Qallanampita patsëmi, llapan nunakuna mana awkinyar jövinlla imëyaqpis kawakïta munayashqa. Peru llakikïpaqqa llapantsikmi wanuntsik. Qallananchö këkaq textuta Job qellqanqampitaqa kima waranqa watapita masnam pasashqa y tsë witsannöllam kanampis tsëqa rasunlla.

Mana wanushpa kawakïtaqa llapantsikmi alläpa munëkuntsik. Bibliam willakun tsë munëta y mana wanushpa kawë imanö kanqanta entiendi munëta shonquntsikman Dios churanqanta (Eclesiastes 3:11). Tsëkuna mana rasumpa kaptinqa, ¿allitsuraq kanman kuyamaqnintsik Dios tsë munëkunata shonquntsikman churanqan? Manam, Diospa palabranqa wanï juk chikimaqnintsik kanqantam nin, y tsëta ‘chipyëpa ushakätsinampaqmi’ änikun (1 Corintius 15:26).

Wanï chikimaqnintsik kanqantaqa musyantsikmi. Rasumpa kaqchöqa manam ni pipis wanïtaqa munantsu. Tsëpa rantinqa, kawënintsikta imallapis peligruman churaptinqa imëkanöpam witikuntsik. Y qeshyarninqa jampikoqmi doctorman ëwantsik. Imëkatam rurantsik kawëta munarnin.

¿Rasumpatsuraq tsë chikimaqnintsik chipyëpa ushakanqa? Awmi. Kamakoqnintsik Jehoväqa manam wallka watakunalla kawanapaqtsu kamamarquntsik. Diosqa manam wanï kananta munarqantsu. Pëqa mana wanushpa kë Patsachö imëyaqpis kawakunatam munarqan, y munanqantaqa cumplinmi (Isaïas 55:11).

¿Imanöraq wanïta Dios ushakätsinqa? Mëtsika watapam nunakunaqa wanïta ushakätsita procurayashqa, peru manam puëdiyashqatsu. Kanan witsampis tsënöllam rurëkäyan. Yachaq nunakunam wakin qeshyakunata kachakätseq jampikunata rurayashqa. Y llapan kawëyoqkuna imanö rurashqa kayanqantapis estudiëkäyanmi. Pasaq pachak wataqa mas wallka watakunallam nunakuna kawayaq, peru kananqa mëtsika sitiukunachömi mas kawayan. Tsënö kaptimpis, wanïtaqa manam venciyashqatsu, Biblia ninqannömi ‘llapampis allpaman kutiyan’ (Eclesiastes 3:20).

Peru alli willakïkunam kan, manam nunakunatsu tsë problëmata ushakätsiyanqa. Jehovämi wanïpita salvamänapaq juk precisaqta rurashqa, tsëpaqqa Jesucristutam kachamurqan.