Waranqëpayan nunakunam Diospa Gobiernunman markäkuyan. Tsëmi, Jesus discïpulunkunata yachatsinqanta pëkunapis qatiyan. “Gobiernïki shamutsun. Ciëluchö rurakanqannölla patsachöpis munëniki rurakëkutsun” nir mañakuyänampaqmi Jesus mandarqan (Mateu 6:10, NM).

Mëtsikaq nunakuna Diospa Gobiernumpita yachakïta munayaptimpis, cäsi llapan religionkunam tsë yachatsikïta precisaqpaqtsu churayan. Unë pasakunqanta willakoq H.G. Wells nunam espantakurqan, Jesus “Diospa Gobiernumpita yachatsikïta” alläpa precisaqpaq churëkaptimpis, “cäsi llapan religionkuna yachatsikïninkunachö” tsë Gobiernupita alläpa mana parlayanqanta.

Peru Jehoväpa testïgunkunaqa Diospa Gobiernumpitam imëpis parlayä. Tantiyarinapaq, kanan höra këkätsinqëki mas reqishqa revistäkunataqa 220 idiömachömi yarqamun. Y cada yarqamurmi cäsi 46 millon rurakämun, tsëmi entëru Patsachö reqishqa. ¿Imataq mas precisaq yachatsikïninqa? Tïtulunta rikärirmi cuentata qokurinki: Täpakoq. Jehovä Diospa Gobiernumpita willakoq  * ninmi.

¿Imanirtaq kallpachakuntsik Diospa Gobiernumpita yachatsikïta? Bibliapa mas precisaq kaq yachatsikïnin kaptinmi. Jinamampis, segürum kantsik Diospa Gobiernun nunakunapa problëmankunata chipyëpa ushakätsinampaq kaqta.

Jesus ruranqanllatam qatita procurayä. Jesuspaqqa Diospa Gobiernunmi mas precisaq karqan y yachatsikurnimpis tsëpitam mas parlarqan (Lücas 4:43). ¿Imanirtaq pëpaq alläpa precisarqan? ¿Imatataq Diospa Gobiernun qamrëkur rurëta puëdin? Qateqnin kaq yachatsikïkunachö kë tapukïkunata Biblia imanö contestanqanta yachakurinëkipaqmi invitariyaq.