrämata churarqä. Wayïchö japallä këkarqa manam Internetman yëkoqtsu kä”. Jina Tomaspis kënömi willakun: “Manam mana allita pensatsikoq pelïculakunata rikätsu, ni warmiwan ollqu ruranakoqkunallapaq parlaq amïgukunawanqa juntakätsu. Porqui manam jutsaman ishkita munätsu”.

Këta rurë: Imakunachö tsarakïta mana puëdinqëkita alleq rikë y tsëpaqnö tentacionkuna kaptin imanö tsarakunëkipaq kaqman pensë (Mateu 6:13).

Alli tsarakïkarnimpis jutsaman ishkirninqa, ama jaqiritsu. Bibliam kënö nin: “Alli kaq nunaqa qanchis kuti ishkirirpis sharkurinqam, peru mana alli nunakunapaqqa desgraciam ishkitseqnin kanqa” (Proverbius 24:16). Awmi, Diosnintsikqa yapë sharkunapaqmi animamantsik. ¿Yanapashunëkita permitinkitsuraq? Permitirninqa, pëman mañakïta ni Bibliapita yachakïta jaqitsu. Reunionkunaman ëwanqëkipis yanapashunkim. Y ama qonqëtsu Diosnintsik kënö nir awnikunqanta: “Noqam kallpata qoshqëki. Noqam rasumpa yanapashqëki” (Isaïas 41:10).

Carlusmi kënö willakun: “Pornografïa rikëtaqa manam jaqita puëdirqätsu. Imëkanöllapapis rikäreqmi kä, peru Jehovä yanapamaptinmi jaqirirqä”. Jina Dylanpis kënömi nin: “Trabajaq mayï chïnawanqa punukurïmanmi karqan, peru alli tsarakurmi, manam nirirqä. Limpiu concienciayoq këqa alläpa shumaqmi. Y mas kushikïpaqran tsarakunqantsikpita Jehovä kuyamanqantsikta musyënäqa”.

Alli tsarakur tentacionman mana ishkiptikiqa, Jehoväqa alläpam qampita kushikunqa (Proverbius 27:11).